| Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi |
༡༦. སོལ༹སམཝགྒོ
16. Soḷasamavaggo
(༡༥༦) ༡. ནིགྒཧཀཐཱ
(156) 1. Niggahakathā
༧༤༣. པརོ པརསྶ ཙིཏྟཾ ནིགྒཎྷཱཏཱིཏི? ཨཱམནྟཱ། པརོ པརསྶ ཙིཏྟཾ ‘‘མཱ རཛྫི’’, ‘‘མཱ དུསྶི’’, ‘‘མཱ མུཡ྄ཧི’’, ‘‘མཱ ཀིལིསྶཱི’’ཏི ནིགྒཎྷཱཏཱིཏི? ན ཧེཝཾ ཝཏྟབྦེ…པེ॰… པརོ པརསྶ ཙིཏྟཾ ནིགྒཎྷཱཏཱིཏི? ཨཱམནྟཱ། པརོ པརསྶ ཨུཔྤནྣོ ཕསྶོ ‘‘མཱ ནིརུཛ྄ཛྷཱི’’ཏི ནིགྒཎྷཱཏཱིཏི? ན ཧེཝཾ ཝཏྟབྦེ…པེ॰… པརོ པརསྶ ཨུཔྤནྣཱ ཝེདནཱ…པེ॰… ཨུཔྤནྣཱ སཉྙཱ… ཨུཔྤནྣཱ ཙེཏནཱ… ཨུཔྤནྣཾ ཙིཏྟཾ… ཨུཔྤནྣཱ སདྡྷཱ… ཨུཔྤནྣཾ ཝཱིརིཡཾ … ཨུཔྤནྣཱ སཏི… ཨུཔྤནྣོ སམཱདྷི…པེ॰… ཨུཔྤནྣཱ པཉྙཱ ‘‘མཱ ནིརུཛ྄ཛྷཱི’’ཏི ནིགྒཎྷཱཏཱིཏི? ན ཧེཝཾ ཝཏྟབྦེ…པེ॰…།
743. Paro parassa cittaṃ niggaṇhātīti? Āmantā. Paro parassa cittaṃ ‘‘mā rajji’’, ‘‘mā dussi’’, ‘‘mā muyhi’’, ‘‘mā kilissī’’ti niggaṇhātīti? Na hevaṃ vattabbe…pe… paro parassa cittaṃ niggaṇhātīti? Āmantā. Paro parassa uppanno phasso ‘‘mā nirujjhī’’ti niggaṇhātīti? Na hevaṃ vattabbe…pe… paro parassa uppannā vedanā…pe… uppannā saññā… uppannā cetanā… uppannaṃ cittaṃ… uppannā saddhā… uppannaṃ vīriyaṃ … uppannā sati… uppanno samādhi…pe… uppannā paññā ‘‘mā nirujjhī’’ti niggaṇhātīti? Na hevaṃ vattabbe…pe….
པརོ པརསྶ ཙིཏྟཾ ནིགྒཎྷཱཏཱིཏི? ཨཱམནྟཱ། པརོ པརསྶ ཨཏྠཱཡ རཱགཾ པཛཧཏི… དོསཾ པཛཧཏི…པེ॰… ཨནོཏྟཔྤཾ པཛཧཏཱིཏི? ན ཧེཝཾ ཝཏྟབྦེ…པེ॰…།
Paro parassa cittaṃ niggaṇhātīti? Āmantā. Paro parassa atthāya rāgaṃ pajahati… dosaṃ pajahati…pe… anottappaṃ pajahatīti? Na hevaṃ vattabbe…pe….
པརོ པརསྶ ཙིཏྟཾ ནིགྒཎྷཱཏཱིཏི? ཨཱམནྟཱ། པརོ པརསྶ ཨཏྠཱཡ མགྒཾ བྷཱཝེཏི… སཏིཔཊྛཱནཾ བྷཱཝེཏི…པེ॰… བོཛ྄ཛྷངྒཾ བྷཱཝེཏཱིཏི ? ན ཧེཝཾ ཝཏྟབྦེ…པེ॰…།
Paro parassa cittaṃ niggaṇhātīti? Āmantā. Paro parassa atthāya maggaṃ bhāveti… satipaṭṭhānaṃ bhāveti…pe… bojjhaṅgaṃ bhāvetīti ? Na hevaṃ vattabbe…pe….
