| Library / Tipiṭaka / তিপিটক • Tipiṭaka / চূল়ৰগ্গ-অট্ঠকথা • Cūḷavagga-aṭṭhakathā |
নিমন্তনভত্তকথা
Nimantanabhattakathā
নিমন্তনং পুগ্গলিকঞ্চে, সযমেৰ ইস্সরো। সঙ্ঘিকং পন উদ্দেসভত্তে ৰুত্তনযেনেৰ গাহেতব্বং। সচে পনেত্থ দূতো ব্যত্তো হোতি, ‘‘ভন্তে , রাজগেহে ভিক্খুসঙ্ঘস্স ভত্তং গণ্হথা’’তি অৰত্ৰা ‘‘ভিক্খং গণ্হথা’’তি ৰদতি, পিণ্ডপাতিকানম্পি ৰট্টতি। অথ দূতো অব্যত্তো ‘‘ভত্তং গণ্হথা’’তি ৰদতি, ভত্তুদ্দেসকো ব্যত্তো ‘‘ভত্ত’’ন্তি অৰত্ৰা ‘‘ভন্তে, তুম্হে যাথা’’তি ৰদতি; এৰম্পি পিণ্ডপাতিকানম্পি ৰট্টতি। তুম্হাকং পটিপাটিযা ‘‘ভত্তং পাপুণাতী’’তি ৰুত্তে পন ন ৰট্টতি। সচে নিমন্তেতুং আগতমনুস্সো আসনসালং পৰিসিত্ৰা ‘‘অট্ঠ ভিক্খূ দেথা’’তি ৰা ‘‘অট্ঠ পত্তে দেথা’’তি ৰা ৰদতি; এৰম্পি পিণ্ডপাতিকানং ৰট্টতি, ‘‘তুম্হে চ তুম্হে চ গচ্ছথা’’তি ৰত্তব্বং। সচে পন ‘‘অট্ঠ ভিক্খূ দেথ; ভত্তং গণ্হথ, অট্ঠ পত্তে দেথ; ভত্তং গণ্হথা’’তি ৰদতি, পটিপাটিযা গাহেতব্বং। গাহেন্তেন পন ৰিচ্ছিন্দিত্ৰা ‘‘ভত্ত’’ন্তি অৰদন্তেন ‘‘তুম্হে চ তুম্হে চ গচ্ছথা’’তি ৰুত্তে পিণ্ডপাতিকানং ৰট্টতি। ‘‘ভন্তে, তুম্হাকং পত্তং দেথ, তুম্হে এথা’’তি ৰুত্তে পন ‘‘সাধু, উপাসকা’’তি গন্তব্বং। সঙ্ঘতো উদ্দিসিত্ৰা ‘‘তুম্হে এথা’’তি ৰুত্তেপি যথাঠিতিকায গাহেতব্বং।
Nimantanaṃ puggalikañce, sayameva issaro. Saṅghikaṃ pana uddesabhatte vuttanayeneva gāhetabbaṃ. Sace panettha dūto byatto hoti, ‘‘bhante , rājagehe bhikkhusaṅghassa bhattaṃ gaṇhathā’’ti avatvā ‘‘bhikkhaṃ gaṇhathā’’ti vadati, piṇḍapātikānampi vaṭṭati. Atha dūto abyatto ‘‘bhattaṃ gaṇhathā’’ti vadati, bhattuddesako byatto ‘‘bhatta’’nti avatvā ‘‘bhante, tumhe yāthā’’ti vadati; evampi piṇḍapātikānampi vaṭṭati. Tumhākaṃ paṭipāṭiyā ‘‘bhattaṃ pāpuṇātī’’ti vutte pana na vaṭṭati. Sace nimantetuṃ āgatamanusso āsanasālaṃ pavisitvā ‘‘aṭṭha bhikkhū dethā’’ti vā ‘‘aṭṭha patte dethā’’ti vā vadati; evampi piṇḍapātikānaṃ vaṭṭati, ‘‘tumhe ca tumhe ca gacchathā’’ti vattabbaṃ. Sace pana ‘‘aṭṭha bhikkhū detha; bhattaṃ gaṇhatha, aṭṭha patte detha; bhattaṃ gaṇhathā’’ti vadati, paṭipāṭiyā gāhetabbaṃ. Gāhentena pana vicchinditvā ‘‘bhatta’’nti avadantena ‘‘tumhe ca tumhe ca gacchathā’’ti vutte piṇḍapātikānaṃ vaṭṭati. ‘‘Bhante, tumhākaṃ pattaṃ detha, tumhe ethā’’ti vutte pana ‘‘sādhu, upāsakā’’ti gantabbaṃ. Saṅghato uddisitvā ‘‘tumhe ethā’’ti vuttepi yathāṭhitikāya gāhetabbaṃ.
