| Library / Tipiṭaka / തിപിടക • Tipiṭaka / അങ്ഗുത്തരനികായ • Aṅguttaranikāya |
൮. നികട്ഠസുത്തം
8. Nikaṭṭhasuttaṃ
൧൩൮. ‘‘ചത്താരോമേ, ഭിക്ഖവേ, പുഗ്ഗലാ സന്തോ സംവിജ്ജമാനാ ലോകസ്മിം. കതമേ ചത്താരോ? നികട്ഠകായോ അനികട്ഠചിത്തോ, അനികട്ഠകായോ നികട്ഠചിത്തോ, അനികട്ഠകായോ ച അനികട്ഠചിത്തോ ച, നികട്ഠകായോ ച നികട്ഠചിത്തോ ച.
138. ‘‘Cattārome, bhikkhave, puggalā santo saṃvijjamānā lokasmiṃ. Katame cattāro? Nikaṭṭhakāyo anikaṭṭhacitto, anikaṭṭhakāyo nikaṭṭhacitto, anikaṭṭhakāyo ca anikaṭṭhacitto ca, nikaṭṭhakāyo ca nikaṭṭhacitto ca.
‘‘കഥഞ്ച, ഭിക്ഖവേ, പുഗ്ഗലോ നികട്ഠകായോ ഹോതി അനികട്ഠചിത്തോ? ഇധ, ഭിക്ഖവേ, ഏകച്ചോ പുഗ്ഗലോ അരഞ്ഞവനപത്ഥാനി 1 പന്താനി സേനാസനാനി പടിസേവതി. സോ തത്ഥ കാമവിതക്കമ്പി വിതക്കേതി ബ്യാപാദവിതക്കമ്പി വിതക്കേതി വിഹിംസാവിതക്കമ്പി വിതക്കേതി. ഏവം ഖോ, ഭിക്ഖവേ, പുഗ്ഗലോ നികട്ഠകായോ ഹോതി അനികട്ഠചിത്തോ.
‘‘Kathañca, bhikkhave, puggalo nikaṭṭhakāyo hoti anikaṭṭhacitto? Idha, bhikkhave, ekacco puggalo araññavanapatthāni 2 pantāni senāsanāni paṭisevati. So tattha kāmavitakkampi vitakketi byāpādavitakkampi vitakketi vihiṃsāvitakkampi vitakketi. Evaṃ kho, bhikkhave, puggalo nikaṭṭhakāyo hoti anikaṭṭhacitto.
‘‘കഥഞ്ച, ഭിക്ഖവേ, പുഗ്ഗലോ അനികട്ഠകായോ ഹോതി നികട്ഠചിത്തോ? ഇധ, ഭിക്ഖവേ, ഏകച്ചോ പുഗ്ഗലോ നഹേവ ഖോ അരഞ്ഞവനപത്ഥാനി പന്താനി സേനാസനാനി പടിസേവതി. സോ തത്ഥ നേക്ഖമ്മവിതക്കമ്പി വിതക്കേതി അബ്യാപാദവിതക്കമ്പി വിതക്കേതി അവിഹിംസാവിതക്കമ്പി വിതക്കേതി. ഏവം ഖോ, ഭിക്ഖവേ, പുഗ്ഗലോ അനികട്ഠകായോ ഹോതി നികട്ഠചിത്തോ.
‘‘Kathañca, bhikkhave, puggalo anikaṭṭhakāyo hoti nikaṭṭhacitto? Idha, bhikkhave, ekacco puggalo naheva kho araññavanapatthāni pantāni senāsanāni paṭisevati. So tattha nekkhammavitakkampi vitakketi abyāpādavitakkampi vitakketi avihiṃsāvitakkampi vitakketi. Evaṃ kho, bhikkhave, puggalo anikaṭṭhakāyo hoti nikaṭṭhacitto.
‘‘കഥഞ്ച, ഭിക്ഖവേ, പുഗ്ഗലോ അനികട്ഠകായോ ച ഹോതി അനികട്ഠചിത്തോ ച? ഇധ, ഭിക്ഖവേ, ഏകച്ചോ പുഗ്ഗലോ നഹേവ ഖോ അരഞ്ഞവനപത്ഥാനി പന്താനി സേനാസനാനി പടിസേവതി . സോ തത്ഥ കാമവിതക്കമ്പി വിതക്കേതി ബ്യാപാദവിതക്കമ്പി വിതക്കേതി വിഹിംസാവിതക്കമ്പി വിതക്കേതി. ഏവം ഖോ, ഭിക്ഖവേ, പുഗ്ഗലോ അനികട്ഠകായോ ച ഹോതി അനികട്ഠചിത്തോ ച.
‘‘Kathañca, bhikkhave, puggalo anikaṭṭhakāyo ca hoti anikaṭṭhacitto ca? Idha, bhikkhave, ekacco puggalo naheva kho araññavanapatthāni pantāni senāsanāni paṭisevati . So tattha kāmavitakkampi vitakketi byāpādavitakkampi vitakketi vihiṃsāvitakkampi vitakketi. Evaṃ kho, bhikkhave, puggalo anikaṭṭhakāyo ca hoti anikaṭṭhacitto ca.
‘‘കഥഞ്ച, ഭിക്ഖവേ, പുഗ്ഗലോ നികട്ഠകായോ ച ഹോതി നികട്ഠചിത്തോ ച? ഇധ, ഭിക്ഖവേ, ഏകച്ചോ പുഗ്ഗലോ അരഞ്ഞവനപത്ഥാനി പന്താനി സേനാസനാനി പടിസേവതി. സോ തത്ഥ നേക്ഖമ്മവിതക്കമ്പി വിതക്കേതി അബ്യാപാദവിതക്കമ്പി വിതക്കേതി അവിഹിംസാവിതക്കമ്പി വിതക്കേതി. ഏവം ഖോ, ഭിക്ഖവേ, പുഗ്ഗലോ നികട്ഠകായോ ച ഹോതി നികട്ഠചിത്തോ ച. ഇമേ ഖോ, ഭിക്ഖവേ, ചത്താരോ പുഗ്ഗലാ സന്തോ സംവിജ്ജമാനാ ലോകസ്മി’’ന്തി. അട്ഠമം.
‘‘Kathañca, bhikkhave, puggalo nikaṭṭhakāyo ca hoti nikaṭṭhacitto ca? Idha, bhikkhave, ekacco puggalo araññavanapatthāni pantāni senāsanāni paṭisevati. So tattha nekkhammavitakkampi vitakketi abyāpādavitakkampi vitakketi avihiṃsāvitakkampi vitakketi. Evaṃ kho, bhikkhave, puggalo nikaṭṭhakāyo ca hoti nikaṭṭhacitto ca. Ime kho, bhikkhave, cattāro puggalā santo saṃvijjamānā lokasmi’’nti. Aṭṭhamaṃ.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) / ൮. നികട്ഠസുത്തവണ്ണനാ • 8. Nikaṭṭhasuttavaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൫-൮. സാവജ്ജസുത്താദിവണ്ണനാ • 5-8. Sāvajjasuttādivaṇṇanā
