| Library / Tipiṭaka / திபிடக • Tipiṭaka / சூளவக்³க³-அட்ட²கதா² • Cūḷavagga-aṭṭhakathā |
நிமந்தனப⁴த்தகதா²
Nimantanabhattakathā
நிமந்தனங் புக்³க³லிகஞ்சே, ஸயமேவ இஸ்ஸரோ. ஸங்கி⁴கங் பன உத்³தே³ஸப⁴த்தே வுத்தனயேனேவ கா³ஹேதப்³ப³ங். ஸசே பனெத்த² தூ³தோ ப்³யத்தோ ஹோதி, ‘‘ப⁴ந்தே , ராஜகே³ஹே பி⁴க்கு²ஸங்க⁴ஸ்ஸ ப⁴த்தங் க³ண்ஹதா²’’தி அவத்வா ‘‘பி⁴க்க²ங் க³ண்ஹதா²’’தி வத³தி, பிண்ட³பாதிகானம்பி வட்டதி. அத² தூ³தோ அப்³யத்தோ ‘‘ப⁴த்தங் க³ண்ஹதா²’’தி வத³தி, ப⁴த்துத்³தே³ஸகோ ப்³யத்தோ ‘‘ப⁴த்த’’ந்தி அவத்வா ‘‘ப⁴ந்தே, தும்ஹே யாதா²’’தி வத³தி; ஏவம்பி பிண்ட³பாதிகானம்பி வட்டதி. தும்ஹாகங் படிபாடியா ‘‘ப⁴த்தங் பாபுணாதீ’’தி வுத்தே பன ந வட்டதி. ஸசே நிமந்தேதுங் ஆக³தமனுஸ்ஸோ ஆஸனஸாலங் பவிஸித்வா ‘‘அட்ட² பி⁴க்கூ² தே³தா²’’தி வா ‘‘அட்ட² பத்தே தே³தா²’’தி வா வத³தி; ஏவம்பி பிண்ட³பாதிகானங் வட்டதி, ‘‘தும்ஹே ச தும்ஹே ச க³ச்ச²தா²’’தி வத்தப்³ப³ங். ஸசே பன ‘‘அட்ட² பி⁴க்கூ² தே³த²; ப⁴த்தங் க³ண்ஹத², அட்ட² பத்தே தே³த²; ப⁴த்தங் க³ண்ஹதா²’’தி வத³தி, படிபாடியா கா³ஹேதப்³ப³ங். கா³ஹெந்தேன பன விச்சி²ந்தி³த்வா ‘‘ப⁴த்த’’ந்தி அவத³ந்தேன ‘‘தும்ஹே ச தும்ஹே ச க³ச்ச²தா²’’தி வுத்தே பிண்ட³பாதிகானங் வட்டதி. ‘‘ப⁴ந்தே, தும்ஹாகங் பத்தங் தே³த², தும்ஹே ஏதா²’’தி வுத்தே பன ‘‘ஸாது⁴, உபாஸகா’’தி க³ந்தப்³ப³ங். ஸங்க⁴தோ உத்³தி³ஸித்வா ‘‘தும்ஹே ஏதா²’’தி வுத்தேபி யதா²டி²திகாய கா³ஹேதப்³ப³ங்.
Nimantanaṃ puggalikañce, sayameva issaro. Saṅghikaṃ pana uddesabhatte vuttanayeneva gāhetabbaṃ. Sace panettha dūto byatto hoti, ‘‘bhante , rājagehe bhikkhusaṅghassa bhattaṃ gaṇhathā’’ti avatvā ‘‘bhikkhaṃ gaṇhathā’’ti vadati, piṇḍapātikānampi vaṭṭati. Atha dūto abyatto ‘‘bhattaṃ gaṇhathā’’ti vadati, bhattuddesako byatto ‘‘bhatta’’nti avatvā ‘‘bhante, tumhe yāthā’’ti vadati; evampi piṇḍapātikānampi vaṭṭati. Tumhākaṃ paṭipāṭiyā ‘‘bhattaṃ pāpuṇātī’’ti vutte pana na vaṭṭati. Sace nimantetuṃ āgatamanusso āsanasālaṃ pavisitvā ‘‘aṭṭha bhikkhū dethā’’ti vā ‘‘aṭṭha patte dethā’’ti vā vadati; evampi piṇḍapātikānaṃ vaṭṭati, ‘‘tumhe ca tumhe ca gacchathā’’ti vattabbaṃ. Sace pana ‘‘aṭṭha bhikkhū detha; bhattaṃ gaṇhatha, aṭṭha patte detha; bhattaṃ gaṇhathā’’ti vadati, paṭipāṭiyā gāhetabbaṃ. Gāhentena pana vicchinditvā ‘‘bhatta’’nti avadantena ‘‘tumhe ca tumhe ca gacchathā’’ti vutte piṇḍapātikānaṃ vaṭṭati. ‘‘Bhante, tumhākaṃ pattaṃ detha, tumhe ethā’’ti vutte pana ‘‘sādhu, upāsakā’’ti gantabbaṃ. Saṅghato uddisitvā ‘‘tumhe ethā’’ti vuttepi yathāṭhitikāya gāhetabbaṃ.
