| Library / Tipiṭaka / තිපිටක • Tipiṭaka / කඞ්‌ඛාවිතරණී-අභිනව-ටීකා • Kaṅkhāvitaraṇī-abhinava-ṭīkā |
7. නික්‌කඩ්‌ඪනසික්‌ඛාපදවණ්‌ණනා
7. Nikkaḍḍhanasikkhāpadavaṇṇanā
අනෙකකොට්‌ඨකානීති අනෙකද්‌වාරකොට්‌ඨකානි. ‘‘නික්‌ඛමාති වචනං සුත්‌වා අත්‌තනො රුචියා චෙ නික්‌ඛමති, අනාපත්‌තී’’ති (සාරත්‌ථ. ටී. පාචිත්‌තිය 126) වදන්‌ති.
Anekakoṭṭhakānīti anekadvārakoṭṭhakāni. ‘‘Nikkhamāti vacanaṃ sutvā attano ruciyā ce nikkhamati, anāpattī’’ti (sārattha. ṭī. pācittiya 126) vadanti.
තස්‌ස පරික්‌ඛාරනික්‌කඩ්‌ඪනෙති තස්‌ස සන්‌තකං යං කිඤ්‌චි පත්‌තචීවරපරිස්‌සාවනධම්‌මකරණමඤ්‌චපීඨභිසිබිබ්‌බොහනාදිභෙදං අන්‌තමසො රජනඡල්‌ලිපි අත්‌ථි, තස්‌ස පරික්‌ඛාරස්‌ස නික්‌කඩ්‌ඪනෙ. තඤ්‌චාති දුක්‌කටං පරාමසති. නික්‌කඩ්‌ඪාපනෙපි එසෙව නයො. ගාළ්‌හං බන්‌ධිත්‌වා ඨපිතෙසු පන එකාව ආපත්‌ති.
Tassaparikkhāranikkaḍḍhaneti tassa santakaṃ yaṃ kiñci pattacīvaraparissāvanadhammakaraṇamañcapīṭhabhisibibbohanādibhedaṃ antamaso rajanachallipi atthi, tassa parikkhārassa nikkaḍḍhane. Tañcāti dukkaṭaṃ parāmasati. Nikkaḍḍhāpanepi eseva nayo. Gāḷhaṃ bandhitvā ṭhapitesu pana ekāva āpatti.
භණ්‌ඩනකාරකකලහකාරකමෙව සකලසඞ්‌ඝාරාමතො නික්‌කඩ්‌ඪිතුං ලභති. සො හි පක්‌ඛං ලභිත්‌වා සඞ්‌ඝම්‌පි භින්‌දෙය්‍ය. අලජ්‌ජිආදයො පන අත්‌තනො වසනට්‌ඨානතොයෙව නික්‌කඩ්‌ඪිතබ්‌බා. සකලසඞ්‌ඝාරාමතො නික්‌කඩ්‌ඪිතුං න වට්‌ටති. තෙනාහ ‘‘සකලසඞ්‌ඝාරාමතොපී’’තිආදි.
Bhaṇḍanakārakakalahakārakameva sakalasaṅghārāmato nikkaḍḍhituṃ labhati. So hi pakkhaṃ labhitvā saṅghampi bhindeyya. Alajjiādayo pana attano vasanaṭṭhānatoyeva nikkaḍḍhitabbā. Sakalasaṅghārāmato nikkaḍḍhituṃ na vaṭṭati. Tenāha ‘‘sakalasaṅghārāmatopī’’tiādi.
නික්‌කඩ්‌ඪනසික්‌ඛාපදවණ්‌ණනා නිට්‌ඨිතා.
Nikkaḍḍhanasikkhāpadavaṇṇanā niṭṭhitā.
