| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๖. นิชฺชรสุตฺตวณฺณนา
6. Nijjarasuttavaṇṇanā
๑๐๖. ฉเฎฺฐ นิชฺชรวตฺถูนีติ นิชฺชรการณานิฯ มิจฺฉาทิฎฺฐิ นิชฺชิณฺณา โหตีติ อยํ เหฎฺฐา วิปสฺสนายปิ นิชฺชิณฺณา เอว ปหีนาฯ กสฺมา ปุน คหิตาติ? อสมุจฺฉินฺนตฺตาฯ วิปสฺสนาย หิ กิญฺจาปิ นิชฺชิณฺณา, น ปน สมุจฺฉินฺนาฯ มโคฺค ปน อุปฺปชฺชิตฺวา ตํ สมุจฺฉินฺทติ, น ปุน วุฎฺฐาตุํ เทติฯ ตสฺมา ปุน คหิตาฯ เอวํ สพฺพปเทสุ โยเชตโพฺพฯ เอตฺถ จ สมฺมาวิมุตฺติปจฺจยา จตุสฎฺฐิ ธมฺมา ภาวนาปาริปูริํ คจฺฉนฺติฯ กตเม จตุสฎฺฐิ? โสตาปตฺติมคฺคกฺขเณ อธิโมกฺขเฎฺฐน สทฺธินฺทฺริยํ ปริปูรติ, ปคฺคหเฎฺฐน วีริยินฺทฺริยํ, อุปฎฺฐานเฎฺฐน สตินฺทฺริยํ, อวิเกฺขปเฎฺฐน สมาธินฺทฺริยํ, ทสฺสนเฎฺฐน ปญฺญินฺทฺริยํ ปริปูเรติ, วิชานนเฎฺฐน มนินฺทฺริยํ, อภินนฺทนเฎฺฐน โสมนสฺสินฺทฺริยํ, ปวตฺตสนฺตติอาธิปเตยฺยเฎฺฐน ชีวิตินฺทฺริยํ ปริปูรติ…เป.… อรหตฺตผลกฺขเณ อธิโมกฺขเฎฺฐน สทฺธินฺทฺริยํ…เป.… ปวตฺตสนฺตติอาธิปเตยฺยเฎฺฐน ชีวิตินฺทฺริยํ ปริปูรตีติ เอวํ จตูสุ จ มเคฺคสุ จตูสุ จ ผเลสุ อฎฺฐฎฺฐ หุตฺวา จตุสฎฺฐิ ธมฺมา ปาริปูริํ คจฺฉนฺติฯ
106. Chaṭṭhe nijjaravatthūnīti nijjarakāraṇāni. Micchādiṭṭhi nijjiṇṇā hotīti ayaṃ heṭṭhā vipassanāyapi nijjiṇṇā eva pahīnā. Kasmā puna gahitāti? Asamucchinnattā. Vipassanāya hi kiñcāpi nijjiṇṇā, na pana samucchinnā. Maggo pana uppajjitvā taṃ samucchindati, na puna vuṭṭhātuṃ deti. Tasmā puna gahitā. Evaṃ sabbapadesu yojetabbo. Ettha ca sammāvimuttipaccayā catusaṭṭhi dhammā bhāvanāpāripūriṃ gacchanti. Katame catusaṭṭhi? Sotāpattimaggakkhaṇe adhimokkhaṭṭhena saddhindriyaṃ paripūrati, paggahaṭṭhena vīriyindriyaṃ, upaṭṭhānaṭṭhena satindriyaṃ, avikkhepaṭṭhena samādhindriyaṃ, dassanaṭṭhena paññindriyaṃ paripūreti, vijānanaṭṭhena manindriyaṃ, abhinandanaṭṭhena somanassindriyaṃ, pavattasantatiādhipateyyaṭṭhena jīvitindriyaṃ paripūrati…pe… arahattaphalakkhaṇe adhimokkhaṭṭhena saddhindriyaṃ…pe… pavattasantatiādhipateyyaṭṭhena jīvitindriyaṃ paripūratīti evaṃ catūsu ca maggesu catūsu ca phalesu aṭṭhaṭṭha hutvā catusaṭṭhi dhammā pāripūriṃ gacchanti.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๖. นิชฺชรสุตฺตํ • 6. Nijjarasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๑-๑๒. สมณสญฺญาสุตฺตาทิวณฺณนา • 1-12. Samaṇasaññāsuttādivaṇṇanā
