| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
7. නික්‌කඩ්‌ඪනසික්‌ඛාපදවණ්‌ණනා
7. Nikkaḍḍhanasikkhāpadavaṇṇanā
126. සත්‌තමසික්‌ඛාපදෙ – එකෙන පයොගෙන බහුකෙපි ද්‌වාරෙ අතික්‌කාමෙතීති යෙ චතුභූමකපඤ්‌චභූමකා පාසාදා ඡසත්‌තකොට්‌ඨකානි වා චතුස්‌සාලානි, තාදිසෙසු සෙනාසනෙසු හත්‌ථෙසු වා ගීවාය වා ගහෙත්‌වා අන්‌තරා අට්‌ඨපෙන්‌තො එකෙන පයොගෙන අතික්‌කාමෙති, එකමෙව පාචිත්‌තියං. ඨපෙත්‌වා ඨපෙත්‌වා නානාපයොගෙහි අතික්‌කාමෙන්‌තස්‌ස ද්‌වාරගණනාය පාචිත්‌තියානි. හත්‌ථෙන අනාමසිත්‌වා ‘‘නික්‌ඛමා’’ති වත්‌වා වාචාය නික්‌කඩ්‌ඪන්‌තස්‌සාපි එසෙව නයො.
126. Sattamasikkhāpade – ekena payogena bahukepi dvāre atikkāmetīti ye catubhūmakapañcabhūmakā pāsādā chasattakoṭṭhakāni vā catussālāni, tādisesu senāsanesu hatthesu vā gīvāya vā gahetvā antarā aṭṭhapento ekena payogena atikkāmeti, ekameva pācittiyaṃ. Ṭhapetvā ṭhapetvā nānāpayogehi atikkāmentassa dvāragaṇanāya pācittiyāni. Hatthena anāmasitvā ‘‘nikkhamā’’ti vatvā vācāya nikkaḍḍhantassāpi eseva nayo.
අඤ්‌ඤං ආණාපෙතීති එත්‌ථ ‘‘ඉමං නික්‌කඩ්‌ඪා’’ති ආණත්‌තිමත්‌තෙ දුක්‌කටං. සචෙ සො සකිං ආණත්‌තො බහුකෙපි ද්‌වාරෙ අතික්‌කාමෙති, එකං පාචිත්‌තියං. සචෙ පන ‘‘එත්‌තකානි ද්‌වාරානි නික්‌කඩ්‌ඪාහී’’ති වා ‘‘යාව මහාද්‌වාරං තාව නික්‌කඩ්‌ඪාහී’’ති වා එවං නියාමෙත්‌වා ආණත්‌තො හොති, ද්‌වාරගණනාය පාචිත්‌තියානි.
Aññaṃ āṇāpetīti ettha ‘‘imaṃ nikkaḍḍhā’’ti āṇattimatte dukkaṭaṃ. Sace so sakiṃ āṇatto bahukepi dvāre atikkāmeti, ekaṃ pācittiyaṃ. Sace pana ‘‘ettakāni dvārāni nikkaḍḍhāhī’’ti vā ‘‘yāva mahādvāraṃ tāva nikkaḍḍhāhī’’ti vā evaṃ niyāmetvā āṇatto hoti, dvāragaṇanāya pācittiyāni.
තස්‌ස පරික්‌ඛාරන්‌ති යංකිඤ්‌චි තස්‌ස සන්‌තකං පත්‌තචීවරපරිස්‌සාවනධමකරණමඤ්‌චපීඨභිසිබිම්‌බොහනාදිභෙදං, අන්‌තමසො රජනඡල්‌ලිම්‌පි; යො නික්‌කඩ්‌ඪති වා නික්‌කඩ්‌ඪාපෙති වා; තස්‌ස වත්‌ථුගණනාය දුක්‌කටානි . ගාළ්‌හං බන්‌ධිත්‌වා ඨපිතෙසු පන එකාව ආපත්‌තීති මහාපච්‌චරියං වුත්‌තං.
