| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
4. நிக³ண்ட²ஸுத்தவண்ணனா
4. Nigaṇṭhasuttavaṇṇanā
75. சதுத்தே² கூடாகா³ரஸாலாயந்தி த்³வே கண்ணிகா க³ஹெத்வா ஹங்ஸவட்டகச்ச²ன்னேன கதாய க³ந்த⁴குடியா. அபரிஸேஸங் ஞாணத³ஸ்ஸனங் படிஜானாதீதி அப்பமத்தகம்பி அஸேஸெத்வா ஸப்³ப³ங் ஞாணத³ஸ்ஸனங் படிஜானாதி. ஸததங் ஸமிதந்தி ஸப்³ப³காலங் நிரந்தரங். ஞாணத³ஸ்ஸனங் பச்சுபட்டி²தந்தி ஸப்³ப³ஞ்ஞுதஞ்ஞாணங் மய்ஹங் உபட்டி²தமேவாதி த³ஸ்ஸேதி. புராணானங் கம்மானந்தி ஆயூஹிதகம்மானங். தபஸா ப்³யந்தீபா⁴வந்தி து³க்கரதபேன விக³தந்தகரணங். நவானங் கம்மானந்தி இதா³னி ஆயூஹிதப்³ப³கம்மானங். அகரணாதி அனாயூஹனேன. ஸேதுகா⁴தந்தி பத³கா⁴தங் பச்சயகா⁴தங் கதே²தி. கம்மக்க²யா து³க்க²க்க²யோதி கம்மவட்டக்க²யேன து³க்க²க்க²யோ. து³க்க²க்க²யா வேத³னாக்க²யோதி து³க்க²வட்டக்க²யேன வேத³னாக்க²யோ. து³க்க²வட்டஸ்மிஞ்ஹி கீ²ணே வேத³னாவட்டம்பி கீ²ணமேவ ஹோதி. வேத³னாக்க²யா ஸப்³ப³ங் து³க்க²ங் நிஜ்ஜிண்ணங் ப⁴விஸ்ஸதீதி வேத³னாக்க²யேன பன ஸகலவட்டது³க்க²ங் நிஜ்ஜிண்ணமேவ ப⁴விஸ்ஸதி. ஸந்தி³ட்டி²காயாதி ஸாமங் பஸ்ஸிதப்³பா³ய பச்சக்கா²ய. நிஜ்ஜராய விஸுத்³தி⁴யாதி கிலேஸஜீரணகபடிபதா³ய கிலேஸே வா நிஜ்ஜீரணதோ நிஜ்ஜராய ஸத்தானங் விஸுத்³தி⁴யா. ஸமதிக்கமோ ஹோதீதி ஸகலஸ்ஸ வட்டது³க்க²ஸ்ஸ அதிக்கமோ ஹோதி. இத⁴, ப⁴ந்தே, ப⁴க³வா கிமாஹாதி, ப⁴ந்தே, ப⁴க³வா இமாய படிபத்தியா கிமாஹ, கிங் ஏதங்யேவ கிலேஸனிஜ்ஜீரணகபடிபத³ங் பஞ்ஞபேதி, உதா³ஹு அஞ்ஞந்தி புச்ச²தி.
75. Catutthe kūṭāgārasālāyanti dve kaṇṇikā gahetvā haṃsavaṭṭakacchannena katāya gandhakuṭiyā. Aparisesaṃ ñāṇadassanaṃ paṭijānātīti appamattakampi asesetvā sabbaṃ ñāṇadassanaṃ paṭijānāti. Satataṃ samitanti sabbakālaṃ nirantaraṃ. Ñāṇadassanaṃ paccupaṭṭhitanti sabbaññutaññāṇaṃ mayhaṃ upaṭṭhitamevāti dasseti. Purāṇānaṃ kammānanti āyūhitakammānaṃ. Tapasā byantībhāvanti dukkaratapena vigatantakaraṇaṃ. Navānaṃ kammānanti idāni āyūhitabbakammānaṃ. Akaraṇāti anāyūhanena. Setughātanti padaghātaṃ paccayaghātaṃ katheti. Kammakkhayā dukkhakkhayoti kammavaṭṭakkhayena dukkhakkhayo. Dukkhakkhayā vedanākkhayoti dukkhavaṭṭakkhayena vedanākkhayo. Dukkhavaṭṭasmiñhi khīṇe vedanāvaṭṭampi khīṇameva hoti. Vedanākkhayā sabbaṃ dukkhaṃ nijjiṇṇaṃ bhavissatīti vedanākkhayena pana sakalavaṭṭadukkhaṃ nijjiṇṇameva bhavissati. Sandiṭṭhikāyāti sāmaṃ passitabbāya paccakkhāya. Nijjarāya visuddhiyāti kilesajīraṇakapaṭipadāya kilese vā nijjīraṇato nijjarāya sattānaṃ visuddhiyā. Samatikkamo hotīti sakalassa vaṭṭadukkhassa atikkamo hoti. Idha, bhante, bhagavā kimāhāti, bhante, bhagavā imāya paṭipattiyā kimāha, kiṃ etaṃyeva kilesanijjīraṇakapaṭipadaṃ paññapeti, udāhu aññanti pucchati.
