| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৮. নিকট্ঠসুত্তং
8. Nikaṭṭhasuttaṃ
১৩৮. ‘‘চত্তারোমে, ভিক্খৰে, পুগ্গলা সন্তো সংৰিজ্জমানা লোকস্মিং। কতমে চত্তারো? নিকট্ঠকাযো অনিকট্ঠচিত্তো, অনিকট্ঠকাযো নিকট্ঠচিত্তো, অনিকট্ঠকাযো চ অনিকট্ঠচিত্তো চ, নিকট্ঠকাযো চ নিকট্ঠচিত্তো চ।
138. ‘‘Cattārome, bhikkhave, puggalā santo saṃvijjamānā lokasmiṃ. Katame cattāro? Nikaṭṭhakāyo anikaṭṭhacitto, anikaṭṭhakāyo nikaṭṭhacitto, anikaṭṭhakāyo ca anikaṭṭhacitto ca, nikaṭṭhakāyo ca nikaṭṭhacitto ca.
‘‘কথঞ্চ, ভিক্খৰে, পুগ্গলো নিকট্ঠকাযো হোতি অনিকট্ঠচিত্তো? ইধ, ভিক্খৰে, একচ্চো পুগ্গলো অরঞ্ঞৰনপত্থানি 1 পন্তানি সেনাসনানি পটিসেৰতি। সো তত্থ কামৰিতক্কম্পি ৰিতক্কেতি ব্যাপাদৰিতক্কম্পি ৰিতক্কেতি ৰিহিংসাৰিতক্কম্পি ৰিতক্কেতি। এৰং খো, ভিক্খৰে, পুগ্গলো নিকট্ঠকাযো হোতি অনিকট্ঠচিত্তো।
‘‘Kathañca, bhikkhave, puggalo nikaṭṭhakāyo hoti anikaṭṭhacitto? Idha, bhikkhave, ekacco puggalo araññavanapatthāni 2 pantāni senāsanāni paṭisevati. So tattha kāmavitakkampi vitakketi byāpādavitakkampi vitakketi vihiṃsāvitakkampi vitakketi. Evaṃ kho, bhikkhave, puggalo nikaṭṭhakāyo hoti anikaṭṭhacitto.
‘‘কথঞ্চ, ভিক্খৰে, পুগ্গলো অনিকট্ঠকাযো হোতি নিকট্ঠচিত্তো? ইধ, ভিক্খৰে, একচ্চো পুগ্গলো নহেৰ খো অরঞ্ঞৰনপত্থানি পন্তানি সেনাসনানি পটিসেৰতি। সো তত্থ নেক্খম্মৰিতক্কম্পি ৰিতক্কেতি অব্যাপাদৰিতক্কম্পি ৰিতক্কেতি অৰিহিংসাৰিতক্কম্পি ৰিতক্কেতি। এৰং খো, ভিক্খৰে, পুগ্গলো অনিকট্ঠকাযো হোতি নিকট্ঠচিত্তো।
‘‘Kathañca, bhikkhave, puggalo anikaṭṭhakāyo hoti nikaṭṭhacitto? Idha, bhikkhave, ekacco puggalo naheva kho araññavanapatthāni pantāni senāsanāni paṭisevati. So tattha nekkhammavitakkampi vitakketi abyāpādavitakkampi vitakketi avihiṃsāvitakkampi vitakketi. Evaṃ kho, bhikkhave, puggalo anikaṭṭhakāyo hoti nikaṭṭhacitto.
‘‘কথঞ্চ, ভিক্খৰে, পুগ্গলো অনিকট্ঠকাযো চ হোতি অনিকট্ঠচিত্তো চ? ইধ, ভিক্খৰে, একচ্চো পুগ্গলো নহেৰ খো অরঞ্ঞৰনপত্থানি পন্তানি সেনাসনানি পটিসেৰতি । সো তত্থ কামৰিতক্কম্পি ৰিতক্কেতি ব্যাপাদৰিতক্কম্পি ৰিতক্কেতি ৰিহিংসাৰিতক্কম্পি ৰিতক্কেতি। এৰং খো, ভিক্খৰে, পুগ্গলো অনিকট্ঠকাযো চ হোতি অনিকট্ঠচিত্তো চ।
‘‘Kathañca, bhikkhave, puggalo anikaṭṭhakāyo ca hoti anikaṭṭhacitto ca? Idha, bhikkhave, ekacco puggalo naheva kho araññavanapatthāni pantāni senāsanāni paṭisevati . So tattha kāmavitakkampi vitakketi byāpādavitakkampi vitakketi vihiṃsāvitakkampi vitakketi. Evaṃ kho, bhikkhave, puggalo anikaṭṭhakāyo ca hoti anikaṭṭhacitto ca.
‘‘কথঞ্চ, ভিক্খৰে, পুগ্গলো নিকট্ঠকাযো চ হোতি নিকট্ঠচিত্তো চ? ইধ, ভিক্খৰে, একচ্চো পুগ্গলো অরঞ্ঞৰনপত্থানি পন্তানি সেনাসনানি পটিসেৰতি। সো তত্থ নেক্খম্মৰিতক্কম্পি ৰিতক্কেতি অব্যাপাদৰিতক্কম্পি ৰিতক্কেতি অৰিহিংসাৰিতক্কম্পি ৰিতক্কেতি। এৰং খো, ভিক্খৰে, পুগ্গলো নিকট্ঠকাযো চ হোতি নিকট্ঠচিত্তো চ। ইমে খো, ভিক্খৰে, চত্তারো পুগ্গলা সন্তো সংৰিজ্জমানা লোকস্মি’’ন্তি। অট্ঠমং।
‘‘Kathañca, bhikkhave, puggalo nikaṭṭhakāyo ca hoti nikaṭṭhacitto ca? Idha, bhikkhave, ekacco puggalo araññavanapatthāni pantāni senāsanāni paṭisevati. So tattha nekkhammavitakkampi vitakketi abyāpādavitakkampi vitakketi avihiṃsāvitakkampi vitakketi. Evaṃ kho, bhikkhave, puggalo nikaṭṭhakāyo ca hoti nikaṭṭhacitto ca. Ime kho, bhikkhave, cattāro puggalā santo saṃvijjamānā lokasmi’’nti. Aṭṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৮. নিকট্ঠসুত্তৰণ্ণনা • 8. Nikaṭṭhasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৫-৮. সাৰজ্জসুত্তাদিৰণ্ণনা • 5-8. Sāvajjasuttādivaṇṇanā