நிமந்தனப⁴த்தக⁴ரதோ பன பத்தத்தா²ய ஆக³தஸ்ஸ உத்³தே³ஸப⁴த்தே வுத்தனயேனேவ டி²திகாய பத்தோ தா³தப்³போ³. ஏகோ ‘‘ஸங்க⁴தோ படிபாடியா பத்த’’ந்தி அவத்வா கேவலங் ‘‘ஏகங் பத்தங் தே³தா²’’தி வத்வா அகா³ஹிதேயேவ பத்தே யஸ்ஸ கஸ்ஸசி பத்தங் க³ஹெத்வா பூரெத்வா ஆஹரதி, தங் பத்தஸாமிகஸ்ஸேவ ஹோதி, உத்³தே³ஸப⁴த்தே விய டி²திகாய ந கா³ஹேதப்³ப³ங். இதா⁴பி யோ ஆக³ந்த்வா துண்ஹீபூ⁴தோ திட்ட²தி, ஸோ ‘‘கஸ்ஸ ஸந்திகங் ஆக³தோஸீ’’தி வா ‘‘கஸ்ஸ பத்தங் ஹரிஸ்ஸஸீ’’தி வா ந வத்தப்³போ³.
Nimantanabhattagharato pana pattatthāya āgatassa uddesabhatte vuttanayeneva ṭhitikāya patto dātabbo. Eko ‘‘saṅghato paṭipāṭiyā patta’’nti avatvā kevalaṃ ‘‘ekaṃ pattaṃ dethā’’ti vatvā agāhiteyeva patte yassa kassaci pattaṃ gahetvā pūretvā āharati, taṃ pattasāmikasseva hoti, uddesabhatte viya ṭhitikāya na gāhetabbaṃ. Idhāpi yo āgantvā tuṇhībhūto tiṭṭhati, so ‘‘kassa santikaṃ āgatosī’’ti vā ‘‘kassa pattaṃ harissasī’’ti vā na vattabbo.
புச்சா²ஸபா⁴கே³ன ஹி ‘‘தும்ஹாகங் ஸந்திகங் ஆக³தோ, தும்ஹாகங் பத்தங் ஹரிஸ்ஸாமீ’’தி வதெ³ய்ய, ததோ ஸோ பி⁴க்கு² பி⁴க்கூ²ஹி ஜிகு³ச்ச²னீயோ அஸ்ஸ. ‘‘குஹிங் க³ச்ச²ஸி, கிங் கரொந்தோ ஆஹிண்ட³ஸீ’’தி பன வுத்தே ‘‘தஸ்ஸ பத்தத்தா²ய ஆக³தொம்ஹீ’’தி வத³ந்தஸ்ஸ படிபாடியா ப⁴த்தட்டி²திகாய கா³ஹெத்வா பத்தோ தா³தப்³போ³. ‘‘ப⁴த்தாஹரணகபத்தங் தே³தா²’’தி வுத்தேபி படிபாடியா ப⁴த்தட்டி²திகாய ஏவ தா³தப்³போ³. ஸசே ஆஹரித்வா ‘‘ஸப்³போ³ ஸங்கோ⁴ பு⁴ஞ்ஜதூ’’தி வத³தி, பா⁴ஜெத்வா பு⁴ஞ்ஜிதப்³ப³ங். பத்தஸாமிகஸ்ஸ அதிக்கந்தம்பி டி²திகங் ட²பெத்வா அஞ்ஞங் படிபாடிப⁴த்தங் கா³ஹேதப்³ப³ங்.
Pucchāsabhāgena hi ‘‘tumhākaṃ santikaṃ āgato, tumhākaṃ pattaṃ harissāmī’’ti vadeyya, tato so bhikkhu bhikkhūhi jigucchanīyo assa. ‘‘Kuhiṃ gacchasi, kiṃ karonto āhiṇḍasī’’ti pana vutte ‘‘tassa pattatthāya āgatomhī’’ti vadantassa paṭipāṭiyā bhattaṭṭhitikāya gāhetvā patto dātabbo. ‘‘Bhattāharaṇakapattaṃ dethā’’ti vuttepi paṭipāṭiyā bhattaṭṭhitikāya eva dātabbo. Sace āharitvā ‘‘sabbo saṅgho bhuñjatū’’ti vadati, bhājetvā bhuñjitabbaṃ. Pattasāmikassa atikkantampi ṭhitikaṃ ṭhapetvā aññaṃ paṭipāṭibhattaṃ gāhetabbaṃ.
