| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১৬. সোল়সমৰগ্গো
16. Soḷasamavaggo
(১৫৬) ১. নিগ্গহকথা
(156) 1. Niggahakathā
৭৪৩. পরো পরস্স চিত্তং নিগ্গণ্হাতীতি? আমন্তা। পরো পরস্স চিত্তং ‘‘মা রজ্জি’’, ‘‘মা দুস্সি’’, ‘‘মা মুয্হি’’, ‘‘মা কিলিস্সী’’তি নিগ্গণ্হাতীতি? ন হেৰং ৰত্তব্বে…পে॰… পরো পরস্স চিত্তং নিগ্গণ্হাতীতি? আমন্তা। পরো পরস্স উপ্পন্নো ফস্সো ‘‘মা নিরুজ্ঝী’’তি নিগ্গণ্হাতীতি? ন হেৰং ৰত্তব্বে…পে॰… পরো পরস্স উপ্পন্না ৰেদনা…পে॰… উপ্পন্না সঞ্ঞা… উপ্পন্না চেতনা… উপ্পন্নং চিত্তং… উপ্পন্না সদ্ধা… উপ্পন্নং ৰীরিযং … উপ্পন্না সতি… উপ্পন্নো সমাধি…পে॰… উপ্পন্না পঞ্ঞা ‘‘মা নিরুজ্ঝী’’তি নিগ্গণ্হাতীতি? ন হেৰং ৰত্তব্বে…পে॰…।
743. Paro parassa cittaṃ niggaṇhātīti? Āmantā. Paro parassa cittaṃ ‘‘mā rajji’’, ‘‘mā dussi’’, ‘‘mā muyhi’’, ‘‘mā kilissī’’ti niggaṇhātīti? Na hevaṃ vattabbe…pe… paro parassa cittaṃ niggaṇhātīti? Āmantā. Paro parassa uppanno phasso ‘‘mā nirujjhī’’ti niggaṇhātīti? Na hevaṃ vattabbe…pe… paro parassa uppannā vedanā…pe… uppannā saññā… uppannā cetanā… uppannaṃ cittaṃ… uppannā saddhā… uppannaṃ vīriyaṃ … uppannā sati… uppanno samādhi…pe… uppannā paññā ‘‘mā nirujjhī’’ti niggaṇhātīti? Na hevaṃ vattabbe…pe….
পরো পরস্স চিত্তং নিগ্গণ্হাতীতি? আমন্তা। পরো পরস্স অত্থায রাগং পজহতি… দোসং পজহতি…পে॰… অনোত্তপ্পং পজহতীতি? ন হেৰং ৰত্তব্বে…পে॰…।
Paro parassa cittaṃ niggaṇhātīti? Āmantā. Paro parassa atthāya rāgaṃ pajahati… dosaṃ pajahati…pe… anottappaṃ pajahatīti? Na hevaṃ vattabbe…pe….
পরো পরস্স চিত্তং নিগ্গণ্হাতীতি? আমন্তা। পরো পরস্স অত্থায মগ্গং ভাৰেতি… সতিপট্ঠানং ভাৰেতি…পে॰… বোজ্ঝঙ্গং ভাৰেতীতি ? ন হেৰং ৰত্তব্বে…পে॰…।
Paro parassa cittaṃ niggaṇhātīti? Āmantā. Paro parassa atthāya maggaṃ bhāveti… satipaṭṭhānaṃ bhāveti…pe… bojjhaṅgaṃ bhāvetīti ? Na hevaṃ vattabbe…pe….
পরো পরস্স চিত্তং নিগ্গণ্হাতীতি? আমন্তা। পরো পরস্স অত্থায দুক্খং পরিজানাতি, সমুদযং পজহতি, নিরোধং সচ্ছিকরোতি, মগ্গং ভাৰেতীতি? ন হেৰং ৰত্তব্বে…পে॰…।
Paro parassa cittaṃ niggaṇhātīti? Āmantā. Paro parassa atthāya dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Na hevaṃ vattabbe…pe….
পরো পরস্স চিত্তং নিগ্গণ্হাতীতি? আমন্তা। অঞ্ঞো অঞ্ঞস্স কারকো, পরঙ্কতং সুখং দুক্খং অঞ্ঞো করোতি অঞ্ঞো পটিসংৰেদেতীতি? ন হেৰং ৰত্তব্বে…পে॰…।
Paro parassa cittaṃ niggaṇhātīti? Āmantā. Añño aññassa kārako, paraṅkataṃ sukhaṃ dukkhaṃ añño karoti añño paṭisaṃvedetīti? Na hevaṃ vattabbe…pe….
পরো পরস্স চিত্তং নিগ্গণ্হাতীতি? আমন্তা। ননু ৰুত্তং ভগৰতা –
Paro parassa cittaṃ niggaṇhātīti? Āmantā. Nanu vuttaṃ bhagavatā –
‘‘অত্তনাৰ কতং পাপং, অত্তনা সংকিলিস্সতি।
‘‘Attanāva kataṃ pāpaṃ, attanā saṃkilissati;
অত্তনা অকতং পাপং, অত্তনাৰ ৰিসুজ্ঝতি।
Attanā akataṃ pāpaṃ, attanāva visujjhati;
সুদ্ধি অসুদ্ধি পচ্চত্তং, নাঞ্ঞো অঞ্ঞং ৰিসোধযে’’তি 1॥
Suddhi asuddhi paccattaṃ, nāñño aññaṃ visodhaye’’ti 2.
অত্থেৰ সুত্তন্তোতি? আমন্তা। তেন হি ন ৰত্তব্বং – ‘‘পরো পরস্স চিত্তং নিগ্গণ্হাতী’’তি।
Attheva suttantoti? Āmantā. Tena hi na vattabbaṃ – ‘‘paro parassa cittaṃ niggaṇhātī’’ti.
৭৪৪. ন ৰত্তব্বং – ‘‘পরো পরস্স চিত্তং নিগ্গণ্হাতী’’তি? আমন্তা। ননু অত্থি বলপ্পত্তা, অত্থি ৰসীভূতাতি? আমন্তা। হঞ্চি অত্থি বলপ্পত্তা, অত্থি ৰসীভূতা, তেন ৰত রে ৰত্তব্বে – ‘‘পরো পরস্স চিত্তং নিগ্গণ্হাতী’’তি।
744. Na vattabbaṃ – ‘‘paro parassa cittaṃ niggaṇhātī’’ti? Āmantā. Nanu atthi balappattā, atthi vasībhūtāti? Āmantā. Hañci atthi balappattā, atthi vasībhūtā, tena vata re vattabbe – ‘‘paro parassa cittaṃ niggaṇhātī’’ti.
নিগ্গহকথা নিট্ঠিতা।
Niggahakathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ১. নিগ্গহকথাৰণ্ণনা • 1. Niggahakathāvaṇṇanā
