| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
8. නිකට්‌ඨසුත්‌තං
8. Nikaṭṭhasuttaṃ
138. ‘‘චත්‌තාරොමෙ, භික්‌ඛවෙ, පුග්‌ගලා සන්‌තො සංවිජ්‌ජමානා ලොකස්‌මිං. කතමෙ චත්‌තාරො? නිකට්‌ඨකායො අනිකට්‌ඨචිත්‌තො, අනිකට්‌ඨකායො නිකට්‌ඨචිත්‌තො, අනිකට්‌ඨකායො ච අනිකට්‌ඨචිත්‌තො ච, නිකට්‌ඨකායො ච නිකට්‌ඨචිත්‌තො ච.
138. ‘‘Cattārome, bhikkhave, puggalā santo saṃvijjamānā lokasmiṃ. Katame cattāro? Nikaṭṭhakāyo anikaṭṭhacitto, anikaṭṭhakāyo nikaṭṭhacitto, anikaṭṭhakāyo ca anikaṭṭhacitto ca, nikaṭṭhakāyo ca nikaṭṭhacitto ca.
‘‘කථඤ්‌ච, භික්‌ඛවෙ, පුග්‌ගලො නිකට්‌ඨකායො හොති අනිකට්‌ඨචිත්‌තො? ඉධ, භික්‌ඛවෙ, එකච්‌චො පුග්‌ගලො අරඤ්‌ඤවනපත්‌ථානි 1 පන්‌තානි සෙනාසනානි පටිසෙවති. සො තත්‌ථ කාමවිතක්‌කම්‌පි විතක්‌කෙති බ්‍යාපාදවිතක්‌කම්‌පි විතක්‌කෙති විහිංසාවිතක්‌කම්‌පි විතක්‌කෙති. එවං ඛො, භික්‌ඛවෙ, පුග්‌ගලො නිකට්‌ඨකායො හොති අනිකට්‌ඨචිත්‌තො.
‘‘Kathañca, bhikkhave, puggalo nikaṭṭhakāyo hoti anikaṭṭhacitto? Idha, bhikkhave, ekacco puggalo araññavanapatthāni 2 pantāni senāsanāni paṭisevati. So tattha kāmavitakkampi vitakketi byāpādavitakkampi vitakketi vihiṃsāvitakkampi vitakketi. Evaṃ kho, bhikkhave, puggalo nikaṭṭhakāyo hoti anikaṭṭhacitto.
‘‘කථඤ්‌ච, භික්‌ඛවෙ, පුග්‌ගලො අනිකට්‌ඨකායො හොති නිකට්‌ඨචිත්‌තො? ඉධ, භික්‌ඛවෙ, එකච්‌චො පුග්‌ගලො නහෙව ඛො අරඤ්‌ඤවනපත්‌ථානි පන්‌තානි සෙනාසනානි පටිසෙවති. සො තත්‌ථ නෙක්‌ඛම්‌මවිතක්‌කම්‌පි විතක්‌කෙති අබ්‍යාපාදවිතක්‌කම්‌පි විතක්‌කෙති අවිහිංසාවිතක්‌කම්‌පි විතක්‌කෙති. එවං ඛො, භික්‌ඛවෙ, පුග්‌ගලො අනිකට්‌ඨකායො හොති නිකට්‌ඨචිත්‌තො.
‘‘Kathañca, bhikkhave, puggalo anikaṭṭhakāyo hoti nikaṭṭhacitto? Idha, bhikkhave, ekacco puggalo naheva kho araññavanapatthāni pantāni senāsanāni paṭisevati. So tattha nekkhammavitakkampi vitakketi abyāpādavitakkampi vitakketi avihiṃsāvitakkampi vitakketi. Evaṃ kho, bhikkhave, puggalo anikaṭṭhakāyo hoti nikaṭṭhacitto.
‘‘කථඤ්‌ච, භික්‌ඛවෙ, පුග්‌ගලො අනිකට්‌ඨකායො ච හොති අනිකට්‌ඨචිත්‌තො ච? ඉධ, භික්‌ඛවෙ, එකච්‌චො පුග්‌ගලො නහෙව ඛො අරඤ්‌ඤවනපත්‌ථානි පන්‌තානි සෙනාසනානි පටිසෙවති . සො තත්‌ථ කාමවිතක්‌කම්‌පි විතක්‌කෙති බ්‍යාපාදවිතක්‌කම්‌පි විතක්‌කෙති විහිංසාවිතක්‌කම්‌පි විතක්‌කෙති. එවං ඛො, භික්‌ඛවෙ, පුග්‌ගලො අනිකට්‌ඨකායො ච හොති අනිකට්‌ඨචිත්‌තො ච.
‘‘Kathañca, bhikkhave, puggalo anikaṭṭhakāyo ca hoti anikaṭṭhacitto ca? Idha, bhikkhave, ekacco puggalo naheva kho araññavanapatthāni pantāni senāsanāni paṭisevati . So tattha kāmavitakkampi vitakketi byāpādavitakkampi vitakketi vihiṃsāvitakkampi vitakketi. Evaṃ kho, bhikkhave, puggalo anikaṭṭhakāyo ca hoti anikaṭṭhacitto ca.
‘‘කථඤ්‌ච, භික්‌ඛවෙ, පුග්‌ගලො නිකට්‌ඨකායො ච හොති නිකට්‌ඨචිත්‌තො ච? ඉධ, භික්‌ඛවෙ, එකච්‌චො පුග්‌ගලො අරඤ්‌ඤවනපත්‌ථානි පන්‌තානි සෙනාසනානි පටිසෙවති. සො තත්‌ථ නෙක්‌ඛම්‌මවිතක්‌කම්‌පි විතක්‌කෙති අබ්‍යාපාදවිතක්‌කම්‌පි විතක්‌කෙති අවිහිංසාවිතක්‌කම්‌පි විතක්‌කෙති. එවං ඛො, භික්‌ඛවෙ, පුග්‌ගලො නිකට්‌ඨකායො ච හොති නිකට්‌ඨචිත්‌තො ච. ඉමෙ ඛො, භික්‌ඛවෙ, චත්‌තාරො පුග්‌ගලා සන්‌තො සංවිජ්‌ජමානා ලොකස්‌මි’’න්‌ති. අට්‌ඨමං.
‘‘Kathañca, bhikkhave, puggalo nikaṭṭhakāyo ca hoti nikaṭṭhacitto ca? Idha, bhikkhave, ekacco puggalo araññavanapatthāni pantāni senāsanāni paṭisevati. So tattha nekkhammavitakkampi vitakketi abyāpādavitakkampi vitakketi avihiṃsāvitakkampi vitakketi. Evaṃ kho, bhikkhave, puggalo nikaṭṭhakāyo ca hoti nikaṭṭhacitto ca. Ime kho, bhikkhave, cattāro puggalā santo saṃvijjamānā lokasmi’’nti. Aṭṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 8. නිකට්‌ඨසුත්‌තවණ්‌ණනා • 8. Nikaṭṭhasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 5-8. සාවජ්‌ජසුත්‌තාදිවණ්‌ණනා • 5-8. Sāvajjasuttādivaṇṇanā
