| Library / Tipiṭaka / തിപിടക • Tipiṭaka / കഥാവത്ഥുപാളി • Kathāvatthupāḷi |
൧൬. സോളസമവഗ്ഗോ
16. Soḷasamavaggo
(൧൫൬) ൧. നിഗ്ഗഹകഥാ
(156) 1. Niggahakathā
൭൪൩. പരോ പരസ്സ ചിത്തം നിഗ്ഗണ്ഹാതീതി? ആമന്താ. പരോ പരസ്സ ചിത്തം ‘‘മാ രജ്ജി’’, ‘‘മാ ദുസ്സി’’, ‘‘മാ മുയ്ഹി’’, ‘‘മാ കിലിസ്സീ’’തി നിഗ്ഗണ്ഹാതീതി? ന ഹേവം വത്തബ്ബേ…പേ॰… പരോ പരസ്സ ചിത്തം നിഗ്ഗണ്ഹാതീതി? ആമന്താ. പരോ പരസ്സ ഉപ്പന്നോ ഫസ്സോ ‘‘മാ നിരുജ്ഝീ’’തി നിഗ്ഗണ്ഹാതീതി? ന ഹേവം വത്തബ്ബേ…പേ॰… പരോ പരസ്സ ഉപ്പന്നാ വേദനാ…പേ॰… ഉപ്പന്നാ സഞ്ഞാ… ഉപ്പന്നാ ചേതനാ… ഉപ്പന്നം ചിത്തം… ഉപ്പന്നാ സദ്ധാ… ഉപ്പന്നം വീരിയം … ഉപ്പന്നാ സതി… ഉപ്പന്നോ സമാധി…പേ॰… ഉപ്പന്നാ പഞ്ഞാ ‘‘മാ നിരുജ്ഝീ’’തി നിഗ്ഗണ്ഹാതീതി? ന ഹേവം വത്തബ്ബേ…പേ॰….
743. Paro parassa cittaṃ niggaṇhātīti? Āmantā. Paro parassa cittaṃ ‘‘mā rajji’’, ‘‘mā dussi’’, ‘‘mā muyhi’’, ‘‘mā kilissī’’ti niggaṇhātīti? Na hevaṃ vattabbe…pe… paro parassa cittaṃ niggaṇhātīti? Āmantā. Paro parassa uppanno phasso ‘‘mā nirujjhī’’ti niggaṇhātīti? Na hevaṃ vattabbe…pe… paro parassa uppannā vedanā…pe… uppannā saññā… uppannā cetanā… uppannaṃ cittaṃ… uppannā saddhā… uppannaṃ vīriyaṃ … uppannā sati… uppanno samādhi…pe… uppannā paññā ‘‘mā nirujjhī’’ti niggaṇhātīti? Na hevaṃ vattabbe…pe….
പരോ പരസ്സ ചിത്തം നിഗ്ഗണ്ഹാതീതി? ആമന്താ. പരോ പരസ്സ അത്ഥായ രാഗം പജഹതി… ദോസം പജഹതി…പേ॰… അനോത്തപ്പം പജഹതീതി? ന ഹേവം വത്തബ്ബേ…പേ॰….
Paro parassa cittaṃ niggaṇhātīti? Āmantā. Paro parassa atthāya rāgaṃ pajahati… dosaṃ pajahati…pe… anottappaṃ pajahatīti? Na hevaṃ vattabbe…pe….
പരോ പരസ്സ ചിത്തം നിഗ്ഗണ്ഹാതീതി? ആമന്താ. പരോ പരസ്സ അത്ഥായ മഗ്ഗം ഭാവേതി… സതിപട്ഠാനം ഭാവേതി…പേ॰… ബോജ്ഝങ്ഗം ഭാവേതീതി ? ന ഹേവം വത്തബ്ബേ…പേ॰….
