| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
8. වඞ්‌ගීසසංයුත්‌තං
8. Vaṅgīsasaṃyuttaṃ
1. නික්‌ඛන්‌තසුත්‌තං
1. Nikkhantasuttaṃ
209. එවං මෙ සුතං – එකං සමයං ආයස්‌මා වඞ්‌ගීසො ආළවියං විහරති අග්‌ගාළවෙ චෙතියෙ ආයස්‌මතා නිග්‍රොධකප්‌පෙන උපජ්‌ඣායෙන සද්‌ධිං. තෙන ඛො පන සමයෙන ආයස්‌මා වඞ්‌ගීසො නවකො හොති අචිරපබ්‌බජිතො ඔහිය්‍යකො විහාරපාලො. අථ ඛො සම්‌බහුලා ඉත්‌ථියො සමලඞ්‌කරිත්‌වා යෙන අග්‌ගාළවකො ආරාමො තෙනුපසඞ්‌කමිංසු විහාරපෙක්‌ඛිකායො. අථ ඛො ආයස්‌මතො වඞ්‌ගීසස්‌ස තා ඉත්‌ථියො දිස්‌වා අනභිරති උප්‌පජ්‌ජති, රාගො චිත්‌තං අනුද්‌ධංසෙති. අථ ඛො ආයස්‌මතො වඞ්‌ගීසස්‌ස එතදහොසි – ‘‘අලාභා වත මෙ, න වත මෙ ලාභා; දුල්‌ලද්‌ධං වත මෙ, න වත මෙ සුලද්‌ධං; යස්‌ස මෙ අනභිරති උප්‌පන්‌නා, රාගො චිත්‌තං අනුද්‌ධංසෙති, තං කුතෙත්‌ථ ලබ්‌භා, යං මෙ පරො අනභිරතිං විනොදෙත්‌වා අභිරතිං උප්‌පාදෙය්‍ය. යංනූනාහං අත්‌තනාව අත්‌තනො අනභිරතිං විනොදෙත්‌වා අභිරතිං උප්‌පාදෙය්‍ය’’න්‌ති. අථ ඛො ආයස්‌මා වඞ්‌ගීසො අත්‌තනාව අත්‌තනො අනභිරතිං විනොදෙත්‌වා අභිරතිං උප්‌පාදෙත්‌වා තායං වෙලායං ඉමා ගාථායො අභාසි –
209. Evaṃ me sutaṃ – ekaṃ samayaṃ āyasmā vaṅgīso āḷaviyaṃ viharati aggāḷave cetiye āyasmatā nigrodhakappena upajjhāyena saddhiṃ. Tena kho pana samayena āyasmā vaṅgīso navako hoti acirapabbajito ohiyyako vihārapālo. Atha kho sambahulā itthiyo samalaṅkaritvā yena aggāḷavako ārāmo tenupasaṅkamiṃsu vihārapekkhikāyo. Atha kho āyasmato vaṅgīsassa tā itthiyo disvā anabhirati uppajjati, rāgo cittaṃ anuddhaṃseti. Atha kho āyasmato vaṅgīsassa etadahosi – ‘‘alābhā vata me, na vata me lābhā; dulladdhaṃ vata me, na vata me suladdhaṃ; yassa me anabhirati uppannā, rāgo cittaṃ anuddhaṃseti, taṃ kutettha labbhā, yaṃ me paro anabhiratiṃ vinodetvā abhiratiṃ uppādeyya. Yaṃnūnāhaṃ attanāva attano anabhiratiṃ vinodetvā abhiratiṃ uppādeyya’’nti. Atha kho āyasmā vaṅgīso attanāva attano anabhiratiṃ vinodetvā abhiratiṃ uppādetvā tāyaṃ velāyaṃ imā gāthāyo abhāsi –
‘‘නික්‌ඛන්‌තං වත මං සන්‌තං, අගාරස්‌මානගාරියං;
‘‘Nikkhantaṃ vata maṃ santaṃ, agārasmānagāriyaṃ;
විතක්‌කා උපධාවන්‌ති, පගබ්‌භා කණ්‌හතො ඉමෙ.
Vitakkā upadhāvanti, pagabbhā kaṇhato ime.
‘‘උග්‌ගපුත්‌තා මහිස්‌සාසා, සික්‌ඛිතා දළ්‌හධම්‌මිනො;
‘‘Uggaputtā mahissāsā, sikkhitā daḷhadhammino;
සමන්‌තා පරිකිරෙය්‍යුං, සහස්‌සං අපලායිනං.
Samantā parikireyyuṃ, sahassaṃ apalāyinaṃ.
නෙව මං බ්‍යාධයිස්‌සන්‌ති 3, ධම්‌මෙ සම්‌හි පතිට්‌ඨිතං.
Neva maṃ byādhayissanti 4, dhamme samhi patiṭṭhitaṃ.
‘‘සක්‌ඛී හි මෙ සුතං එතං, බුද්‌ධස්‌සාදිච්‌චබන්‌ධුනො;
‘‘Sakkhī hi me sutaṃ etaṃ, buddhassādiccabandhuno;
නිබ්‌බානගමනං මග්‌ගං, තත්‌ථ මෙ නිරතො මනො.
Nibbānagamanaṃ maggaṃ, tattha me nirato mano.
‘‘එවඤ්‌චෙ මං විහරන්‌තං, පාපිම උපගච්‌ඡසි;
‘‘Evañce maṃ viharantaṃ, pāpima upagacchasi;
තථා මච්‌චු කරිස්‌සාමි, න මෙ මග්‌ගම්‌පි දක්‌ඛසී’’ති.
Tathā maccu karissāmi, na me maggampi dakkhasī’’ti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. නික්‌ඛන්‌තසුත්‌තවණ්‌ණනා • 1. Nikkhantasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1. නික්‌ඛන්‌තසුත්‌තවණ්‌ණනා • 1. Nikkhantasuttavaṇṇanā
