| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
நிமந்தனப⁴த்தகதா²
Nimantanabhattakathā
நிமந்தனங் புக்³க³லிகங் ஸங்கி⁴கஞ்சாதி து³வித⁴ங். தத்த² புக்³க³லிகங் ஸந்தா⁴ய வுத்தங் ‘‘புக்³க³லிகங் சே ஸயமேவ இஸ்ஸரோ’’தி. ‘‘எத்தகே பி⁴க்கூ² ஸங்க⁴தோ உத்³தி³ஸதா²’’திஆதீ³னி அவத்வா ‘‘எத்தகானங் பி⁴க்கூ²னங் ப⁴த்தங் க³ண்ஹதா²’’தி நிமந்தெத்வா தி³ன்னங் ஸங்கி⁴கங் நிமந்தனங் நாம. எத்தா²தி நிமந்தனே. பிண்ட³பாதிகானம்பி வட்டதீதி ‘‘பி⁴க்க²’’ந்தி கப்பியவோஹாரேன வுத்தத்தா பிண்ட³பாதிகானம்பி வட்டதி. படிபாடியாதி ஸங்க⁴தோ லத்³த⁴படிபாடியா. ஆக³தமனுஸ்ஸோ வத³தீதி ஸம்ப³ந்தோ⁴. விச்சி²ந்தி³த்வாதி ‘‘தும்ஹே ச க³ச்ச²தா²’’தி வசனங் விச்சி²ந்தி³த்வா.
Nimantanaṃ puggalikaṃ saṅghikañcāti duvidhaṃ. Tattha puggalikaṃ sandhāya vuttaṃ ‘‘puggalikaṃ ce sayameva issaro’’ti. ‘‘Ettake bhikkhū saṅghato uddisathā’’tiādīni avatvā ‘‘ettakānaṃ bhikkhūnaṃ bhattaṃ gaṇhathā’’ti nimantetvā dinnaṃ saṅghikaṃ nimantanaṃ nāma. Etthāti nimantane. Piṇḍapātikānampi vaṭṭatīti ‘‘bhikkha’’nti kappiyavohārena vuttattā piṇḍapātikānampi vaṭṭati. Paṭipāṭiyāti saṅghato laddhapaṭipāṭiyā. Āgatamanusso vadatīti sambandho. Vicchinditvāti ‘‘tumhe ca gacchathā’’ti vacanaṃ vicchinditvā.
நிமந்தனப⁴த்தக⁴ரதோதி நிமந்தனப⁴த்தஸ்ஸ தி³ன்னக⁴ரதோ. ஏகோ ஆஹரதீதி ஸம்ப³ந்தோ⁴. பூரெத்வாதி ப⁴த்தஸ்ஸ பூரெத்வா. தந்தி ப⁴த்தங். இதா⁴பீதி நிமந்தனேபி.
Nimantanabhattagharatoti nimantanabhattassa dinnagharato. Eko āharatīti sambandho. Pūretvāti bhattassa pūretvā. Tanti bhattaṃ. Idhāpīti nimantanepi.
ததோதி வத³னகாரணா. ‘‘ஸோ பி⁴க்கூ²’’தி பத³ங் ‘‘அஸ்ஸா’’தி பதே³ பகதிகத்தா, ‘‘ஜிகு³ச்ச²னீயோ’’தி பத³ங் தத்தே²வ விகதிகத்தா. அஸ்ஸாதி ப⁴வெய்ய, ஹோதி வா. ‘‘பத்தத்தா²ய ஆக³தொம்ஹீ’’தி வத³ந்தஸ்ஸ தஸ்ஸ பத்தோ தா³தப்³போ³தி யோஜனா. ப⁴த்தாஹரணகபத்தந்தி ப⁴த்தங் ஆஹரதி அனேனாதி ப⁴த்தாஹரணகோ, ஸோயேவ பத்தோ ப⁴த்தாஹரணகபத்தோ, தங். படிபாடிப⁴த்தந்தி படிபாடியா லத்³த⁴ங் ப⁴த்தங்.
