| Library / Tipiṭaka / တိပိဋက • Tipiṭaka / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā |
၇. နိက္ကဍ္ဎနသိက္ခာပဒဝဏ္ဏနာ
7. Nikkaḍḍhanasikkhāpadavaṇṇanā
၁၂၆. သတ္တမသိက္ခာပဒေ – ဧကေန ပယောဂေန ဗဟုကေပိ ဒ္ဝာရေ အတိက္ကာမေတီတိ ယေ စတုဘူမကပဉ္စဘူမကာ ပာသာဒာ ဆသတ္တကောဋ္ဌကာနိ ဝာ စတုသ္သာလာနိ, တာဒိသေသု သေနာသနေသု ဟတ္ထေသု ဝာ ဂီဝာယ ဝာ ဂဟေတ္ဝာ အန္တရာ အဋ္ဌပေန္တော ဧကေန ပယောဂေန အတိက္ကာမေတိ, ဧကမေဝ ပာစိတ္တိယံ။ ဌပေတ္ဝာ ဌပေတ္ဝာ နာနာပယောဂေဟိ အတိက္ကာမေန္တသ္သ ဒ္ဝာရဂဏနာယ ပာစိတ္တိယာနိ။ ဟတ္ထေန အနာမသိတ္ဝာ ‘‘နိက္ခမာ’’တိ ဝတ္ဝာ ဝာစာယ နိက္ကဍ္ဎန္တသ္သာပိ ဧသေဝ နယော။
126. Sattamasikkhāpade – ekena payogena bahukepi dvāre atikkāmetīti ye catubhūmakapañcabhūmakā pāsādā chasattakoṭṭhakāni vā catussālāni, tādisesu senāsanesu hatthesu vā gīvāya vā gahetvā antarā aṭṭhapento ekena payogena atikkāmeti, ekameva pācittiyaṃ. Ṭhapetvā ṭhapetvā nānāpayogehi atikkāmentassa dvāragaṇanāya pācittiyāni. Hatthena anāmasitvā ‘‘nikkhamā’’ti vatvā vācāya nikkaḍḍhantassāpi eseva nayo.
အညံ အာဏာပေတီတိ ဧတ္ထ ‘‘ဣမံ နိက္ကဍ္ဎာ’’တိ အာဏတ္တိမတ္တေ ဒုက္ကဋံ။ သစေ သော သကိံ အာဏတ္တော ဗဟုကေပိ ဒ္ဝာရေ အတိက္ကာမေတိ, ဧကံ ပာစိတ္တိယံ။ သစေ ပန ‘‘ဧတ္တကာနိ ဒ္ဝာရာနိ နိက္ကဍ္ဎာဟီ’’တိ ဝာ ‘‘ယာဝ မဟာဒ္ဝာရံ တာဝ နိက္ကဍ္ဎာဟီ’’တိ ဝာ ဧဝံ နိယာမေတ္ဝာ အာဏတ္တော ဟောတိ, ဒ္ဝာရဂဏနာယ ပာစိတ္တိယာနိ။
Aññaṃ āṇāpetīti ettha ‘‘imaṃ nikkaḍḍhā’’ti āṇattimatte dukkaṭaṃ. Sace so sakiṃ āṇatto bahukepi dvāre atikkāmeti, ekaṃ pācittiyaṃ. Sace pana ‘‘ettakāni dvārāni nikkaḍḍhāhī’’ti vā ‘‘yāva mahādvāraṃ tāva nikkaḍḍhāhī’’ti vā evaṃ niyāmetvā āṇatto hoti, dvāragaṇanāya pācittiyāni.