নিমন্তনভত্তঘরতো পন পত্তত্থায আগতস্স উদ্দেসভত্তে ৰুত্তনযেনেৰ ঠিতিকায পত্তো দাতব্বো। একো ‘‘সঙ্ঘতো পটিপাটিযা পত্ত’’ন্তি অৰত্ৰা কেৰলং ‘‘একং পত্তং দেথা’’তি ৰত্ৰা অগাহিতেযেৰ পত্তে যস্স কস্সচি পত্তং গহেত্ৰা পূরেত্ৰা আহরতি, তং পত্তসামিকস্সেৰ হোতি, উদ্দেসভত্তে ৰিয ঠিতিকায ন গাহেতব্বং। ইধাপি যো আগন্ত্ৰা তুণ্হীভূতো তিট্ঠতি, সো ‘‘কস্স সন্তিকং আগতোসী’’তি ৰা ‘‘কস্স পত্তং হরিস্সসী’’তি ৰা ন ৰত্তব্বো।
Nimantanabhattagharato pana pattatthāya āgatassa uddesabhatte vuttanayeneva ṭhitikāya patto dātabbo. Eko ‘‘saṅghato paṭipāṭiyā patta’’nti avatvā kevalaṃ ‘‘ekaṃ pattaṃ dethā’’ti vatvā agāhiteyeva patte yassa kassaci pattaṃ gahetvā pūretvā āharati, taṃ pattasāmikasseva hoti, uddesabhatte viya ṭhitikāya na gāhetabbaṃ. Idhāpi yo āgantvā tuṇhībhūto tiṭṭhati, so ‘‘kassa santikaṃ āgatosī’’ti vā ‘‘kassa pattaṃ harissasī’’ti vā na vattabbo.
পুচ্ছাসভাগেন হি ‘‘তুম্হাকং সন্তিকং আগতো, তুম্হাকং পত্তং হরিস্সামী’’তি ৰদেয্য, ততো সো ভিক্খু ভিক্খূহি জিগুচ্ছনীযো অস্স। ‘‘কুহিং গচ্ছসি, কিং করোন্তো আহিণ্ডসী’’তি পন ৰুত্তে ‘‘তস্স পত্তত্থায আগতোম্হী’’তি ৰদন্তস্স পটিপাটিযা ভত্তট্ঠিতিকায গাহেত্ৰা পত্তো দাতব্বো। ‘‘ভত্তাহরণকপত্তং দেথা’’তি ৰুত্তেপি পটিপাটিযা ভত্তট্ঠিতিকায এৰ দাতব্বো। সচে আহরিত্ৰা ‘‘সব্বো সঙ্ঘো ভুঞ্জতূ’’তি ৰদতি, ভাজেত্ৰা ভুঞ্জিতব্বং। পত্তসামিকস্স অতিক্কন্তম্পি ঠিতিকং ঠপেত্ৰা অঞ্ঞং পটিপাটিভত্তং গাহেতব্বং।
Pucchāsabhāgena hi ‘‘tumhākaṃ santikaṃ āgato, tumhākaṃ pattaṃ harissāmī’’ti vadeyya, tato so bhikkhu bhikkhūhi jigucchanīyo assa. ‘‘Kuhiṃ gacchasi, kiṃ karonto āhiṇḍasī’’ti pana vutte ‘‘tassa pattatthāya āgatomhī’’ti vadantassa paṭipāṭiyā bhattaṭṭhitikāya gāhetvā patto dātabbo. ‘‘Bhattāharaṇakapattaṃ dethā’’ti vuttepi paṭipāṭiyā bhattaṭṭhitikāya eva dātabbo. Sace āharitvā ‘‘sabbo saṅgho bhuñjatū’’ti vadati, bhājetvā bhuñjitabbaṃ. Pattasāmikassa atikkantampi ṭhitikaṃ ṭhapetvā aññaṃ paṭipāṭibhattaṃ gāhetabbaṃ.
