| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮. ৰঙ্গীসসংযুত্তং
8. Vaṅgīsasaṃyuttaṃ
১. নিক্খন্তসুত্তং
1. Nikkhantasuttaṃ
২০৯. এৰং মে সুতং – একং সমযং আযস্মা ৰঙ্গীসো আল়ৰিযং ৰিহরতি অগ্গাল়ৰে চেতিযে আযস্মতা নিগ্রোধকপ্পেন উপজ্ঝাযেন সদ্ধিং। তেন খো পন সমযেন আযস্মা ৰঙ্গীসো নৰকো হোতি অচিরপব্বজিতো ওহিয্যকো ৰিহারপালো। অথ খো সম্বহুলা ইত্থিযো সমলঙ্করিত্ৰা যেন অগ্গাল়ৰকো আরামো তেনুপসঙ্কমিংসু ৰিহারপেক্খিকাযো। অথ খো আযস্মতো ৰঙ্গীসস্স তা ইত্থিযো দিস্ৰা অনভিরতি উপ্পজ্জতি, রাগো চিত্তং অনুদ্ধংসেতি। অথ খো আযস্মতো ৰঙ্গীসস্স এতদহোসি – ‘‘অলাভা ৰত মে, ন ৰত মে লাভা; দুল্লদ্ধং ৰত মে, ন ৰত মে সুলদ্ধং; যস্স মে অনভিরতি উপ্পন্না, রাগো চিত্তং অনুদ্ধংসেতি, তং কুতেত্থ লব্ভা, যং মে পরো অনভিরতিং ৰিনোদেত্ৰা অভিরতিং উপ্পাদেয্য। যংনূনাহং অত্তনাৰ অত্তনো অনভিরতিং ৰিনোদেত্ৰা অভিরতিং উপ্পাদেয্য’’ন্তি। অথ খো আযস্মা ৰঙ্গীসো অত্তনাৰ অত্তনো অনভিরতিং ৰিনোদেত্ৰা অভিরতিং উপ্পাদেত্ৰা তাযং ৰেলাযং ইমা গাথাযো অভাসি –
209. Evaṃ me sutaṃ – ekaṃ samayaṃ āyasmā vaṅgīso āḷaviyaṃ viharati aggāḷave cetiye āyasmatā nigrodhakappena upajjhāyena saddhiṃ. Tena kho pana samayena āyasmā vaṅgīso navako hoti acirapabbajito ohiyyako vihārapālo. Atha kho sambahulā itthiyo samalaṅkaritvā yena aggāḷavako ārāmo tenupasaṅkamiṃsu vihārapekkhikāyo. Atha kho āyasmato vaṅgīsassa tā itthiyo disvā anabhirati uppajjati, rāgo cittaṃ anuddhaṃseti. Atha kho āyasmato vaṅgīsassa etadahosi – ‘‘alābhā vata me, na vata me lābhā; dulladdhaṃ vata me, na vata me suladdhaṃ; yassa me anabhirati uppannā, rāgo cittaṃ anuddhaṃseti, taṃ kutettha labbhā, yaṃ me paro anabhiratiṃ vinodetvā abhiratiṃ uppādeyya. Yaṃnūnāhaṃ attanāva attano anabhiratiṃ vinodetvā abhiratiṃ uppādeyya’’nti. Atha kho āyasmā vaṅgīso attanāva attano anabhiratiṃ vinodetvā abhiratiṃ uppādetvā tāyaṃ velāyaṃ imā gāthāyo abhāsi –
‘‘নিক্খন্তং ৰত মং সন্তং, অগারস্মানগারিযং।
‘‘Nikkhantaṃ vata maṃ santaṃ, agārasmānagāriyaṃ;
ৰিতক্কা উপধাৰন্তি, পগব্ভা কণ্হতো ইমে॥
Vitakkā upadhāvanti, pagabbhā kaṇhato ime.
‘‘উগ্গপুত্তা মহিস্সাসা, সিক্খিতা দল়্হধম্মিনো।
‘‘Uggaputtā mahissāsā, sikkhitā daḷhadhammino;
সমন্তা পরিকিরেয্যুং, সহস্সং অপলাযিনং॥
Samantā parikireyyuṃ, sahassaṃ apalāyinaṃ.
নেৰ মং ব্যাধযিস্সন্তি 3, ধম্মে সম্হি পতিট্ঠিতং॥
Neva maṃ byādhayissanti 4, dhamme samhi patiṭṭhitaṃ.
‘‘সক্খী হি মে সুতং এতং, বুদ্ধস্সাদিচ্চবন্ধুনো।
‘‘Sakkhī hi me sutaṃ etaṃ, buddhassādiccabandhuno;
নিব্বানগমনং মগ্গং, তত্থ মে নিরতো মনো॥
Nibbānagamanaṃ maggaṃ, tattha me nirato mano.
‘‘এৰঞ্চে মং ৰিহরন্তং, পাপিম উপগচ্ছসি।
‘‘Evañce maṃ viharantaṃ, pāpima upagacchasi;
তথা মচ্চু করিস্সামি, ন মে মগ্গম্পি দক্খসী’’তি॥
Tathā maccu karissāmi, na me maggampi dakkhasī’’ti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. নিক্খন্তসুত্তৰণ্ণনা • 1. Nikkhantasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. নিক্খন্তসুত্তৰণ্ণনা • 1. Nikkhantasuttavaṇṇanā