ஏகோ பாதியா ப⁴த்தங் ஆஹரித்வா ‘‘ஸங்க⁴ஸ்ஸ த³ம்மீ’’தி வத³தி, ஆலோபப⁴த்தட்டி²திகதோ பட்டா²ய ஆலோபஸங்கே²பேன பா⁴ஜேதப்³ப³ங். ஸசே பன துண்ஹீபூ⁴தோ அச்ச²தி, ‘‘கஸ்ஸ தே ஆப⁴தங், கஸ்ஸ தா³துகாமோஸீ’’தி ந வத்தப்³போ³. ஸசே பன ‘‘குஹிங் க³ச்ச²ஸி, கிங் கரொந்தோ ஆஹிண்ட³ஸீ’’தி வுத்தே ‘‘ஸங்க⁴ஸ்ஸ மே ப⁴த்தங் ஆப⁴தங், தே²ரானங் மே ப⁴த்தங் ஆப⁴த’’ந்தி வத³தி, க³ஹெத்வா ஆலோபப⁴த்தட்டி²திகாய பா⁴ஜேதப்³ப³ங். ஸசே பன ஏவங் ஆப⁴தங் ப³ஹுங் ஹோதி, ஸகலஸ்ஸ ஸங்க⁴ஸ்ஸ ப³ஹு ஹோதி, அபி⁴ஹடபி⁴க்கா² நாம பிண்ட³பாதிகானம்பி வட்டதி, டி²திகாபுச்ச²னகிச்சங் நத்தி², தே²ராஸனதோ பட்டா²ய பத்தங் பூரெத்வா தா³தப்³ப³ங்.
Eko pātiyā bhattaṃ āharitvā ‘‘saṅghassa dammī’’ti vadati, ālopabhattaṭṭhitikato paṭṭhāya ālopasaṅkhepena bhājetabbaṃ. Sace pana tuṇhībhūto acchati, ‘‘kassa te ābhataṃ, kassa dātukāmosī’’ti na vattabbo. Sace pana ‘‘kuhiṃ gacchasi, kiṃ karonto āhiṇḍasī’’ti vutte ‘‘saṅghassa me bhattaṃ ābhataṃ, therānaṃ me bhattaṃ ābhata’’nti vadati, gahetvā ālopabhattaṭṭhitikāya bhājetabbaṃ. Sace pana evaṃ ābhataṃ bahuṃ hoti, sakalassa saṅghassa bahu hoti, abhihaṭabhikkhā nāma piṇḍapātikānampi vaṭṭati, ṭhitikāpucchanakiccaṃ natthi, therāsanato paṭṭhāya pattaṃ pūretvā dātabbaṃ.
உபாஸகோ ஸங்க⁴த்தே²ரஸ்ஸ வா க³ந்த²து⁴தங்க³வஸேன அபி⁴ஞ்ஞாதஸ்ஸ வா ப⁴த்துத்³தே³ஸகஸ்ஸ வா பஹிணாதி ‘‘அம்ஹாகங் ப⁴த்தக³ஹணத்தா²ய அட்ட² பி⁴க்கூ² க³ஹெத்வா ஆக³ச்ச²தா²’’தி, ஸசேபி ஞாதிஉபட்டா²கேஹி பேஸிதங் ஹோதி, இமே தயோ ஜனா புச்சி²துங் ந லப⁴ந்தி, ஆருள்ஹாயேவ மாதிகங், ஸங்க⁴தோ அட்ட² பி⁴க்கூ² உத்³தி³ஸாபெத்வா அத்தனவமேஹி க³ந்தப்³ப³ங். கஸ்மா? பி⁴க்கு²ஸங்க⁴ஸ்ஸ ஹி ஏதே பி⁴க்கூ² நிஸ்ஸாய லாபோ⁴ உப்பஜ்ஜதீதி. க³ந்த²து⁴தங்கா³தீ³ஹி பன அனபி⁴ஞ்ஞாதோ ஆவாஸிகபி⁴க்கு² புச்சி²துங் லப⁴தி, தஸ்மா தேன ‘‘கிங் ஸங்க⁴தோ க³ண்ஹாமி, உதா³ஹு யே ஜானாமி, தேஹி ஸத்³தி⁴ங் ஆக³ச்சா²மீ’’தி மாதிகங் ஆரோபெத்வா யதா² தா³யகா வத³ந்தி, ததா² படிபஜ்ஜிதப்³ப³ங். ‘‘தும்ஹாகங் நிஸ்ஸிதகே வா யே வா ஜானாத², தே க³ஹெத்வா ஏதா²’’தி வுத்தே பன யே இச்ச²ந்தி, தேஹி ஸத்³தி⁴ங் க³ந்துங் லப⁴தி. ஸசே ‘‘அட்ட² பி⁴க்கூ² பஹிணதா²’’தி பேஸெந்தி, ஸங்க⁴தோவ பேஸேதப்³பா³. அத்தனா ஸசே அஞ்ஞஸ்மிங் கா³மே ஸக்கா ஹோதி பி⁴க்கா² லபி⁴துங், அஞ்ஞோ கா³மோ க³ந்தப்³போ³. ந ஸக்கா சே ஹோதி லபி⁴துங், ஸோயேவ கா³மோ பிண்டா³ய பவிஸிதப்³போ³.