တသ္သ ပရိက္ခာရန္တိ ယံကိဉ္စိ တသ္သ သန္တကံ ပတ္တစီဝရပရိသ္သာဝနဓမကရဏမဉ္စပီဌဘိသိဗိမ္ဗောဟနာဒိဘေဒံ, အန္တမသော ရဇနဆလ္လိမ္ပိ; ယော နိက္ကဍ္ဎတိ ဝာ နိက္ကဍ္ဎာပေတိ ဝာ; တသ္သ ဝတ္ထုဂဏနာယ ဒုက္ကဋာနိ ။ ဂာဠ္ဟံ ဗန္ဓိတ္ဝာ ဌပိတေသု ပန ဧကာဝ အာပတ္တီတိ မဟာပစ္စရိယံ ဝုတ္တံ။
Tassaparikkhāranti yaṃkiñci tassa santakaṃ pattacīvaraparissāvanadhamakaraṇamañcapīṭhabhisibimbohanādibhedaṃ, antamaso rajanachallimpi; yo nikkaḍḍhati vā nikkaḍḍhāpeti vā; tassa vatthugaṇanāya dukkaṭāni . Gāḷhaṃ bandhitvā ṭhapitesu pana ekāva āpattīti mahāpaccariyaṃ vuttaṃ.
၁၂၇. အညသ္သ ပုဂ္ဂလိကေတိ ဣဓာပိ ဝိသ္သာသိကပုဂ္ဂလိကံ အတ္တနော ပုဂ္ဂလိကသဒိသမေဝ။ ယထာ စ ဣဓ; ဧဝံ သဗ္ဗတ္ထ။ ယတ္ရ ပန ဝိသေသော ဘဝိသ္သတိ, တတ္ရ ဝက္ခာမ။
127.Aññassa puggaliketi idhāpi vissāsikapuggalikaṃ attano puggalikasadisameva. Yathā ca idha; evaṃ sabbattha. Yatra pana viseso bhavissati, tatra vakkhāma.
၁၂၈. အလဇ္ဇိံ နိက္ကဍ္ဎတိ ဝာတိအာဒီသု ဘဏ္ဍနကာရကကလဟကာရကမေဝ သကလသင္ဃာရာမတော နိက္ကဍ္ဎိတုံ လဘတိ, သော ဟိ ပက္ခံ လဘိတ္ဝာ သင္ဃမ္ပိ ဘိန္ဒေယ္ယ။ အလဇ္ဇီအာဒယော ပန အတ္တနော ဝသနဋ္ဌာနတောယေဝ နိက္ကဍ္ဎိတဗ္ဗာ, သကလသင္ဃာရာမတော နိက္ကဍ္ဎိတုံ န ဝဋ္ဋတိ။ ဥမ္မတ္တကသ္သာတိ သယံ ဥမ္မတ္တကသ္သ အနာပတ္တိ။ သေသံ ဥတ္တာနမေဝာတိ။
128.Alajjiṃ nikkaḍḍhati vātiādīsu bhaṇḍanakārakakalahakārakameva sakalasaṅghārāmato nikkaḍḍhituṃ labhati, so hi pakkhaṃ labhitvā saṅghampi bhindeyya. Alajjīādayo pana attano vasanaṭṭhānatoyeva nikkaḍḍhitabbā, sakalasaṅghārāmato nikkaḍḍhituṃ na vaṭṭati. Ummattakassāti sayaṃ ummattakassa anāpatti. Sesaṃ uttānamevāti.
တိသမုဋ္ဌာနံ – ကာယစိတ္တတော ဝာစာစိတ္တတော ကာယဝာစာစိတ္တတော စ သမုဋ္ဌာတိ, ကိရိယံ, သညာဝိမောက္ခံ, သစိတ္တကံ, လောကဝဇ္ဇံ, ကာယကမ္မံ, ဝစီကမ္မံ, အကုသလစိတ္တံ, ဒုက္ခဝေဒနန္တိ။
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
နိက္ကဍ္ဎနသိက္ခာပဒံ သတ္တမံ။
Nikkaḍḍhanasikkhāpadaṃ sattamaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၂. ဘူတဂာမဝဂ္ဂော • 2. Bhūtagāmavaggo
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၇. နိက္ကဍ္ဎနသိက္ခာပဒဝဏ္ဏနာ • 7. Nikkaḍḍhanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၇. နိက္ကဍ္ဎနသိက္ခာပဒဝဏ္ဏနာ • 7. Nikkaḍḍhanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၇. နိက္ကဍ္ဎနသိက္ခာပဒဝဏ္ဏနာ • 7. Nikkaḍḍhanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၇. နိက္ကဍ္ဎနသိက္ခာပဒံ • 7. Nikkaḍḍhanasikkhāpadaṃ
