| Library / Tipiṭaka / តិបិដក • Tipiṭaka / កង្ខាវិតរណី-អភិនវ-ដីកា • Kaṅkhāvitaraṇī-abhinava-ṭīkā |
៧. និក្កឌ្ឍនសិក្ខាបទវណ្ណនា
7. Nikkaḍḍhanasikkhāpadavaṇṇanā
អនេកកោដ្ឋកានីតិ អនេកទ្វារកោដ្ឋកានិ។ ‘‘និក្ខមាតិ វចនំ សុត្វា អត្តនោ រុចិយា ចេ និក្ខមតិ, អនាបត្តី’’តិ (សារត្ថ. ដី. បាចិត្តិយ ១២៦) វទន្តិ។
Anekakoṭṭhakānīti anekadvārakoṭṭhakāni. ‘‘Nikkhamāti vacanaṃ sutvā attano ruciyā ce nikkhamati, anāpattī’’ti (sārattha. ṭī. pācittiya 126) vadanti.
តស្ស បរិក្ខារនិក្កឌ្ឍនេតិ តស្ស សន្តកំ យំ កិញ្ចិ បត្តចីវរបរិស្សាវនធម្មករណមញ្ចបីឋភិសិពិព្ពោហនាទិភេទំ អន្តមសោ រជនឆល្លិបិ អត្ថិ, តស្ស បរិក្ខារស្ស និក្កឌ្ឍនេ។ តញ្ចាតិ ទុក្កដំ បរាមសតិ។ និក្កឌ្ឍាបនេបិ ឯសេវ នយោ។ គាឡ្ហំ ពន្ធិត្វា ឋបិតេសុ បន ឯកាវ អាបត្តិ។
Tassaparikkhāranikkaḍḍhaneti tassa santakaṃ yaṃ kiñci pattacīvaraparissāvanadhammakaraṇamañcapīṭhabhisibibbohanādibhedaṃ antamaso rajanachallipi atthi, tassa parikkhārassa nikkaḍḍhane. Tañcāti dukkaṭaṃ parāmasati. Nikkaḍḍhāpanepi eseva nayo. Gāḷhaṃ bandhitvā ṭhapitesu pana ekāva āpatti.
ភណ្ឌនការកកលហការកមេវ សកលសង្ឃារាមតោ និក្កឌ្ឍិតុំ លភតិ។ សោ ហិ បក្ខំ លភិត្វា សង្ឃម្បិ ភិន្ទេយ្យ។ អលជ្ជិអាទយោ បន អត្តនោ វសនដ្ឋានតោយេវ និក្កឌ្ឍិតព្ពា។ សកលសង្ឃារាមតោ និក្កឌ្ឍិតុំ ន វដ្ដតិ។ តេនាហ ‘‘សកលសង្ឃារាមតោបី’’តិអាទិ។
Bhaṇḍanakārakakalahakārakameva sakalasaṅghārāmato nikkaḍḍhituṃ labhati. So hi pakkhaṃ labhitvā saṅghampi bhindeyya. Alajjiādayo pana attano vasanaṭṭhānatoyeva nikkaḍḍhitabbā. Sakalasaṅghārāmato nikkaḍḍhituṃ na vaṭṭati. Tenāha ‘‘sakalasaṅghārāmatopī’’tiādi.
និក្កឌ្ឍនសិក្ខាបទវណ្ណនា និដ្ឋិតា។
Nikkaḍḍhanasikkhāpadavaṇṇanā niṭṭhitā.