Upāsako saṅghattherassa vā ganthadhutaṅgavasena abhiññātassa vā bhattuddesakassa vā pahiṇāti ‘‘amhākaṃ bhattagahaṇatthāya aṭṭha bhikkhū gahetvā āgacchathā’’ti, sacepi ñātiupaṭṭhākehi pesitaṃ hoti, ime tayo janā pucchituṃ na labhanti, āruḷhāyeva mātikaṃ, saṅghato aṭṭha bhikkhū uddisāpetvā attanavamehi gantabbaṃ. Kasmā? Bhikkhusaṅghassa hi ete bhikkhū nissāya lābho uppajjatīti. Ganthadhutaṅgādīhi pana anabhiññāto āvāsikabhikkhu pucchituṃ labhati, tasmā tena ‘‘kiṃ saṅghato gaṇhāmi, udāhu ye jānāmi, tehi saddhiṃ āgacchāmī’’ti mātikaṃ āropetvā yathā dāyakā vadanti, tathā paṭipajjitabbaṃ. ‘‘Tumhākaṃ nissitake vā ye vā jānātha, te gahetvā ethā’’ti vutte pana ye icchanti, tehi saddhiṃ gantuṃ labhati. Sace ‘‘aṭṭha bhikkhū pahiṇathā’’ti pesenti, saṅghatova pesetabbā. Attanā sace aññasmiṃ gāme sakkā hoti bhikkhā labhituṃ, añño gāmo gantabbo. Na sakkā ce hoti labhituṃ, soyeva gāmo piṇḍāya pavisitabbo.
நிமந்திதபி⁴க்கூ² ஆஸனஸாலாய நிஸின்னா ஹொந்தி, தத்ர சே மனுஸ்ஸா ‘‘பத்தே தே³தா²’’தி ஆக³ச்ச²ந்தி, அனிமந்திதேஹி ந தா³தப்³பா³. ‘‘ஏதே நிமந்திதபி⁴க்கூ²’’தி வத்தப்³ப³ங். ‘‘தும்ஹேபி தே³தா²’’தி வுத்தே பன தா³துங் வட்டதி. உஸ்ஸவாதீ³ஸு மனுஸ்ஸா ஸயமேவ பரிவேணானி ச பதா⁴னக⁴ரானி ச க³ந்த்வா திபிடகே ச த⁴ம்மகதி²கே ச பி⁴க்கு²ஸதேனபி ஸத்³தி⁴ங் நிமந்தெந்தி. ததா³ யேபி ஜானந்தி, தே க³ஹெத்வா க³ந்துங் வட்டதி. கஸ்மா? ந ஹி மஹாபி⁴க்கு²ஸங்கே⁴ன அத்தி²கா மனுஸ்ஸா பரிவேணானி ச பதா⁴னக⁴ரானி க³ச்ச²ந்தி, ஸன்னிபாதட்டா²னதோவ யதா²ஸத்தி யதா²ப³லங் பி⁴க்கூ² க³ண்ஹித்வா க³ச்ச²ந்தீதி.
Nimantitabhikkhū āsanasālāya nisinnā honti, tatra ce manussā ‘‘patte dethā’’ti āgacchanti, animantitehi na dātabbā. ‘‘Ete nimantitabhikkhū’’ti vattabbaṃ. ‘‘Tumhepi dethā’’ti vutte pana dātuṃ vaṭṭati. Ussavādīsu manussā sayameva pariveṇāni ca padhānagharāni ca gantvā tipiṭake ca dhammakathike ca bhikkhusatenapi saddhiṃ nimantenti. Tadā yepi jānanti, te gahetvā gantuṃ vaṭṭati. Kasmā? Na hi mahābhikkhusaṅghena atthikā manussā pariveṇāni ca padhānagharāni gacchanti, sannipātaṭṭhānatova yathāsatti yathābalaṃ bhikkhū gaṇhitvā gacchantīti.