একো পাতিযা ভত্তং আহরিত্ৰা ‘‘সঙ্ঘস্স দম্মী’’তি ৰদতি, আলোপভত্তট্ঠিতিকতো পট্ঠায আলোপসঙ্খেপেন ভাজেতব্বং। সচে পন তুণ্হীভূতো অচ্ছতি, ‘‘কস্স তে আভতং, কস্স দাতুকামোসী’’তি ন ৰত্তব্বো। সচে পন ‘‘কুহিং গচ্ছসি, কিং করোন্তো আহিণ্ডসী’’তি ৰুত্তে ‘‘সঙ্ঘস্স মে ভত্তং আভতং, থেরানং মে ভত্তং আভত’’ন্তি ৰদতি, গহেত্ৰা আলোপভত্তট্ঠিতিকায ভাজেতব্বং। সচে পন এৰং আভতং বহুং হোতি, সকলস্স সঙ্ঘস্স বহু হোতি, অভিহটভিক্খা নাম পিণ্ডপাতিকানম্পি ৰট্টতি, ঠিতিকাপুচ্ছনকিচ্চং নত্থি, থেরাসনতো পট্ঠায পত্তং পূরেত্ৰা দাতব্বং।
Eko pātiyā bhattaṃ āharitvā ‘‘saṅghassa dammī’’ti vadati, ālopabhattaṭṭhitikato paṭṭhāya ālopasaṅkhepena bhājetabbaṃ. Sace pana tuṇhībhūto acchati, ‘‘kassa te ābhataṃ, kassa dātukāmosī’’ti na vattabbo. Sace pana ‘‘kuhiṃ gacchasi, kiṃ karonto āhiṇḍasī’’ti vutte ‘‘saṅghassa me bhattaṃ ābhataṃ, therānaṃ me bhattaṃ ābhata’’nti vadati, gahetvā ālopabhattaṭṭhitikāya bhājetabbaṃ. Sace pana evaṃ ābhataṃ bahuṃ hoti, sakalassa saṅghassa bahu hoti, abhihaṭabhikkhā nāma piṇḍapātikānampi vaṭṭati, ṭhitikāpucchanakiccaṃ natthi, therāsanato paṭṭhāya pattaṃ pūretvā dātabbaṃ.
