| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၄. နိဂဏ္ဌသုတ္တဝဏ္ဏနာ
4. Nigaṇṭhasuttavaṇṇanā
၇၅. စတုတ္ထေ ဟံသဝဋ္ဋကစ္ဆန္နေနာတိ ဟံသဝဋ္ဋကပရိစ္ဆန္နေန, ဟံသမဏ္ဍလာကာရေနာတိ အတ္ထော။ နတ္ထိ ဧတသ္သ ပရိသေသန္တိ အပရိသေသံ။ တေနာဟ ‘‘အပ္ပမတ္တကမ္ပိ အသေသေတ္ဝာ’’တိ။ အပရိသေသဓမ္မဇာနနတော ဝာ အပရိသေသသင္ခာတံ ဉာဏဒသ္သနံ ပဋိဇာနာတီတိ ဧဝမ္ပေတ္ထ အတ္ထော ဒဋ္ဌဗ္ဗော။ သတတန္တိ နိစ္စံ။ သမိတန္တိ တသ္သေဝ ဝေဝစနန္တိ အာဟ ‘‘သတတံ သမိတန္တိ သဗ္ဗကာလံ နိရန္တရ’’န္တိ။ အထ ဝာ နိစ္စဋ္ဌေန သတတ-သဒ္ဒေန အဘိဏ္ဟပ္ပဝတ္တိ ဇောတိတာ သိယာတိ ‘‘သမိတ’’န္တိ ဝုတ္တံ။ တေန နိရန္တရပ္ပဝတ္တိံ ဒသ္သေတီတိ အာဟ ‘‘သဗ္ဗကာလံ နိရန္တရ’’န္တိ။
75. Catutthe haṃsavaṭṭakacchannenāti haṃsavaṭṭakaparicchannena, haṃsamaṇḍalākārenāti attho. Natthi etassa parisesanti aparisesaṃ. Tenāha ‘‘appamattakampi asesetvā’’ti. Aparisesadhammajānanato vā aparisesasaṅkhātaṃ ñāṇadassanaṃ paṭijānātīti evampettha attho daṭṭhabbo. Satatanti niccaṃ. Samitanti tasseva vevacananti āha ‘‘satataṃ samitanti sabbakālaṃ nirantara’’nti. Atha vā niccaṭṭhena satata-saddena abhiṇhappavatti jotitā siyāti ‘‘samita’’nti vuttaṃ. Tena nirantarappavattiṃ dassetīti āha ‘‘sabbakālaṃ nirantara’’nti.
ဝိသုဒ္ဓိသမ္ပာပနတ္ထာယာတိ ရာဂာဒီဟိ မလေဟိ အဘိဇ္ဈာဝိသမလောဘာဒီဟိ စ ဥပက္ကိလိဋ္ဌစိတ္တာနံ သတ္တာနံ ဝိသုဒ္ဓိပာပနတ္ထာယ။ သမတိက္ကမနတ္ထာယာတိ သောကသ္သ စ ပရိဒေဝသ္သ စ ပဟာနတ္ထာယ။ အတ္ထံ ဂမနတ္ထာယာတိ ကာယိကဒုက္ခသ္သ စ စေတသိကဒောမနသ္သသ္သ စာတိ ဣမေသံ ဒ္ဝိန္နံ အတ္ထင္ဂမနာယ, နိရောဓာယာတိ အတ္ထော။ ဉာယတိ နိစ္ဆယေန ကမတိ နိဗ္ဗာနံ။ တံ ဝာ ဉာယတိ ပဋိဝိဇ္ဈတိ ဧတေနာတိ ဉာယော, အရိယမဂ္ဂောတိ အာဟ ‘‘မဂ္ဂသ္သ အဓိဂမနတ္ထာယာ’’တိ။ အပစ္စယနိဗ္ဗာနသ္သ သစ္ဆိကရဏတ္ထာယာတိ ပစ္စယရဟိတတ္တာ အပစ္စယသ္သ အသင္ခတသ္သ တဏ္ဟာဝာနဝိရဟိတတ္တာ နိဗ္ဗာနန္တိ လဒ္ဓနာမသ္သ အမတသ္သ သစ္ဆိကိရိယာယ, အတ္တပစ္စက္ခတာယာတိ ဝုတ္တံ ဟောတိ။ ဖုသိတ္ဝာ ဖုသိတ္ဝာတိ ပတ္ဝာ ပတ္ဝာ။ သေသမေတ္ထ သုဝိညေယ္ယမေဝ။
Visuddhisampāpanatthāyāti rāgādīhi malehi abhijjhāvisamalobhādīhi ca upakkiliṭṭhacittānaṃ sattānaṃ visuddhipāpanatthāya. Samatikkamanatthāyāti sokassa ca paridevassa ca pahānatthāya. Atthaṃ gamanatthāyāti kāyikadukkhassa ca cetasikadomanassassa cāti imesaṃ dvinnaṃ atthaṅgamanāya, nirodhāyāti attho. Ñāyati nicchayena kamati nibbānaṃ. Taṃ vā ñāyati paṭivijjhati etenāti ñāyo, ariyamaggoti āha ‘‘maggassa adhigamanatthāyā’’ti. Apaccayanibbānassa sacchikaraṇatthāyāti paccayarahitattā apaccayassa asaṅkhatassa taṇhāvānavirahitattā nibbānanti laddhanāmassa amatassa sacchikiriyāya, attapaccakkhatāyāti vuttaṃ hoti. Phusitvā phusitvāti patvā patvā. Sesamettha suviññeyyameva.
နိဂဏ္ဌသုတ္တဝဏ္ဏနာ နိဋ္ဌိတာ။
Nigaṇṭhasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၄. နိဂဏ္ဌသုတ္တံ • 4. Nigaṇṭhasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၄. နိဂဏ္ဌသုတ္တဝဏ္ဏနာ • 4. Nigaṇṭhasuttavaṇṇanā