ஸசே பன ஸங்க⁴த்தே²ரோ வா க³ந்த²து⁴தங்க³வஸேன அபி⁴ஞ்ஞாதகோ வா ப⁴த்துத்³தே³ஸகோ வா அஞ்ஞத்ர வா வஸ்ஸங் வஸித்வா கத்த²சி வா க³ந்த்வா புன ஸகட்டா²னங் ஆக³ச்ச²ந்தி, மனுஸ்ஸா ச ஆக³ந்துகஸ்ஸ ஸக்காரங் கரொந்தி, ஏகவாரங் யே ஜானந்தி, தே க³ஹெத்வா க³ந்தப்³ப³ங். படிப³த்³த⁴காலதோ பன பட்டா²ய து³தியவாரே ஆரத்³தே⁴ ஸங்க⁴தோயேவ க³ஹெத்வா க³ந்தப்³ப³ங். அபி⁴னவஆக³ந்துகாவ ஹுத்வா ஞாதீ வா உபட்டா²கே வா பஸ்ஸிஸ்ஸாமாதி க³ச்ச²ந்தி, தத்ர தேஸங் ஞாதீ ச உபட்டா²கா ச ஸக்காரங் கரொந்தி. எத்த² பன யே ஜானந்தி, தே க³ஹெத்வா க³ந்துங் வட்டதி.
Sace pana saṅghatthero vā ganthadhutaṅgavasena abhiññātako vā bhattuddesako vā aññatra vā vassaṃ vasitvā katthaci vā gantvā puna sakaṭṭhānaṃ āgacchanti, manussā ca āgantukassa sakkāraṃ karonti, ekavāraṃ ye jānanti, te gahetvā gantabbaṃ. Paṭibaddhakālato pana paṭṭhāya dutiyavāre āraddhe saṅghatoyeva gahetvā gantabbaṃ. Abhinavaāgantukāva hutvā ñātī vā upaṭṭhāke vā passissāmāti gacchanti, tatra tesaṃ ñātī ca upaṭṭhākā ca sakkāraṃ karonti. Ettha pana ye jānanti, te gahetvā gantuṃ vaṭṭati.
யோ பன அதிலாபீ⁴ ஹோதி, ஸகட்டா²னஞ்ச ஆக³ந்துகட்டா²னஞ்ச ஏகஸதி³ஸங், ஸப்³ப³த்த² மனுஸ்ஸா ஸங்க⁴ப⁴த்தங் ஸஜ்ஜெத்வாவ நிஸீத³ந்தி, தேன ஸங்க⁴தோவ க³ஹெத்வா க³ந்தப்³ப³ந்தி அயங் நிமந்தனே விஸேஸோ. அவஸேஸோ ஸப்³ப³பஞ்ஹோ உத்³தே³ஸப⁴த்தே வுத்தனயேனேவ வேதி³தப்³போ³. குருந்தி³யங் பன ‘‘அட்ட² மஹாதே²ரே தே³தா²’’தி வுத்தே ‘‘அட்ட² மஹாதே²ராவ தா³தப்³பா³’’தி வுத்தங். ஏஸ நயோ மஜ்ஜி²மாதீ³ஸு. ஸசே பன அவிஸேஸெத்வா ‘‘அட்ட² பி⁴க்கூ² தே³தா²’’தி வத³தி, ஸங்க⁴தோ தா³தப்³பா³.
Yo pana atilābhī hoti, sakaṭṭhānañca āgantukaṭṭhānañca ekasadisaṃ, sabbattha manussā saṅghabhattaṃ sajjetvāva nisīdanti, tena saṅghatova gahetvā gantabbanti ayaṃ nimantane viseso. Avaseso sabbapañho uddesabhatte vuttanayeneva veditabbo. Kurundiyaṃ pana ‘‘aṭṭha mahāthere dethā’’ti vutte ‘‘aṭṭha mahātherāva dātabbā’’ti vuttaṃ. Esa nayo majjhimādīsu. Sace pana avisesetvā ‘‘aṭṭha bhikkhū dethā’’ti vadati, saṅghato dātabbā.
நிமந்தனப⁴த்தகதா² நிட்டி²தா.
Nimantanabhattakathā niṭṭhitā.
