| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. வங்கீ³ஸஸங்யுத்தங்
8. Vaṅgīsasaṃyuttaṃ
1. நிக்க²ந்தஸுத்தங்
1. Nikkhantasuttaṃ
209. ஏவங் மே ஸுதங் – ஏகங் ஸமயங் ஆயஸ்மா வங்கீ³ஸோ ஆளவியங் விஹரதி அக்³கா³ளவே சேதியே ஆயஸ்மதா நிக்³ரோத⁴கப்பேன உபஜ்ஜா²யேன ஸத்³தி⁴ங். தேன கோ² பன ஸமயேன ஆயஸ்மா வங்கீ³ஸோ நவகோ ஹோதி அசிரபப்³ப³ஜிதோ ஓஹிய்யகோ விஹாரபாலோ. அத² கோ² ஸம்ப³ஹுலா இத்தி²யோ ஸமலங்கரித்வா யேன அக்³கா³ளவகோ ஆராமோ தேனுபஸங்கமிங்ஸு விஹாரபெக்கி²காயோ. அத² கோ² ஆயஸ்மதோ வங்கீ³ஸஸ்ஸ தா இத்தி²யோ தி³ஸ்வா அனபி⁴ரதி உப்பஜ்ஜதி, ராகோ³ சித்தங் அனுத்³த⁴ங்ஸேதி. அத² கோ² ஆயஸ்மதோ வங்கீ³ஸஸ்ஸ ஏதத³ஹோஸி – ‘‘அலாபா⁴ வத மே, ந வத மே லாபா⁴; து³ல்லத்³த⁴ங் வத மே, ந வத மே ஸுலத்³த⁴ங்; யஸ்ஸ மே அனபி⁴ரதி உப்பன்னா, ராகோ³ சித்தங் அனுத்³த⁴ங்ஸேதி, தங் குதெத்த² லப்³பா⁴, யங் மே பரோ அனபி⁴ரதிங் வினோதெ³த்வா அபி⁴ரதிங் உப்பாதெ³ய்ய. யங்னூனாஹங் அத்தனாவ அத்தனோ அனபி⁴ரதிங் வினோதெ³த்வா அபி⁴ரதிங் உப்பாதெ³ய்ய’’ந்தி. அத² கோ² ஆயஸ்மா வங்கீ³ஸோ அத்தனாவ அத்தனோ அனபி⁴ரதிங் வினோதெ³த்வா அபி⁴ரதிங் உப்பாதெ³த்வா தாயங் வேலாயங் இமா கா³தா²யோ அபா⁴ஸி –
209. Evaṃ me sutaṃ – ekaṃ samayaṃ āyasmā vaṅgīso āḷaviyaṃ viharati aggāḷave cetiye āyasmatā nigrodhakappena upajjhāyena saddhiṃ. Tena kho pana samayena āyasmā vaṅgīso navako hoti acirapabbajito ohiyyako vihārapālo. Atha kho sambahulā itthiyo samalaṅkaritvā yena aggāḷavako ārāmo tenupasaṅkamiṃsu vihārapekkhikāyo. Atha kho āyasmato vaṅgīsassa tā itthiyo disvā anabhirati uppajjati, rāgo cittaṃ anuddhaṃseti. Atha kho āyasmato vaṅgīsassa etadahosi – ‘‘alābhā vata me, na vata me lābhā; dulladdhaṃ vata me, na vata me suladdhaṃ; yassa me anabhirati uppannā, rāgo cittaṃ anuddhaṃseti, taṃ kutettha labbhā, yaṃ me paro anabhiratiṃ vinodetvā abhiratiṃ uppādeyya. Yaṃnūnāhaṃ attanāva attano anabhiratiṃ vinodetvā abhiratiṃ uppādeyya’’nti. Atha kho āyasmā vaṅgīso attanāva attano anabhiratiṃ vinodetvā abhiratiṃ uppādetvā tāyaṃ velāyaṃ imā gāthāyo abhāsi –
‘‘நிக்க²ந்தங் வத மங் ஸந்தங், அகா³ரஸ்மானகா³ரியங்;
‘‘Nikkhantaṃ vata maṃ santaṃ, agārasmānagāriyaṃ;
விதக்கா உபதா⁴வந்தி, பக³ப்³பா⁴ கண்ஹதோ இமே.
Vitakkā upadhāvanti, pagabbhā kaṇhato ime.
‘‘உக்³க³புத்தா மஹிஸ்ஸாஸா, ஸிக்கி²தா த³ள்ஹத⁴ம்மினோ;
‘‘Uggaputtā mahissāsā, sikkhitā daḷhadhammino;
ஸமந்தா பரிகிரெய்யுங், ஸஹஸ்ஸங் அபலாயினங்.
Samantā parikireyyuṃ, sahassaṃ apalāyinaṃ.
நேவ மங் ப்³யாத⁴யிஸ்ஸந்தி 3, த⁴ம்மே ஸம்ஹி பதிட்டி²தங்.
Neva maṃ byādhayissanti 4, dhamme samhi patiṭṭhitaṃ.
‘‘ஸக்கீ² ஹி மே ஸுதங் ஏதங், பு³த்³த⁴ஸ்ஸாதி³ச்சப³ந்து⁴னோ;
‘‘Sakkhī hi me sutaṃ etaṃ, buddhassādiccabandhuno;
நிப்³பா³னக³மனங் மக்³க³ங், தத்த² மே நிரதோ மனோ.
Nibbānagamanaṃ maggaṃ, tattha me nirato mano.
‘‘ஏவஞ்சே மங் விஹரந்தங், பாபிம உபக³ச்ச²ஸி;
‘‘Evañce maṃ viharantaṃ, pāpima upagacchasi;
ததா² மச்சு கரிஸ்ஸாமி, ந மே மக்³க³ம்பி த³க்க²ஸீ’’தி.
Tathā maccu karissāmi, na me maggampi dakkhasī’’ti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. நிக்க²ந்தஸுத்தவண்ணனா • 1. Nikkhantasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. நிக்க²ந்தஸுத்தவண்ணனா • 1. Nikkhantasuttavaṇṇanā
