| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. நிஜ்ஜரஸுத்தவண்ணனா
6. Nijjarasuttavaṇṇanā
106. ச²ட்டே² நிஜ்ஜரவத்தூ²னீதி நிஜ்ஜரகாரணானி. மிச்சா²தி³ட்டி² நிஜ்ஜிண்ணா ஹோதீதி அயங் ஹெட்டா² விபஸ்ஸனாயபி நிஜ்ஜிண்ணா ஏவ பஹீனா. கஸ்மா புன க³ஹிதாதி? அஸமுச்சி²ன்னத்தா. விபஸ்ஸனாய ஹி கிஞ்சாபி நிஜ்ஜிண்ணா, ந பன ஸமுச்சி²ன்னா. மக்³கோ³ பன உப்பஜ்ஜித்வா தங் ஸமுச்சி²ந்த³தி, ந புன வுட்டா²துங் தே³தி. தஸ்மா புன க³ஹிதா. ஏவங் ஸப்³ப³பதே³ஸு யோஜேதப்³போ³. எத்த² ச ஸம்மாவிமுத்திபச்சயா சதுஸட்டி² த⁴ம்மா பா⁴வனாபாரிபூரிங் க³ச்ச²ந்தி. கதமே சதுஸட்டி²? ஸோதாபத்திமக்³க³க்க²ணே அதி⁴மொக்க²ட்டே²ன ஸத்³தி⁴ந்த்³ரியங் பரிபூரதி, பக்³க³ஹட்டே²ன வீரியிந்த்³ரியங், உபட்டா²னட்டே²ன ஸதிந்த்³ரியங், அவிக்கே²பட்டே²ன ஸமாதி⁴ந்த்³ரியங், த³ஸ்ஸனட்டே²ன பஞ்ஞிந்த்³ரியங் பரிபூரேதி, விஜானநட்டே²ன மனிந்த்³ரியங், அபி⁴னந்த³னட்டே²ன ஸோமனஸ்ஸிந்த்³ரியங், பவத்தஸந்ததிஆதி⁴பதெய்யட்டே²ன ஜீவிதிந்த்³ரியங் பரிபூரதி…பே॰… அரஹத்தப²லக்க²ணே அதி⁴மொக்க²ட்டே²ன ஸத்³தி⁴ந்த்³ரியங்…பே॰… பவத்தஸந்ததிஆதி⁴பதெய்யட்டே²ன ஜீவிதிந்த்³ரியங் பரிபூரதீதி ஏவங் சதூஸு ச மக்³கே³ஸு சதூஸு ச ப²லேஸு அட்ட²ட்ட² ஹுத்வா சதுஸட்டி² த⁴ம்மா பாரிபூரிங் க³ச்ச²ந்தி.
106. Chaṭṭhe nijjaravatthūnīti nijjarakāraṇāni. Micchādiṭṭhi nijjiṇṇā hotīti ayaṃ heṭṭhā vipassanāyapi nijjiṇṇā eva pahīnā. Kasmā puna gahitāti? Asamucchinnattā. Vipassanāya hi kiñcāpi nijjiṇṇā, na pana samucchinnā. Maggo pana uppajjitvā taṃ samucchindati, na puna vuṭṭhātuṃ deti. Tasmā puna gahitā. Evaṃ sabbapadesu yojetabbo. Ettha ca sammāvimuttipaccayā catusaṭṭhi dhammā bhāvanāpāripūriṃ gacchanti. Katame catusaṭṭhi? Sotāpattimaggakkhaṇe adhimokkhaṭṭhena saddhindriyaṃ paripūrati, paggahaṭṭhena vīriyindriyaṃ, upaṭṭhānaṭṭhena satindriyaṃ, avikkhepaṭṭhena samādhindriyaṃ, dassanaṭṭhena paññindriyaṃ paripūreti, vijānanaṭṭhena manindriyaṃ, abhinandanaṭṭhena somanassindriyaṃ, pavattasantatiādhipateyyaṭṭhena jīvitindriyaṃ paripūrati…pe… arahattaphalakkhaṇe adhimokkhaṭṭhena saddhindriyaṃ…pe… pavattasantatiādhipateyyaṭṭhena jīvitindriyaṃ paripūratīti evaṃ catūsu ca maggesu catūsu ca phalesu aṭṭhaṭṭha hutvā catusaṭṭhi dhammā pāripūriṃ gacchanti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. நிஜ்ஜரஸுத்தங் • 6. Nijjarasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-12. ஸமணஸஞ்ஞாஸுத்தாதி³வண்ணனா • 1-12. Samaṇasaññāsuttādivaṇṇanā
