| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
7. நிக்கட்³ட⁴னஸிக்கா²பத³வண்ணனா
7. Nikkaḍḍhanasikkhāpadavaṇṇanā
126. ஸத்தமஸிக்கா²பதே³ – ஏகேன பயோகே³ன ப³ஹுகேபி த்³வாரே அதிக்காமேதீதி யே சதுபூ⁴மகபஞ்சபூ⁴மகா பாஸாதா³ ச²ஸத்தகொட்ட²கானி வா சதுஸ்ஸாலானி, தாதி³ஸேஸு ஸேனாஸனேஸு ஹத்தே²ஸு வா கீ³வாய வா க³ஹெத்வா அந்தரா அட்ட²பெந்தோ ஏகேன பயோகே³ன அதிக்காமேதி, ஏகமேவ பாசித்தியங். ட²பெத்வா ட²பெத்வா நானாபயோகே³ஹி அதிக்காமெந்தஸ்ஸ த்³வாரக³ணனாய பாசித்தியானி. ஹத்தே²ன அனாமஸித்வா ‘‘நிக்க²மா’’தி வத்வா வாசாய நிக்கட்³ட⁴ந்தஸ்ஸாபி ஏஸேவ நயோ.
126. Sattamasikkhāpade – ekena payogena bahukepi dvāre atikkāmetīti ye catubhūmakapañcabhūmakā pāsādā chasattakoṭṭhakāni vā catussālāni, tādisesu senāsanesu hatthesu vā gīvāya vā gahetvā antarā aṭṭhapento ekena payogena atikkāmeti, ekameva pācittiyaṃ. Ṭhapetvā ṭhapetvā nānāpayogehi atikkāmentassa dvāragaṇanāya pācittiyāni. Hatthena anāmasitvā ‘‘nikkhamā’’ti vatvā vācāya nikkaḍḍhantassāpi eseva nayo.
அஞ்ஞங் ஆணாபேதீதி எத்த² ‘‘இமங் நிக்கட்³டா⁴’’தி ஆணத்திமத்தே து³க்கடங். ஸசே ஸோ ஸகிங் ஆணத்தோ ப³ஹுகேபி த்³வாரே அதிக்காமேதி, ஏகங் பாசித்தியங். ஸசே பன ‘‘எத்தகானி த்³வாரானி நிக்கட்³டா⁴ஹீ’’தி வா ‘‘யாவ மஹாத்³வாரங் தாவ நிக்கட்³டா⁴ஹீ’’தி வா ஏவங் நியாமெத்வா ஆணத்தோ ஹோதி, த்³வாரக³ணனாய பாசித்தியானி.
Aññaṃ āṇāpetīti ettha ‘‘imaṃ nikkaḍḍhā’’ti āṇattimatte dukkaṭaṃ. Sace so sakiṃ āṇatto bahukepi dvāre atikkāmeti, ekaṃ pācittiyaṃ. Sace pana ‘‘ettakāni dvārāni nikkaḍḍhāhī’’ti vā ‘‘yāva mahādvāraṃ tāva nikkaḍḍhāhī’’ti vā evaṃ niyāmetvā āṇatto hoti, dvāragaṇanāya pācittiyāni.
தஸ்ஸ பரிக்கா²ரந்தி யங்கிஞ்சி தஸ்ஸ ஸந்தகங் பத்தசீவரபரிஸ்ஸாவனத⁴மகரணமஞ்சபீட²பி⁴ஸிபி³ம்போ³ஹனாதி³பே⁴த³ங், அந்தமஸோ ரஜனச²ல்லிம்பி; யோ நிக்கட்³ட⁴தி வா நிக்கட்³டா⁴பேதி வா; தஸ்ஸ வத்து²க³ணனாய து³க்கடானி . கா³ள்ஹங் ப³ந்தி⁴த்வா ட²பிதேஸு பன ஏகாவ ஆபத்தீதி மஹாபச்சரியங் வுத்தங்.
Tassaparikkhāranti yaṃkiñci tassa santakaṃ pattacīvaraparissāvanadhamakaraṇamañcapīṭhabhisibimbohanādibhedaṃ, antamaso rajanachallimpi; yo nikkaḍḍhati vā nikkaḍḍhāpeti vā; tassa vatthugaṇanāya dukkaṭāni . Gāḷhaṃ bandhitvā ṭhapitesu pana ekāva āpattīti mahāpaccariyaṃ vuttaṃ.
127. அஞ்ஞஸ்ஸ புக்³க³லிகேதி இதா⁴பி விஸ்ஸாஸிகபுக்³க³லிகங் அத்தனோ புக்³க³லிகஸதி³ஸமேவ. யதா² ச இத⁴; ஏவங் ஸப்³ப³த்த². யத்ர பன விஸேஸோ ப⁴விஸ்ஸதி, தத்ர வக்கா²ம.
127.Aññassa puggaliketi idhāpi vissāsikapuggalikaṃ attano puggalikasadisameva. Yathā ca idha; evaṃ sabbattha. Yatra pana viseso bhavissati, tatra vakkhāma.
128. அலஜ்ஜிங் நிக்கட்³ட⁴தி வாதிஆதீ³ஸு ப⁴ண்ட³னகாரககலஹகாரகமேவ ஸகலஸங்கா⁴ராமதோ நிக்கட்³டி⁴துங் லப⁴தி, ஸோ ஹி பக்க²ங் லபி⁴த்வா ஸங்க⁴ம்பி பி⁴ந்தெ³ய்ய. அலஜ்ஜீஆத³யோ பன அத்தனோ வஸனட்டா²னதோயேவ நிக்கட்³டி⁴தப்³பா³, ஸகலஸங்கா⁴ராமதோ நிக்கட்³டி⁴துங் ந வட்டதி. உம்மத்தகஸ்ஸாதி ஸயங் உம்மத்தகஸ்ஸ அனாபத்தி. ஸேஸங் உத்தானமேவாதி.
128.Alajjiṃ nikkaḍḍhati vātiādīsu bhaṇḍanakārakakalahakārakameva sakalasaṅghārāmato nikkaḍḍhituṃ labhati, so hi pakkhaṃ labhitvā saṅghampi bhindeyya. Alajjīādayo pana attano vasanaṭṭhānatoyeva nikkaḍḍhitabbā, sakalasaṅghārāmato nikkaḍḍhituṃ na vaṭṭati. Ummattakassāti sayaṃ ummattakassa anāpatti. Sesaṃ uttānamevāti.
திஸமுட்டா²னங் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், து³க்க²வேத³னந்தி.
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
நிக்கட்³ட⁴னஸிக்கா²பத³ங் ஸத்தமங்.
Nikkaḍḍhanasikkhāpadaṃ sattamaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. பூ⁴தகா³மவக்³கோ³ • 2. Bhūtagāmavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 7. நிக்கட்³ட⁴னஸிக்கா²பத³வண்ணனா • 7. Nikkaḍḍhanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 7. நிக்கட்³ட⁴னஸிக்கா²பத³வண்ணனா • 7. Nikkaḍḍhanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 7. நிக்கட்³ட⁴னஸிக்கா²பத³வண்ணனா • 7. Nikkaḍḍhanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 7. நிக்கட்³ட⁴னஸிக்கா²பத³ங் • 7. Nikkaḍḍhanasikkhāpadaṃ