ஜானதாதி அனாவரணஞாணேன ஜானந்தேன. பஸ்ஸதாதி ஸமந்தசக்கு²னா பஸ்ஸந்தேன. விஸுத்³தி⁴யாதி விஸுத்³தி⁴ஸம்பாபனத்தா²ய. ஸமதிக்கமாயாதி ஸமதிக்கமனத்தா²ய. அத்த²ங்க³மாயாதி அத்த²ங் க³மனத்தா²ய. ஞாயஸ்ஸ அதி⁴க³மாயாதி ஸஹ விபஸ்ஸனாய மக்³க³ஸ்ஸ அதி⁴க³மனத்தா²ய. நிப்³பா³னஸ்ஸ ஸச்சி²கிரியாயாதி அபச்சயனிப்³பா³னஸ்ஸ ஸச்சி²கரணத்தா²ய. நவஞ்ச கம்மங் ந கரோதீதி நவங் கம்மங் நாயூஹதி. புராணஞ்ச கம்மந்தி புப்³பே³ ஆயூஹிதகம்மங். பு²ஸ்ஸ பு²ஸ்ஸ ப்³யந்தீ கரோதீதி பு²ஸித்வா பு²ஸித்வா விக³தந்தங் கரோதி, விபாகப²ஸ்ஸங் பு²ஸித்வா பு²ஸித்வா தங் கம்மங் கே²பேதீதி அத்தோ². ஸந்தி³ட்டி²காதி ஸாமங் பஸ்ஸிதப்³பா³. அகாலிகாதி ந காலந்தரே கிச்சகாரிகா. ஏஹிபஸ்ஸிகாதி ‘‘ஏஹி பஸ்ஸா’’தி ஏவங் த³ஸ்ஸேதுங் யுத்தா. ஓபனெய்யிகாதி உபனயே யுத்தா அல்லீயிதப்³ப³யுத்தா. பச்சத்தங் வேதி³தப்³பா³ விஞ்ஞூஹீதி பண்டி³தேஹி அத்தனோ அத்தனோ ஸந்தானேயேவ ஜானிதப்³பா³, பா³லேஹி பன து³ஜ்ஜானா. இதி ஸீலவஸேன த்³வே மக்³கா³, த்³வே ச ப²லானி கதி²தானி. ஸோதாபன்னஸகதா³கா³மினோ ஹி ஸீலேஸு பரிபூரகாரினோதி. விவிச்சேவ காமேஹீதிஆதி³காய பன ஸமாதி⁴ஸம்பதா³ய தயோ மக்³கா³, தீணி ச ப²லானி கதி²தானி. அனாகா³மீ அரியஸாவகோ ஹி ஸமாதி⁴ம்ஹி பரிபூரகாரீதி வுத்தோ. ஆஸவானங் க²யாதிஆதீ³ஹி அரஹத்தப²லங் கதி²தங். கேசி பன ஸீலஸமாத⁴யோபி அரஹத்தப²லஸம்பயுத்தாவ இத⁴ அதி⁴ப்பேதா. ஏகேகஸ்ஸ பன வஸேன படிபத்தித³ஸ்ஸனத்த²ங் விஸுங் விஸுங் தந்தி ஆரோபிதாதி.
Jānatāti anāvaraṇañāṇena jānantena. Passatāti samantacakkhunā passantena. Visuddhiyāti visuddhisampāpanatthāya. Samatikkamāyāti samatikkamanatthāya. Atthaṅgamāyāti atthaṃ gamanatthāya. Ñāyassa adhigamāyāti saha vipassanāya maggassa adhigamanatthāya. Nibbānassa sacchikiriyāyāti apaccayanibbānassa sacchikaraṇatthāya. Navañca kammaṃ na karotīti navaṃ kammaṃ nāyūhati. Purāṇañca kammanti pubbe āyūhitakammaṃ. Phussa phussa byantī karotīti phusitvā phusitvā vigatantaṃ karoti, vipākaphassaṃ phusitvā phusitvā taṃ kammaṃ khepetīti attho. Sandiṭṭhikāti sāmaṃ passitabbā. Akālikāti na kālantare kiccakārikā. Ehipassikāti ‘‘ehi passā’’ti evaṃ dassetuṃ yuttā. Opaneyyikāti upanaye yuttā allīyitabbayuttā. Paccattaṃ veditabbā viññūhīti paṇḍitehi attano attano santāneyeva jānitabbā, bālehi pana dujjānā. Iti sīlavasena dve maggā, dve ca phalāni kathitāni. Sotāpannasakadāgāmino hi sīlesu paripūrakārinoti. Vivicceva kāmehītiādikāya pana samādhisampadāya tayo maggā, tīṇi ca phalāni kathitāni. Anāgāmī ariyasāvako hi samādhimhi paripūrakārīti vutto. Āsavānaṃ khayātiādīhi arahattaphalaṃ kathitaṃ. Keci pana sīlasamādhayopi arahattaphalasampayuttāva idha adhippetā. Ekekassa pana vasena paṭipattidassanatthaṃ visuṃ visuṃ tanti āropitāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. நிக³ண்ட²ஸுத்தங் • 4. Nigaṇṭhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4. நிக³ண்ட²ஸுத்தவண்ணனா • 4. Nigaṇṭhasuttavaṇṇanā
