| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੮. વਙ੍ਗੀਸਸਂਯੁਤ੍ਤਂ
8. Vaṅgīsasaṃyuttaṃ
੧. ਨਿਕ੍ਖਨ੍ਤਸੁਤ੍ਤવਣ੍ਣਨਾ
1. Nikkhantasuttavaṇṇanā
੨੦੯. ਆਲ਼વਿਯਨ੍ਤਿ ਆਲ਼વਿਨਗਰਸਮੀਪੇ। ਅਗ੍ਗਚੇਤਿਯੇਤਿ ਗੋਤਮਕਚੇਤਿਯਾਦੀਹਿ ਉਤ੍ਤਮਚੇਤਿਯੇ। ਤਂ ਕਿਰ ਭੂਮਿਰਾਮਣੇਯ੍ਯਕਭਾવੇਨ ਮਨੁਞ੍ਞਤਾਯ ਪਧਾਨਯੁਤ੍ਤਤਾਦਿਸਮ੍ਪਤ੍ਤਿਯਾ ਚ ਇਤਰਚੇਤਿਯੇਹਿ ਸੇਟ੍ਠਸਮ੍ਮਤਂ। ਕਪ੍ਪਤ੍ਥੇਰੇਨਾਤਿ ‘‘ਕਪ੍ਪੋ’’ਤਿ ਗੋਤ੍ਤਤੋ ਆਗਤਨਾਮੋ ਥੇਰੋ, ਸਹਸ੍ਸਪੁਰਾਣਜਟਿਲਾਨਂ ਅਬ੍ਭਨ੍ਤਰੇ ਅਯਂ ਮਹਾਥੇਰੋ। ਓਹੀਨਕੋਤਿ ਥੇਰੇਸੁ ਗਾਮਂ ਪਿਣ੍ਡਾਯ ਪવਿਟ੍ਠੇਸੁ વਿਹਾਰੇ ਏવ ਅવਹੀਨਕੋ ਠਿਤੋ। ਤਤ੍ਥ ਕਾਰਣਮਾਹ ‘‘વਿਹਾਰਪਾਲੋ’’ਤਿਆਦਿ। ਸਮਲਙ੍ਕਰਿਤ੍વਾਤਿ ਸਮਂ ਅਲਙ੍ਕਾਰੇਨ ਅਲਙ੍ਕਰਿਤ੍વਾ। ਕੁਸਲਚਿਤ੍ਤਂ વਿਦ੍ਧਂਸੇਤਿ ਪવਤ੍ਤਿਤੁਂ ਅਪ੍ਪਦਾਨવਸੇਨ। ਏਤਸ੍ਮਿਨ੍ਤਿ ਏਤਸ੍ਮਿਂ ਰਾਗੇ ਉਪ੍ਪਨ੍ਨੇ। ‘‘ਏਕਸ੍ਮਿ’’ਨ੍ਤਿ વਾ ਪਾਠੋ, ਏਕਸ੍ਮਿਂ વਿਸਭਾਗવਤ੍ਥੁਕੇ ਰਾਗੇ ਉਪ੍ਪਨ੍ਨੇ। ਧਮ੍ਮੋ વਾਤਿ ਮਮ ਚਿਤ੍ਤੇ ਉਪ੍ਪਜ੍ਜਨਕਤੋ ਅਞ੍ਞੋ ਧਮ੍ਮੋ વਾ। ਯੇਨ ਕਾਰਣੇਨ ਪਰੋ ਅਨਭਿਰਤਿਂ વਿਨੋਦੇਤ੍વਾ ਇਦਾਨੇવ ਅਭਿਰਤਿਂ ਉਪ੍ਪਾਦੇਯ੍ਯ, ਤਂ ਕਾਰਣਂ ਕੁਤੋ ਲਬ੍ਭਾਤਿ ਯੋਜਨਾ, ਤਂ ਕਾਰਣਂ ਨਤ੍ਥੀਤਿ ਅਤ੍ਥੋ, ਤਸ੍ਸ ਅਭਾવਕਾਰਣવਚਨਂ।
209.Āḷaviyanti āḷavinagarasamīpe. Aggacetiyeti gotamakacetiyādīhi uttamacetiye. Taṃ kira bhūmirāmaṇeyyakabhāvena manuññatāya padhānayuttatādisampattiyā ca itaracetiyehi seṭṭhasammataṃ. Kappattherenāti ‘‘kappo’’ti gottato āgatanāmo thero, sahassapurāṇajaṭilānaṃ abbhantare ayaṃ mahāthero. Ohīnakoti theresu gāmaṃ piṇḍāya paviṭṭhesu vihāre eva avahīnako ṭhito. Tattha kāraṇamāha ‘‘vihārapālo’’tiādi. Samalaṅkaritvāti samaṃ alaṅkārena alaṅkaritvā. Kusalacittaṃ viddhaṃseti pavattituṃ appadānavasena. Etasminti etasmiṃ rāge uppanne. ‘‘Ekasmi’’nti vā pāṭho, ekasmiṃ visabhāgavatthuke rāge uppanne. Dhammo vāti mama citte uppajjanakato añño dhammo vā. Yena kāraṇena paro anabhiratiṃ vinodetvā idāneva abhiratiṃ uppādeyya, taṃ kāraṇaṃ kuto labbhāti yojanā, taṃ kāraṇaṃ natthīti attho, tassa abhāvakāraṇavacanaṃ.
