| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
4. நிக³ண்ட²ஸுத்தவண்ணனா
4. Nigaṇṭhasuttavaṇṇanā
75. சதுத்தே² ஹங்ஸவட்டகச்ச²ன்னேனாதி ஹங்ஸவட்டகபரிச்ச²ன்னேன, ஹங்ஸமண்ட³லாகாரேனாதி அத்தோ². நத்தி² ஏதஸ்ஸ பரிஸேஸந்தி அபரிஸேஸங். தேனாஹ ‘‘அப்பமத்தகம்பி அஸேஸெத்வா’’தி. அபரிஸேஸத⁴ம்மஜானநதோ வா அபரிஸேஸஸங்கா²தங் ஞாணத³ஸ்ஸனங் படிஜானாதீதி ஏவம்பெத்த² அத்தோ² த³ட்ட²ப்³போ³. ஸததந்தி நிச்சங். ஸமிதந்தி தஸ்ஸேவ வேவசனந்தி ஆஹ ‘‘ஸததங் ஸமிதந்தி ஸப்³ப³காலங் நிரந்தர’’ந்தி. அத² வா நிச்சட்டே²ன ஸதத-ஸத்³தே³ன அபி⁴ண்ஹப்பவத்தி ஜோதிதா ஸியாதி ‘‘ஸமித’’ந்தி வுத்தங். தேன நிரந்தரப்பவத்திங் த³ஸ்ஸேதீதி ஆஹ ‘‘ஸப்³ப³காலங் நிரந்தர’’ந்தி.
75. Catutthe haṃsavaṭṭakacchannenāti haṃsavaṭṭakaparicchannena, haṃsamaṇḍalākārenāti attho. Natthi etassa parisesanti aparisesaṃ. Tenāha ‘‘appamattakampi asesetvā’’ti. Aparisesadhammajānanato vā aparisesasaṅkhātaṃ ñāṇadassanaṃ paṭijānātīti evampettha attho daṭṭhabbo. Satatanti niccaṃ. Samitanti tasseva vevacananti āha ‘‘satataṃ samitanti sabbakālaṃ nirantara’’nti. Atha vā niccaṭṭhena satata-saddena abhiṇhappavatti jotitā siyāti ‘‘samita’’nti vuttaṃ. Tena nirantarappavattiṃ dassetīti āha ‘‘sabbakālaṃ nirantara’’nti.
விஸுத்³தி⁴ஸம்பாபனத்தா²யாதி ராகா³தீ³ஹி மலேஹி அபி⁴ஜ்ஜா²விஸமலோபா⁴தீ³ஹி ச உபக்கிலிட்ட²சித்தானங் ஸத்தானங் விஸுத்³தி⁴பாபனத்தா²ய. ஸமதிக்கமனத்தா²யாதி ஸோகஸ்ஸ ச பரிதே³வஸ்ஸ ச பஹானத்தா²ய. அத்த²ங் க³மனத்தா²யாதி காயிகது³க்க²ஸ்ஸ ச சேதஸிகதோ³மனஸ்ஸஸ்ஸ சாதி இமேஸங் த்³வின்னங் அத்த²ங்க³மனாய, நிரோதா⁴யாதி அத்தோ². ஞாயதி நிச்ச²யேன கமதி நிப்³பா³னங். தங் வா ஞாயதி படிவிஜ்ஜ²தி ஏதேனாதி ஞாயோ, அரியமக்³கோ³தி ஆஹ ‘‘மக்³க³ஸ்ஸ அதி⁴க³மனத்தா²யா’’தி. அபச்சயனிப்³பா³னஸ்ஸ ஸச்சி²கரணத்தா²யாதி பச்சயரஹிதத்தா அபச்சயஸ்ஸ அஸங்க²தஸ்ஸ தண்ஹாவானவிரஹிதத்தா நிப்³பா³னந்தி லத்³த⁴னாமஸ்ஸ அமதஸ்ஸ ஸச்சி²கிரியாய, அத்தபச்சக்க²தாயாதி வுத்தங் ஹோதி. பு²ஸித்வா பு²ஸித்வாதி பத்வா பத்வா. ஸேஸமெத்த² ஸுவிஞ்ஞெய்யமேவ.
Visuddhisampāpanatthāyāti rāgādīhi malehi abhijjhāvisamalobhādīhi ca upakkiliṭṭhacittānaṃ sattānaṃ visuddhipāpanatthāya. Samatikkamanatthāyāti sokassa ca paridevassa ca pahānatthāya. Atthaṃ gamanatthāyāti kāyikadukkhassa ca cetasikadomanassassa cāti imesaṃ dvinnaṃ atthaṅgamanāya, nirodhāyāti attho. Ñāyati nicchayena kamati nibbānaṃ. Taṃ vā ñāyati paṭivijjhati etenāti ñāyo, ariyamaggoti āha ‘‘maggassa adhigamanatthāyā’’ti. Apaccayanibbānassa sacchikaraṇatthāyāti paccayarahitattā apaccayassa asaṅkhatassa taṇhāvānavirahitattā nibbānanti laddhanāmassa amatassa sacchikiriyāya, attapaccakkhatāyāti vuttaṃ hoti. Phusitvā phusitvāti patvā patvā. Sesamettha suviññeyyameva.
நிக³ண்ட²ஸுத்தவண்ணனா நிட்டி²தா.
Nigaṇṭhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. நிக³ண்ட²ஸுத்தங் • 4. Nigaṇṭhasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. நிக³ண்ட²ஸுத்தவண்ணனா • 4. Nigaṇṭhasuttavaṇṇanā