Tatoti vadanakāraṇā. ‘‘So bhikkhū’’ti padaṃ ‘‘assā’’ti pade pakatikattā, ‘‘jigucchanīyo’’ti padaṃ tattheva vikatikattā. Assāti bhaveyya, hoti vā. ‘‘Pattatthāya āgatomhī’’ti vadantassa tassa patto dātabboti yojanā. Bhattāharaṇakapattanti bhattaṃ āharati anenāti bhattāharaṇako, soyeva patto bhattāharaṇakapatto, taṃ. Paṭipāṭibhattanti paṭipāṭiyā laddhaṃ bhattaṃ.
ஆலோபப⁴த்தட்டி²திகதோதி ஏகேகஆலோபேன லத்³த⁴ஸ்ஸ ப⁴த்தஸ்ஸ டி²திகதோ. ஆலோபஸங்கே²பேனாதி ஏகேகஸ்மிங் ஆலோபே தங்ஸங்கி²பனேன. அயங் நயோ உத்³தே³ஸப⁴த்ததோ விஸேஸோ. கஸ்ஸ தே ஆப⁴தந்தி கஸ்ஸ அத்தா²ய தயா ஆப⁴தந்தி யோஜனா. ஸங்க⁴ஸ்ஸ மே ப⁴த்தந்தி ஸங்க⁴ஸ்ஸ அத்தா²ய மயா ப⁴த்தங் ஆப⁴தங். தே²ரானங் மே ப⁴த்தந்தி தே²ரானங் மயா ப⁴த்தங் ஆப⁴தங்.
Ālopabhattaṭṭhitikatoti ekekaālopena laddhassa bhattassa ṭhitikato. Ālopasaṅkhepenāti ekekasmiṃ ālope taṃsaṃkhipanena. Ayaṃ nayo uddesabhattato viseso. Kassa te ābhatanti kassa atthāya tayā ābhatanti yojanā. Saṅghassa me bhattanti saṅghassa atthāya mayā bhattaṃ ābhataṃ. Therānaṃ me bhattanti therānaṃ mayā bhattaṃ ābhataṃ.
உபாஸகோ பஹிணாதீதி ஸம்ப³ந்தோ⁴. இமே தயோ ஜனாதி ஸங்க⁴த்தே²ரோ ச க³ந்த²து⁴தங்க³வஸேன அபி⁴ஞ்ஞாதோ ச ப⁴த்துத்³தே³ஸகோ சாதி இமே தயோ ஜனா. புச்சி²துந்தி ‘‘கிங் ஸங்க⁴தோ க³ண்ஹாமி, உதா³ஹு யே ஜானாமி, தேஹி ஸத்³தி⁴ங் ஆக³ச்சா²மீ’’தி புச்சி²துங். ஆருஹியித்தா²தி ஆரூள்ஹா. அத்தனவமேஹீதி அத்தா நவமோ ஏதேஸந்தி அத்தனவமா, தேஹி பி⁴க்கூ²ஹீதி ஸம்ப³ந்தோ⁴. ஹீதி யஸ்மா. ஏதே பி⁴க்கூ²தி ஸங்க⁴த்தே²ராத³யோ தயோ ஏதே பி⁴க்கூ². தேனாதி க³ந்த²து⁴தங்கா³தீ³ஹி அனபி⁴ஞ்ஞாதேன பி⁴க்கு²னா படிபஜ்ஜிதப்³ப³ந்தி ஸம்ப³ந்தோ⁴. நிஸ்ஸிதகே வா, யே பி⁴க்கூ² ஜானாத², தே பி⁴க்கூ² வா க³ஹெத்வாதி யோஜனா. அத்தனா அஞ்ஞோ கா³மோ க³ந்தப்³போ³தி ஸம்ப³ந்தோ⁴. ஸோயேவ கா³மோதி நிமந்தனகா³மோயேவ.
Upāsako pahiṇātīti sambandho. Ime tayo janāti saṅghatthero ca ganthadhutaṅgavasena abhiññāto ca bhattuddesako cāti ime tayo janā. Pucchitunti ‘‘kiṃ saṅghato gaṇhāmi, udāhu ye jānāmi, tehi saddhiṃ āgacchāmī’’ti pucchituṃ. Āruhiyitthāti ārūḷhā. Attanavamehīti attā navamo etesanti attanavamā, tehi bhikkhūhīti sambandho. Hīti yasmā. Ete bhikkhūti saṅghattherādayo tayo ete bhikkhū. Tenāti ganthadhutaṅgādīhi anabhiññātena bhikkhunā paṭipajjitabbanti sambandho. Nissitake vā, ye bhikkhū jānātha, te bhikkhū vā gahetvāti yojanā. Attanā añño gāmo gantabboti sambandho. Soyeva gāmoti nimantanagāmoyeva.
