| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৭. নিক্কড্ঢনসিক্খাপদৰণ্ণনা
7. Nikkaḍḍhanasikkhāpadavaṇṇanā
১২৬. সত্তমসিক্খাপদে – একেন পযোগেন বহুকেপি দ্ৰারে অতিক্কামেতীতি যে চতুভূমকপঞ্চভূমকা পাসাদা ছসত্তকোট্ঠকানি ৰা চতুস্সালানি, তাদিসেসু সেনাসনেসু হত্থেসু ৰা গীৰায ৰা গহেত্ৰা অন্তরা অট্ঠপেন্তো একেন পযোগেন অতিক্কামেতি, একমেৰ পাচিত্তিযং। ঠপেত্ৰা ঠপেত্ৰা নানাপযোগেহি অতিক্কামেন্তস্স দ্ৰারগণনায পাচিত্তিযানি। হত্থেন অনামসিত্ৰা ‘‘নিক্খমা’’তি ৰত্ৰা ৰাচায নিক্কড্ঢন্তস্সাপি এসেৰ নযো।
126. Sattamasikkhāpade – ekena payogena bahukepi dvāre atikkāmetīti ye catubhūmakapañcabhūmakā pāsādā chasattakoṭṭhakāni vā catussālāni, tādisesu senāsanesu hatthesu vā gīvāya vā gahetvā antarā aṭṭhapento ekena payogena atikkāmeti, ekameva pācittiyaṃ. Ṭhapetvā ṭhapetvā nānāpayogehi atikkāmentassa dvāragaṇanāya pācittiyāni. Hatthena anāmasitvā ‘‘nikkhamā’’ti vatvā vācāya nikkaḍḍhantassāpi eseva nayo.
অঞ্ঞং আণাপেতীতি এত্থ ‘‘ইমং নিক্কড্ঢা’’তি আণত্তিমত্তে দুক্কটং। সচে সো সকিং আণত্তো বহুকেপি দ্ৰারে অতিক্কামেতি, একং পাচিত্তিযং। সচে পন ‘‘এত্তকানি দ্ৰারানি নিক্কড্ঢাহী’’তি ৰা ‘‘যাৰ মহাদ্ৰারং তাৰ নিক্কড্ঢাহী’’তি ৰা এৰং নিযামেত্ৰা আণত্তো হোতি, দ্ৰারগণনায পাচিত্তিযানি।
Aññaṃ āṇāpetīti ettha ‘‘imaṃ nikkaḍḍhā’’ti āṇattimatte dukkaṭaṃ. Sace so sakiṃ āṇatto bahukepi dvāre atikkāmeti, ekaṃ pācittiyaṃ. Sace pana ‘‘ettakāni dvārāni nikkaḍḍhāhī’’ti vā ‘‘yāva mahādvāraṃ tāva nikkaḍḍhāhī’’ti vā evaṃ niyāmetvā āṇatto hoti, dvāragaṇanāya pācittiyāni.
তস্স পরিক্খারন্তি যংকিঞ্চি তস্স সন্তকং পত্তচীৰরপরিস্সাৰনধমকরণমঞ্চপীঠভিসিবিম্বোহনাদিভেদং, অন্তমসো রজনছল্লিম্পি; যো নিক্কড্ঢতি ৰা নিক্কড্ঢাপেতি ৰা; তস্স ৰত্থুগণনায দুক্কটানি । গাল়্হং বন্ধিত্ৰা ঠপিতেসু পন একাৰ আপত্তীতি মহাপচ্চরিযং ৰুত্তং।
Tassaparikkhāranti yaṃkiñci tassa santakaṃ pattacīvaraparissāvanadhamakaraṇamañcapīṭhabhisibimbohanādibhedaṃ, antamaso rajanachallimpi; yo nikkaḍḍhati vā nikkaḍḍhāpeti vā; tassa vatthugaṇanāya dukkaṭāni . Gāḷhaṃ bandhitvā ṭhapitesu pana ekāva āpattīti mahāpaccariyaṃ vuttaṃ.
১২৭. অঞ্ঞস্স পুগ্গলিকেতি ইধাপি ৰিস্সাসিকপুগ্গলিকং অত্তনো পুগ্গলিকসদিসমেৰ। যথা চ ইধ; এৰং সব্বত্থ। যত্র পন ৰিসেসো ভৰিস্সতি, তত্র ৰক্খাম।
127.Aññassa puggaliketi idhāpi vissāsikapuggalikaṃ attano puggalikasadisameva. Yathā ca idha; evaṃ sabbattha. Yatra pana viseso bhavissati, tatra vakkhāma.
১২৮. অলজ্জিং নিক্কড্ঢতি ৰাতিআদীসু ভণ্ডনকারককলহকারকমেৰ সকলসঙ্ঘারামতো নিক্কড্ঢিতুং লভতি, সো হি পক্খং লভিত্ৰা সঙ্ঘম্পি ভিন্দেয্য। অলজ্জীআদযো পন অত্তনো ৰসনট্ঠানতোযেৰ নিক্কড্ঢিতব্বা, সকলসঙ্ঘারামতো নিক্কড্ঢিতুং ন ৰট্টতি। উম্মত্তকস্সাতি সযং উম্মত্তকস্স অনাপত্তি। সেসং উত্তানমেৰাতি।
128.Alajjiṃ nikkaḍḍhati vātiādīsu bhaṇḍanakārakakalahakārakameva sakalasaṅghārāmato nikkaḍḍhituṃ labhati, so hi pakkhaṃ labhitvā saṅghampi bhindeyya. Alajjīādayo pana attano vasanaṭṭhānatoyeva nikkaḍḍhitabbā, sakalasaṅghārāmato nikkaḍḍhituṃ na vaṭṭati. Ummattakassāti sayaṃ ummattakassa anāpatti. Sesaṃ uttānamevāti.
তিসমুট্ঠানং – কাযচিত্ততো ৰাচাচিত্ততো কাযৰাচাচিত্ততো চ সমুট্ঠাতি, কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দুক্খৰেদনন্তি।
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
নিক্কড্ঢনসিক্খাপদং সত্তমং।
Nikkaḍḍhanasikkhāpadaṃ sattamaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ২. ভূতগামৰগ্গো • 2. Bhūtagāmavaggo
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৭. নিক্কড্ঢনসিক্খাপদৰণ্ণনা • 7. Nikkaḍḍhanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৭. নিক্কড্ঢনসিক্খাপদৰণ্ণনা • 7. Nikkaḍḍhanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৭. নিক্কড্ঢনসিক্খাপদৰণ্ণনা • 7. Nikkaḍḍhanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৭. নিক্কড্ঢনসিক্খাপদং • 7. Nikkaḍḍhanasikkhāpadaṃ
