| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
8. නිගණ්‌ඨනාටපුත්‌තසුත්‌තවණ්‌ණනා
8. Nigaṇṭhanāṭaputtasuttavaṇṇanā
350. අට්‌ඨමෙ තෙනුපසඞ්‌කමීති සයං ආගතාගමො විඤ්‌ඤාතසාසනො අනාගාමී අරියසාවකො සමානො කස්‌මා නග්‌ගභොග්‌ගං නිස්‌සිරිකං නිගණ්‌ඨං උපසඞ්‌කමීති? උපවාදමොචනත්‌ථඤ්‌චෙව වාදාරොපනත්‌ථඤ්‌ච. නිගණ්‌ඨා කිර ‘‘සමණස්‌ස ගොතමස්‌ස සාවකා ථද්‌ධඛදිරඛාණුකසදිසා, කෙනචි සද්‌ධිං පටිසන්‌ථාරම්‌පි න කරොන්‌තී’’ති උපවදන්‌ති, තස්‌ස උපවාදස්‌ස මොචනත්‌ථඤ්‌ච, ‘‘වාදඤ්‌චස්‌ස ආරොපෙස්‌සාමී’’ති උපසඞ්‌කමි. න ඛ්‌වාහං එත්‌ථ භන්‌තෙ භගවතො සද්‌ධාය ගච්‌ඡාමීති යස්‌ස ඤාණෙන අසච්‌ඡිකතං හොති. සො ‘‘එවං කිරෙත’’න්‌ති අඤ්‌ඤස්‌ස සද්‌ධාය ගච්‌ඡෙය්‍ය, මයා පන ඤාණෙනෙතං සච්‌ඡිකතං, තස්‌මා නාහං එත්‌ථ භගවතො සද්‌ධාය ගච්‌ඡාමීති දීපෙන්‌තො එවමාහ.
350. Aṭṭhame tenupasaṅkamīti sayaṃ āgatāgamo viññātasāsano anāgāmī ariyasāvako samāno kasmā naggabhoggaṃ nissirikaṃ nigaṇṭhaṃ upasaṅkamīti? Upavādamocanatthañceva vādāropanatthañca. Nigaṇṭhā kira ‘‘samaṇassa gotamassa sāvakā thaddhakhadirakhāṇukasadisā, kenaci saddhiṃ paṭisanthārampi na karontī’’ti upavadanti, tassa upavādassa mocanatthañca, ‘‘vādañcassa āropessāmī’’ti upasaṅkami. Na khvāhaṃ ettha bhante bhagavato saddhāya gacchāmīti yassa ñāṇena asacchikataṃ hoti. So ‘‘evaṃ kireta’’nti aññassa saddhāya gaccheyya, mayā pana ñāṇenetaṃ sacchikataṃ, tasmā nāhaṃ ettha bhagavato saddhāya gacchāmīti dīpento evamāha.
උල්‌ලොකෙත්‌වාති කායං උන්‌නාමෙත්‌වා කුච්‌ඡිං නීහරිත්‌වා ගීවං පග්‌ගය්‌හ සබ්‌බං දිසං පෙක්‌ඛමානො උල්‌ලොකෙත්‌වා. බාධෙතබ්‌බං මඤ්‌ඤෙය්‍යාති යථා විනිවිජ්‌ඣිත්‌වා න නික්‌ඛමති, එවං පටිබාහිතබ්‌බං මඤ්‌ඤෙය්‍ය බන්‌ධිතබ්‌බං වා. සහධම්‌මිකාති සකාරණා. අථ මං පටිහරෙය්‍යාසි සද්‌ධිං නිගණ්‌ඨපරිසායාති එතෙසං අත්‌ථෙ ඤාතෙ අථ මෙ නිගණ්‌ඨපරිසාය සද්‌ධිං අභිගච්‌ඡෙය්‍යාසි, පතීහාරස්‌ස මෙ සන්‌තිකං ආගන්‌ත්‌වා අත්‌තනො ආගතභාවං ජානාපෙය්‍යාසීති අත්‌ථො. එකො පඤ්‌හොති එකො පඤ්‌හමග්‌ගො, එකං පඤ්‌හගවෙසනන්‌ති අත්‌ථො. එකො උද්‌දෙසොති එකං නාම කින්‌ති? අයං එකො උද්‌දෙසො. එකං වෙය්‍යාකරණන්‌ති ‘‘සබ්‌බෙ සත්‌තා ආහාරට්‌ඨිතිකා’’ති (ඛු. පා. 4.1; අ. නි. 10.27) ඉදං එකං වෙය්‍යාකරණං. එවං සබ්‌බත්‌ථ අත්‌ථො වෙදිතබ්‌බො.
Ulloketvāti kāyaṃ unnāmetvā kucchiṃ nīharitvā gīvaṃ paggayha sabbaṃ disaṃ pekkhamāno ulloketvā. Bādhetabbaṃ maññeyyāti yathā vinivijjhitvā na nikkhamati, evaṃ paṭibāhitabbaṃ maññeyya bandhitabbaṃ vā. Sahadhammikāti sakāraṇā. Atha maṃ paṭihareyyāsi saddhiṃ nigaṇṭhaparisāyāti etesaṃ atthe ñāte atha me nigaṇṭhaparisāya saddhiṃ abhigaccheyyāsi, patīhārassa me santikaṃ āgantvā attano āgatabhāvaṃ jānāpeyyāsīti attho. Eko pañhoti eko pañhamaggo, ekaṃ pañhagavesananti attho. Eko uddesoti ekaṃ nāma kinti? Ayaṃ eko uddeso. Ekaṃ veyyākaraṇanti ‘‘sabbe sattā āhāraṭṭhitikā’’ti (khu. pā. 4.1; a. ni. 10.27) idaṃ ekaṃ veyyākaraṇaṃ. Evaṃ sabbattha attho veditabbo.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 8. නිගණ්‌ඨනාටපුත්‌තසුත්‌තං • 8. Nigaṇṭhanāṭaputtasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 8. නිගණ්‌ඨනාටපුත්‌තසුත්‌තවණ්‌ණනා • 8. Nigaṇṭhanāṭaputtasuttavaṇṇanā