தத்ராதி அஸனஸாலாயங். உஸ்ஸவாதீ³ஸூதி ச²ணாதீ³ஸு. ஆதி³ஸத்³தே³ன அஞ்ஞேன கேனசி காரணேன மனுஸ்ஸானங் ப³ஹுஸன்னிபாதங் ஸங்க³ண்ஹாதி. ததா³தி தஸ்மிங் நிமந்தனகாலே. ஸன்னிபாதட்டா²னதோதி பி⁴க்கூ²னங் ஸன்னிபாதட்டா²னதோ. யதா²ஸத்தீதி ஸத்தியா அனுரூபங், ஸத்திங் அனதிக்கமித்வாதி அத்தோ². எத்த² ச ஸத்திஸத்³த³ஸ்ஸ குந்தஸங்கா²தஸ்ஸ ஸத்த²ஸ்ஸபி வாசகத்தா தங் படிக்கி²பந்தோ ஆஹ ‘‘யதா²ப³ல’’ந்தி.
Tatrāti asanasālāyaṃ. Ussavādīsūti chaṇādīsu. Ādisaddena aññena kenaci kāraṇena manussānaṃ bahusannipātaṃ saṅgaṇhāti. Tadāti tasmiṃ nimantanakāle. Sannipātaṭṭhānatoti bhikkhūnaṃ sannipātaṭṭhānato. Yathāsattīti sattiyā anurūpaṃ, sattiṃ anatikkamitvāti attho. Ettha ca sattisaddassa kuntasaṅkhātassa satthassapi vācakattā taṃ paṭikkhipanto āha ‘‘yathābala’’nti.
ஸங்க⁴த்தே²ரோ வா ஆக³ச்ச²ந்தீதி ஸம்ப³ந்தோ⁴. ப³ஹுகத்தாரமபெக்கி²த்வா ‘‘ஆக³ச்ச²ந்தீ’’தி ப³ஹுவசனவஸேன வுத்தங். ஏகவாரந்தி ஏகஸ்மிங் தி³வஸே, ஆக³மனதி³வஸேதி அத்தோ². படிப³த்³த⁴காலதோதி தத்தே²வ ஸகட்டா²னே வாஸஸ்ஸ நிப³த்³த⁴காலதோ. து³தியவாரேதி து³தியதி³வஸே. அபி⁴னவஆக³ந்துகாவாதி அனாக³மனபுப்³பா³ அபி⁴னவா ஆக³ந்துகாவ. தத்ராதி தஸ்மிங் பத்தட்டா²னே. தேஸந்தி அபி⁴னவஆக³ந்துகானங். எத்தா²தி அனாக³தபுப்³ப³ட்டா²னே.
Saṅghatthero vā āgacchantīti sambandho. Bahukattāramapekkhitvā ‘‘āgacchantī’’ti bahuvacanavasena vuttaṃ. Ekavāranti ekasmiṃ divase, āgamanadivaseti attho. Paṭibaddhakālatoti tattheva sakaṭṭhāne vāsassa nibaddhakālato. Dutiyavāreti dutiyadivase. Abhinavaāgantukāvāti anāgamanapubbā abhinavā āgantukāva. Tatrāti tasmiṃ pattaṭṭhāne. Tesanti abhinavaāgantukānaṃ. Etthāti anāgatapubbaṭṭhāne.
ஸப்³ப³த்தா²தி ஸப்³பே³ஸு ஸகட்டா²னஆக³ந்துகட்டா²னேஸு. தேனாதி அதிலாபி⁴னா பி⁴க்கு²னா. அவிஸேஸெத்வாதி விஸேஸமகத்வா.
Sabbatthāti sabbesu sakaṭṭhānaāgantukaṭṭhānesu. Tenāti atilābhinā bhikkhunā. Avisesetvāti visesamakatvā.