Paro parassa cittaṃ niggaṇhātīti? Āmantā. Paro parassa atthāya maggaṃ bhāveti… satipaṭṭhānaṃ bhāveti…pe… bojjhaṅgaṃ bhāvetīti ? Na hevaṃ vattabbe…pe….
പരോ പരസ്സ ചിത്തം നിഗ്ഗണ്ഹാതീതി? ആമന്താ. പരോ പരസ്സ അത്ഥായ ദുക്ഖം പരിജാനാതി, സമുദയം പജഹതി, നിരോധം സച്ഛികരോതി, മഗ്ഗം ഭാവേതീതി? ന ഹേവം വത്തബ്ബേ…പേ॰….
Paro parassa cittaṃ niggaṇhātīti? Āmantā. Paro parassa atthāya dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Na hevaṃ vattabbe…pe….
പരോ പരസ്സ ചിത്തം നിഗ്ഗണ്ഹാതീതി? ആമന്താ. അഞ്ഞോ അഞ്ഞസ്സ കാരകോ, പരങ്കതം സുഖം ദുക്ഖം അഞ്ഞോ കരോതി അഞ്ഞോ പടിസംവേദേതീതി? ന ഹേവം വത്തബ്ബേ…പേ॰….
Paro parassa cittaṃ niggaṇhātīti? Āmantā. Añño aññassa kārako, paraṅkataṃ sukhaṃ dukkhaṃ añño karoti añño paṭisaṃvedetīti? Na hevaṃ vattabbe…pe….
പരോ പരസ്സ ചിത്തം നിഗ്ഗണ്ഹാതീതി? ആമന്താ. നനു വുത്തം ഭഗവതാ –
Paro parassa cittaṃ niggaṇhātīti? Āmantā. Nanu vuttaṃ bhagavatā –
‘‘അത്തനാവ കതം പാപം, അത്തനാ സംകിലിസ്സതി;
‘‘Attanāva kataṃ pāpaṃ, attanā saṃkilissati;
അത്തനാ അകതം പാപം, അത്തനാവ വിസുജ്ഝതി;
Attanā akataṃ pāpaṃ, attanāva visujjhati;
സുദ്ധി അസുദ്ധി പച്ചത്തം, നാഞ്ഞോ അഞ്ഞം വിസോധയേ’’തി 1.
Suddhi asuddhi paccattaṃ, nāñño aññaṃ visodhaye’’ti 2.
അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘പരോ പരസ്സ ചിത്തം നിഗ്ഗണ്ഹാതീ’’തി.
Attheva suttantoti? Āmantā. Tena hi na vattabbaṃ – ‘‘paro parassa cittaṃ niggaṇhātī’’ti.
൭൪൪. ന വത്തബ്ബം – ‘‘പരോ പരസ്സ ചിത്തം നിഗ്ഗണ്ഹാതീ’’തി? ആമന്താ. നനു അത്ഥി ബലപ്പത്താ, അത്ഥി വസീഭൂതാതി? ആമന്താ. ഹഞ്ചി അത്ഥി ബലപ്പത്താ, അത്ഥി വസീഭൂതാ, തേന വത രേ വത്തബ്ബേ – ‘‘പരോ പരസ്സ ചിത്തം നിഗ്ഗണ്ഹാതീ’’തി.
744. Na vattabbaṃ – ‘‘paro parassa cittaṃ niggaṇhātī’’ti? Āmantā. Nanu atthi balappattā, atthi vasībhūtāti? Āmantā. Hañci atthi balappattā, atthi vasībhūtā, tena vata re vattabbe – ‘‘paro parassa cittaṃ niggaṇhātī’’ti.
നിഗ്ഗഹകഥാ നിട്ഠിതാ.
Niggahakathā niṭṭhitā.
Footnotes:
Related texts:
അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / പഞ്ചപകരണ-അട്ഠകഥാ • Pañcapakaraṇa-aṭṭhakathā / ൧. നിഗ്ഗഹകഥാവണ്ണനാ • 1. Niggahakathāvaṇṇanā