ਅਨਗਾਰਿਯਨ੍ਤਿ ਅਗਾਰવਿਰਹਤੋ ਅਨਗਾਰਂ ਪਬ੍ਬਜ੍ਜਾ। ਤਤ੍ਥ ਨਿਯੁਤ੍ਤਤ੍ਤਾ ਅਨਗਾਰਿਯਂ ਕ-ਕਾਰਸ੍ਸ ਯ-ਕਾਰਂ ਕਤ੍વਾ, ਪਬ੍ਬਜਿਤਨ੍ਤਿ ਅਤ੍ਥੋ। ਆਧਾવਨ੍ਤੀਤਿ ਹਦਯਂ ਅਭਿਭવਿਤ੍વਾ ਧਾવਨ੍ਤਿ। ਉਗ੍ਗਤਾਨਨ੍ਤਿ ਉਲ਼ਾਰਾਨਂ ਪੁਤ੍ਤਾ। ਤੇਨਾਹ ‘‘ਮਹੇਸਕ੍ਖਾ ਰਾਜਞ੍ਞਭੂਤਾ’’ਤਿ। ਉਤ੍ਤਮਪ੍ਪਮਾਣਨ੍ਤਿ ਸਹਸ੍ਸਪਲਂ ਸਮਨ੍ਤਾਤਿ ਸਮਨ੍ਤਤੋ। ਪਰਿਕਿਰੇਯ੍ਯੁਨ੍ਤਿ વਿਜ੍ਝੇਯ੍ਯੁਂ। ਏਤਸ੍ਮਾ ਸਹਸ੍ਸਾਤਿ ਯਥਾવੁਤ੍ਤਾ ਧਨੁਗ੍ਗਹਸਹਸ੍ਸਤੋ। ਅਤਿਰੇਕਤਰਾ ਅਨੇਕਸਹਸ੍ਸਾ। ਇਤ੍ਥਿਯੋ ਓਲੋਕਨਸਿਤਲਪਿਤਰੋਦਿਤਸਰੇ ਖਿਪਨ੍ਤਿਯੋ। ਨੇવ ਮਂ ਬ੍ਯਾਧਯਿਸ੍ਸਨ੍ਤਿ ਨੇવ ਮਂ ਨਿਜ੍ਝਾਯਿਸ੍ਸਨ੍ਤਿ। ‘‘ਬ੍ਯਾਧਯਿਸ੍ਸਤੀ’’ਤਿ ਪਾਠੋਤਿ વੁਤ੍ਤਂ ‘‘ਚਾਲੇਤੁਂ ਨ ਸਕ੍ਖਿਸ੍ਸਤੀਤਿ ਅਤ੍ਥੋ’’ਤਿ। ਧਮ੍ਮੇ ਸਮ੍ਹੀਤਿ ਸਕੇ ਸਨ੍ਤਿਕੇ ਪਤਿਟ੍ਠਿਤੇ ਸਾਸਨਧਮ੍ਮੇ। ਤੇਨਾਹ ‘‘ਅਨਭਿਰਤਿਂ વਿਨੋਦੇਤ੍વਾ’’ਤਿਆਦਿ।
Anagāriyanti agāravirahato anagāraṃ pabbajjā. Tattha niyuttattā anagāriyaṃ ka-kārassa ya-kāraṃ katvā, pabbajitanti attho. Ādhāvantīti hadayaṃ abhibhavitvā dhāvanti. Uggatānanti uḷārānaṃ puttā. Tenāha ‘‘mahesakkhā rājaññabhūtā’’ti. Uttamappamāṇanti sahassapalaṃ samantāti samantato. Parikireyyunti vijjheyyuṃ. Etasmā sahassāti yathāvuttā dhanuggahasahassato. Atirekatarā anekasahassā. Itthiyo olokanasitalapitaroditasare khipantiyo. Neva maṃ byādhayissanti neva maṃ nijjhāyissanti. ‘‘Byādhayissatī’’ti pāṭhoti vuttaṃ ‘‘cāletuṃ na sakkhissatīti attho’’ti. Dhamme samhīti sake santike patiṭṭhite sāsanadhamme. Tenāha ‘‘anabhiratiṃvinodetvā’’tiādi.
ਮਗ੍ਗਨ੍ਤਿ ‘‘ਮਗ੍ਗੋ’’ਤਿ વਤ੍ਤਬ੍ਬੇ ਲਿਙ੍ਗવਿਪਲ੍ਲਾਸੇਨ વੁਤ੍ਤਂ। ਤੇਨਾਹ ‘‘ਸੋ ਹਿ ਨਿਬ੍ਬਾਨਸ੍ਸ ਪੁਬ੍ਬਭਾਗਮਗ੍ਗ੍ਗੋ’’ਤਿ।
Magganti ‘‘maggo’’ti vattabbe liṅgavipallāsena vuttaṃ. Tenāha ‘‘so hi nibbānassa pubbabhāgamagggo’’ti.
ਨਿਕ੍ਖਨ੍ਤਸੁਤ੍ਤવਣ੍ਣਨਾ ਨਿਟ੍ਠਿਤਾ।
Nikkhantasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੧. ਨਿਕ੍ਖਨ੍ਤਸੁਤ੍ਤਂ • 1. Nikkhantasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੧. ਨਿਕ੍ਖਨ੍ਤਸੁਤ੍ਤવਣ੍ਣਨਾ • 1. Nikkhantasuttavaṇṇanā
