| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৪. নিগণ্ঠসুত্তৰণ্ণনা
4. Nigaṇṭhasuttavaṇṇanā
৭৫. চতুত্থে হংসৰট্টকচ্ছন্নেনাতি হংসৰট্টকপরিচ্ছন্নেন, হংসমণ্ডলাকারেনাতি অত্থো। নত্থি এতস্স পরিসেসন্তি অপরিসেসং। তেনাহ ‘‘অপ্পমত্তকম্পি অসেসেত্ৰা’’তি। অপরিসেসধম্মজাননতো ৰা অপরিসেসসঙ্খাতং ঞাণদস্সনং পটিজানাতীতি এৰম্পেত্থ অত্থো দট্ঠব্বো। সততন্তি নিচ্চং। সমিতন্তি তস্সেৰ ৰেৰচনন্তি আহ ‘‘সততং সমিতন্তি সব্বকালং নিরন্তর’’ন্তি। অথ ৰা নিচ্চট্ঠেন সতত-সদ্দেন অভিণ্হপ্পৰত্তি জোতিতা সিযাতি ‘‘সমিত’’ন্তি ৰুত্তং। তেন নিরন্তরপ্পৰত্তিং দস্সেতীতি আহ ‘‘সব্বকালং নিরন্তর’’ন্তি।
75. Catutthe haṃsavaṭṭakacchannenāti haṃsavaṭṭakaparicchannena, haṃsamaṇḍalākārenāti attho. Natthi etassa parisesanti aparisesaṃ. Tenāha ‘‘appamattakampi asesetvā’’ti. Aparisesadhammajānanato vā aparisesasaṅkhātaṃ ñāṇadassanaṃ paṭijānātīti evampettha attho daṭṭhabbo. Satatanti niccaṃ. Samitanti tasseva vevacananti āha ‘‘satataṃ samitanti sabbakālaṃ nirantara’’nti. Atha vā niccaṭṭhena satata-saddena abhiṇhappavatti jotitā siyāti ‘‘samita’’nti vuttaṃ. Tena nirantarappavattiṃ dassetīti āha ‘‘sabbakālaṃ nirantara’’nti.
ৰিসুদ্ধিসম্পাপনত্থাযাতি রাগাদীহি মলেহি অভিজ্ঝাৰিসমলোভাদীহি চ উপক্কিলিট্ঠচিত্তানং সত্তানং ৰিসুদ্ধিপাপনত্থায। সমতিক্কমনত্থাযাতি সোকস্স চ পরিদেৰস্স চ পহানত্থায। অত্থং গমনত্থাযাতি কাযিকদুক্খস্স চ চেতসিকদোমনস্সস্স চাতি ইমেসং দ্ৰিন্নং অত্থঙ্গমনায, নিরোধাযাতি অত্থো। ঞাযতি নিচ্ছযেন কমতি নিব্বানং। তং ৰা ঞাযতি পটিৰিজ্ঝতি এতেনাতি ঞাযো, অরিযমগ্গোতি আহ ‘‘মগ্গস্স অধিগমনত্থাযা’’তি। অপচ্চযনিব্বানস্স সচ্ছিকরণত্থাযাতি পচ্চযরহিতত্তা অপচ্চযস্স অসঙ্খতস্স তণ্হাৰানৰিরহিতত্তা নিব্বানন্তি লদ্ধনামস্স অমতস্স সচ্ছিকিরিযায, অত্তপচ্চক্খতাযাতি ৰুত্তং হোতি। ফুসিত্ৰা ফুসিত্ৰাতি পত্ৰা পত্ৰা। সেসমেত্থ সুৰিঞ্ঞেয্যমেৰ।
Visuddhisampāpanatthāyāti rāgādīhi malehi abhijjhāvisamalobhādīhi ca upakkiliṭṭhacittānaṃ sattānaṃ visuddhipāpanatthāya. Samatikkamanatthāyāti sokassa ca paridevassa ca pahānatthāya. Atthaṃ gamanatthāyāti kāyikadukkhassa ca cetasikadomanassassa cāti imesaṃ dvinnaṃ atthaṅgamanāya, nirodhāyāti attho. Ñāyati nicchayena kamati nibbānaṃ. Taṃ vā ñāyati paṭivijjhati etenāti ñāyo, ariyamaggoti āha ‘‘maggassa adhigamanatthāyā’’ti. Apaccayanibbānassa sacchikaraṇatthāyāti paccayarahitattā apaccayassa asaṅkhatassa taṇhāvānavirahitattā nibbānanti laddhanāmassa amatassa sacchikiriyāya, attapaccakkhatāyāti vuttaṃ hoti. Phusitvā phusitvāti patvā patvā. Sesamettha suviññeyyameva.
নিগণ্ঠসুত্তৰণ্ণনা নিট্ঠিতা।
Nigaṇṭhasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৪. নিগণ্ঠসুত্তং • 4. Nigaṇṭhasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৪. নিগণ্ঠসুত্তৰণ্ণনা • 4. Nigaṇṭhasuttavaṇṇanā
