| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៨. វង្គីសសំយុត្តំ
8. Vaṅgīsasaṃyuttaṃ
១. និក្ខន្តសុត្តវណ្ណនា
1. Nikkhantasuttavaṇṇanā
២០៩. អាឡវិយន្តិ អាឡវិនគរសមីបេ។ អគ្គចេតិយេតិ គោតមកចេតិយាទីហិ ឧត្តមចេតិយេ។ តំ កិរ ភូមិរាមណេយ្យកភាវេន មនុញ្ញតាយ បធានយុត្តតាទិសម្បត្តិយា ច ឥតរចេតិយេហិ សេដ្ឋសម្មតំ។ កប្បត្ថេរេនាតិ ‘‘កប្បោ’’តិ គោត្តតោ អាគតនាមោ ថេរោ, សហស្សបុរាណជដិលានំ អព្ភន្តរេ អយំ មហាថេរោ។ ឱហីនកោតិ ថេរេសុ គាមំ បិណ្ឌាយ បវិដ្ឋេសុ វិហារេ ឯវ អវហីនកោ ឋិតោ។ តត្ថ ការណមាហ ‘‘វិហារបាលោ’’តិអាទិ។ សមលង្ករិត្វាតិ សមំ អលង្ការេន អលង្ករិត្វា។ កុសលចិត្តំ វិទ្ធំសេតិ បវត្តិតុំ អប្បទានវសេន។ ឯតស្មិន្តិ ឯតស្មិំ រាគេ ឧប្បន្នេ។ ‘‘ឯកស្មិ’’ន្តិ វា បាឋោ, ឯកស្មិំ វិសភាគវត្ថុកេ រាគេ ឧប្បន្នេ។ ធម្មោ វាតិ មម ចិត្តេ ឧប្បជ្ជនកតោ អញ្ញោ ធម្មោ វា។ យេន ការណេន បរោ អនភិរតិំ វិនោទេត្វា ឥទានេវ អភិរតិំ ឧប្បាទេយ្យ, តំ ការណំ កុតោ លព្ភាតិ យោជនា, តំ ការណំ នត្ថីតិ អត្ថោ, តស្ស អភាវការណវចនំ។
209.Āḷaviyanti āḷavinagarasamīpe. Aggacetiyeti gotamakacetiyādīhi uttamacetiye. Taṃ kira bhūmirāmaṇeyyakabhāvena manuññatāya padhānayuttatādisampattiyā ca itaracetiyehi seṭṭhasammataṃ. Kappattherenāti ‘‘kappo’’ti gottato āgatanāmo thero, sahassapurāṇajaṭilānaṃ abbhantare ayaṃ mahāthero. Ohīnakoti theresu gāmaṃ piṇḍāya paviṭṭhesu vihāre eva avahīnako ṭhito. Tattha kāraṇamāha ‘‘vihārapālo’’tiādi. Samalaṅkaritvāti samaṃ alaṅkārena alaṅkaritvā. Kusalacittaṃ viddhaṃseti pavattituṃ appadānavasena. Etasminti etasmiṃ rāge uppanne. ‘‘Ekasmi’’nti vā pāṭho, ekasmiṃ visabhāgavatthuke rāge uppanne. Dhammo vāti mama citte uppajjanakato añño dhammo vā. Yena kāraṇena paro anabhiratiṃ vinodetvā idāneva abhiratiṃ uppādeyya, taṃ kāraṇaṃ kuto labbhāti yojanā, taṃ kāraṇaṃ natthīti attho, tassa abhāvakāraṇavacanaṃ.
អនគារិយន្តិ អគារវិរហតោ អនគារំ បព្ពជ្ជា។ តត្ថ និយុត្តត្តា អនគារិយំ ក-ការស្ស យ-ការំ កត្វា, បព្ពជិតន្តិ អត្ថោ។ អាធាវន្តីតិ ហទយំ អភិភវិត្វា ធាវន្តិ។ ឧគ្គតានន្តិ ឧឡារានំ បុត្តា។ តេនាហ ‘‘មហេសក្ខា រាជញ្ញភូតា’’តិ។ ឧត្តមប្បមាណន្តិ សហស្សបលំ សមន្តាតិ សមន្តតោ។ បរិកិរេយ្យុន្តិ វិជ្ឈេយ្យុំ។ ឯតស្មា សហស្សាតិ យថាវុត្តា ធនុគ្គហសហស្សតោ។ អតិរេកតរា អនេកសហស្សា។ ឥត្ថិយោ ឱលោកនសិតលបិតរោទិតសរេ ខិបន្តិយោ។ នេវ មំ ព្យាធយិស្សន្តិ នេវ មំ និជ្ឈាយិស្សន្តិ។ ‘‘ព្យាធយិស្សតី’’តិ បាឋោតិ វុត្តំ ‘‘ចាលេតុំ ន សក្ខិស្សតីតិ អត្ថោ’’តិ។ ធម្មេ សម្ហីតិ សកេ សន្តិកេ បតិដ្ឋិតេ សាសនធម្មេ។ តេនាហ ‘‘អនភិរតិំ វិនោទេត្វា’’តិអាទិ។
Anagāriyanti agāravirahato anagāraṃ pabbajjā. Tattha niyuttattā anagāriyaṃ ka-kārassa ya-kāraṃ katvā, pabbajitanti attho. Ādhāvantīti hadayaṃ abhibhavitvā dhāvanti. Uggatānanti uḷārānaṃ puttā. Tenāha ‘‘mahesakkhā rājaññabhūtā’’ti. Uttamappamāṇanti sahassapalaṃ samantāti samantato. Parikireyyunti vijjheyyuṃ. Etasmā sahassāti yathāvuttā dhanuggahasahassato. Atirekatarā anekasahassā. Itthiyo olokanasitalapitaroditasare khipantiyo. Neva maṃ byādhayissanti neva maṃ nijjhāyissanti. ‘‘Byādhayissatī’’ti pāṭhoti vuttaṃ ‘‘cāletuṃ na sakkhissatīti attho’’ti. Dhamme samhīti sake santike patiṭṭhite sāsanadhamme. Tenāha ‘‘anabhiratiṃvinodetvā’’tiādi.
មគ្គន្តិ ‘‘មគ្គោ’’តិ វត្តព្ពេ លិង្គវិបល្លាសេន វុត្តំ។ តេនាហ ‘‘សោ ហិ និព្ពានស្ស បុព្ពភាគមគ្គ្គោ’’តិ។
Magganti ‘‘maggo’’ti vattabbe liṅgavipallāsena vuttaṃ. Tenāha ‘‘so hi nibbānassa pubbabhāgamagggo’’ti.
និក្ខន្តសុត្តវណ្ណនា និដ្ឋិតា។
Nikkhantasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១. និក្ខន្តសុត្តំ • 1. Nikkhantasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១. និក្ខន្តសុត្តវណ្ណនា • 1. Nikkhantasuttavaṇṇanā