པརོ པརསྶ ཙིཏྟཾ ནིགྒཎྷཱཏཱིཏི? ཨཱམནྟཱ། པརོ པརསྶ ཨཏྠཱཡ དུཀྑཾ པརིཛཱནཱཏི, སམུདཡཾ པཛཧཏི, ནིརོདྷཾ སཙྪིཀརོཏི, མགྒཾ བྷཱཝེཏཱིཏི? ན ཧེཝཾ ཝཏྟབྦེ…པེ॰…།
Paro parassa cittaṃ niggaṇhātīti? Āmantā. Paro parassa atthāya dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Na hevaṃ vattabbe…pe….
པརོ པརསྶ ཙིཏྟཾ ནིགྒཎྷཱཏཱིཏི? ཨཱམནྟཱ། ཨཉྙོ ཨཉྙསྶ ཀཱརཀོ, པརངྐཏཾ སུཁཾ དུཀྑཾ ཨཉྙོ ཀརོཏི ཨཉྙོ པཊིསཾཝེདེཏཱིཏི? ན ཧེཝཾ ཝཏྟབྦེ…པེ॰…།
Paro parassa cittaṃ niggaṇhātīti? Āmantā. Añño aññassa kārako, paraṅkataṃ sukhaṃ dukkhaṃ añño karoti añño paṭisaṃvedetīti? Na hevaṃ vattabbe…pe….
པརོ པརསྶ ཙིཏྟཾ ནིགྒཎྷཱཏཱིཏི? ཨཱམནྟཱ། ནནུ ཝུཏྟཾ བྷགཝཏཱ –
Paro parassa cittaṃ niggaṇhātīti? Āmantā. Nanu vuttaṃ bhagavatā –
‘‘ཨཏྟནཱཝ ཀཏཾ པཱཔཾ, ཨཏྟནཱ སཾཀིལིསྶཏི།
‘‘Attanāva kataṃ pāpaṃ, attanā saṃkilissati;
ཨཏྟནཱ ཨཀཏཾ པཱཔཾ, ཨཏྟནཱཝ ཝིསུཛ྄ཛྷཏི།
Attanā akataṃ pāpaṃ, attanāva visujjhati;
སུདྡྷི ཨསུདྡྷི པཙྩཏྟཾ, ནཱཉྙོ ཨཉྙཾ ཝིསོདྷཡེ’’ཏི 1༎
Suddhi asuddhi paccattaṃ, nāñño aññaṃ visodhaye’’ti 2.
ཨཏྠེཝ སུཏྟནྟོཏི? ཨཱམནྟཱ། ཏེན ཧི ན ཝཏྟབྦཾ – ‘‘པརོ པརསྶ ཙིཏྟཾ ནིགྒཎྷཱཏཱི’’ཏི།
Attheva suttantoti? Āmantā. Tena hi na vattabbaṃ – ‘‘paro parassa cittaṃ niggaṇhātī’’ti.
༧༤༤. ན ཝཏྟབྦཾ – ‘‘པརོ པརསྶ ཙིཏྟཾ ནིགྒཎྷཱཏཱི’’ཏི? ཨཱམནྟཱ། ནནུ ཨཏྠི བལཔྤཏྟཱ, ཨཏྠི ཝསཱིབྷཱུཏཱཏི? ཨཱམནྟཱ། ཧཉྩི ཨཏྠི བལཔྤཏྟཱ, ཨཏྠི ཝསཱིབྷཱུཏཱ, ཏེན ཝཏ རེ ཝཏྟབྦེ – ‘‘པརོ པརསྶ ཙིཏྟཾ ནིགྒཎྷཱཏཱི’’ཏི།
744. Na vattabbaṃ – ‘‘paro parassa cittaṃ niggaṇhātī’’ti? Āmantā. Nanu atthi balappattā, atthi vasībhūtāti? Āmantā. Hañci atthi balappattā, atthi vasībhūtā, tena vata re vattabbe – ‘‘paro parassa cittaṃ niggaṇhātī’’ti.
ནིགྒཧཀཐཱ ནིཊྛིཏཱ།
Niggahakathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༡. ནིགྒཧཀཐཱཝཎྞནཱ • 1. Niggahakathāvaṇṇanā