Tassaparikkhāranti yaṃkiñci tassa santakaṃ pattacīvaraparissāvanadhamakaraṇamañcapīṭhabhisibimbohanādibhedaṃ, antamaso rajanachallimpi; yo nikkaḍḍhati vā nikkaḍḍhāpeti vā; tassa vatthugaṇanāya dukkaṭāni . Gāḷhaṃ bandhitvā ṭhapitesu pana ekāva āpattīti mahāpaccariyaṃ vuttaṃ.
127. අඤ්‌ඤස්‌ස පුග්‌ගලිකෙති ඉධාපි විස්‌සාසිකපුග්‌ගලිකං අත්‌තනො පුග්‌ගලිකසදිසමෙව. යථා ච ඉධ; එවං සබ්‌බත්‌ථ. යත්‍ර පන විසෙසො භවිස්‌සති, තත්‍ර වක්‌ඛාම.
127.Aññassa puggaliketi idhāpi vissāsikapuggalikaṃ attano puggalikasadisameva. Yathā ca idha; evaṃ sabbattha. Yatra pana viseso bhavissati, tatra vakkhāma.
128. අලජ්‌ජිං නික්‌කඩ්‌ඪති වාතිආදීසු භණ්‌ඩනකාරකකලහකාරකමෙව සකලසඞ්‌ඝාරාමතො නික්‌කඩ්‌ඪිතුං ලභති, සො හි පක්‌ඛං ලභිත්‌වා සඞ්‌ඝම්‌පි භින්‌දෙය්‍ය. අලජ්‌ජීආදයො පන අත්‌තනො වසනට්‌ඨානතොයෙව නික්‌කඩ්‌ඪිතබ්‌බා, සකලසඞ්‌ඝාරාමතො නික්‌කඩ්‌ඪිතුං න වට්‌ටති. උම්‌මත්‌තකස්‌සාති සයං උම්‌මත්‌තකස්‌ස අනාපත්‌ති. සෙසං උත්‌තානමෙවාති.
128.Alajjiṃ nikkaḍḍhati vātiādīsu bhaṇḍanakārakakalahakārakameva sakalasaṅghārāmato nikkaḍḍhituṃ labhati, so hi pakkhaṃ labhitvā saṅghampi bhindeyya. Alajjīādayo pana attano vasanaṭṭhānatoyeva nikkaḍḍhitabbā, sakalasaṅghārāmato nikkaḍḍhituṃ na vaṭṭati. Ummattakassāti sayaṃ ummattakassa anāpatti. Sesaṃ uttānamevāti.
තිසමුට්‌ඨානං – කායචිත්‌තතො වාචාචිත්‌තතො කායවාචාචිත්‌තතො ච සමුට්‌ඨාති, කිරියං, සඤ්‌ඤාවිමොක්‌ඛං, සචිත්‌තකං, ලොකවජ්‌ජං, කායකම්‌මං, වචීකම්‌මං, අකුසලචිත්‌තං, දුක්‌ඛවෙදනන්‌ති.
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
නික්‌කඩ්‌ඪනසික්‌ඛාපදං සත්‌තමං.
Nikkaḍḍhanasikkhāpadaṃ sattamaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 2. භූතගාමවග්‌ගො • 2. Bhūtagāmavaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 7. නික්‌කඩ්‌ඪනසික්‌ඛාපදවණ්‌ණනා • 7. Nikkaḍḍhanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 7. නික්‌කඩ්‌ඪනසික්‌ඛාපදවණ්‌ණනා • 7. Nikkaḍḍhanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 7. නික්‌කඩ්‌ඪනසික්‌ඛාපදවණ්‌ණනා • 7. Nikkaḍḍhanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 7. නික්‌කඩ්‌ඪනසික්‌ඛාපදං • 7. Nikkaḍḍhanasikkhāpadaṃ