উপাসকো সঙ্ঘত্থেরস্স ৰা গন্থধুতঙ্গৰসেন অভিঞ্ঞাতস্স ৰা ভত্তুদ্দেসকস্স ৰা পহিণাতি ‘‘অম্হাকং ভত্তগহণত্থায অট্ঠ ভিক্খূ গহেত্ৰা আগচ্ছথা’’তি, সচেপি ঞাতিউপট্ঠাকেহি পেসিতং হোতি, ইমে তযো জনা পুচ্ছিতুং ন লভন্তি, আরুল়্হাযেৰ মাতিকং, সঙ্ঘতো অট্ঠ ভিক্খূ উদ্দিসাপেত্ৰা অত্তনৰমেহি গন্তব্বং। কস্মা? ভিক্খুসঙ্ঘস্স হি এতে ভিক্খূ নিস্সায লাভো উপ্পজ্জতীতি। গন্থধুতঙ্গাদীহি পন অনভিঞ্ঞাতো আৰাসিকভিক্খু পুচ্ছিতুং লভতি, তস্মা তেন ‘‘কিং সঙ্ঘতো গণ্হামি, উদাহু যে জানামি, তেহি সদ্ধিং আগচ্ছামী’’তি মাতিকং আরোপেত্ৰা যথা দাযকা ৰদন্তি, তথা পটিপজ্জিতব্বং। ‘‘তুম্হাকং নিস্সিতকে ৰা যে ৰা জানাথ, তে গহেত্ৰা এথা’’তি ৰুত্তে পন যে ইচ্ছন্তি, তেহি সদ্ধিং গন্তুং লভতি। সচে ‘‘অট্ঠ ভিক্খূ পহিণথা’’তি পেসেন্তি, সঙ্ঘতোৰ পেসেতব্বা। অত্তনা সচে অঞ্ঞস্মিং গামে সক্কা হোতি ভিক্খা লভিতুং, অঞ্ঞো গামো গন্তব্বো। ন সক্কা চে হোতি লভিতুং, সোযেৰ গামো পিণ্ডায পৰিসিতব্বো।
Upāsako saṅghattherassa vā ganthadhutaṅgavasena abhiññātassa vā bhattuddesakassa vā pahiṇāti ‘‘amhākaṃ bhattagahaṇatthāya aṭṭha bhikkhū gahetvā āgacchathā’’ti, sacepi ñātiupaṭṭhākehi pesitaṃ hoti, ime tayo janā pucchituṃ na labhanti, āruḷhāyeva mātikaṃ, saṅghato aṭṭha bhikkhū uddisāpetvā attanavamehi gantabbaṃ. Kasmā? Bhikkhusaṅghassa hi ete bhikkhū nissāya lābho uppajjatīti. Ganthadhutaṅgādīhi pana anabhiññāto āvāsikabhikkhu pucchituṃ labhati, tasmā tena ‘‘kiṃ saṅghato gaṇhāmi, udāhu ye jānāmi, tehi saddhiṃ āgacchāmī’’ti mātikaṃ āropetvā yathā dāyakā vadanti, tathā paṭipajjitabbaṃ. ‘‘Tumhākaṃ nissitake vā ye vā jānātha, te gahetvā ethā’’ti vutte pana ye icchanti, tehi saddhiṃ gantuṃ labhati. Sace ‘‘aṭṭha bhikkhū pahiṇathā’’ti pesenti, saṅghatova pesetabbā. Attanā sace aññasmiṃ gāme sakkā hoti bhikkhā labhituṃ, añño gāmo gantabbo. Na sakkā ce hoti labhituṃ, soyeva gāmo piṇḍāya pavisitabbo.
নিমন্তিতভিক্খূ আসনসালায নিসিন্না হোন্তি, তত্র চে মনুস্সা ‘‘পত্তে দেথা’’তি আগচ্ছন্তি, অনিমন্তিতেহি ন দাতব্বা। ‘‘এতে নিমন্তিতভিক্খূ’’তি ৰত্তব্বং। ‘‘তুম্হেপি দেথা’’তি ৰুত্তে পন দাতুং ৰট্টতি। উস্সৰাদীসু মনুস্সা সযমেৰ পরিৰেণানি চ পধানঘরানি চ গন্ত্ৰা তিপিটকে চ ধম্মকথিকে চ ভিক্খুসতেনপি সদ্ধিং নিমন্তেন্তি। তদা যেপি জানন্তি, তে গহেত্ৰা গন্তুং ৰট্টতি। কস্মা? ন হি মহাভিক্খুসঙ্ঘেন অত্থিকা মনুস্সা পরিৰেণানি চ পধানঘরানি গচ্ছন্তি, সন্নিপাতট্ঠানতোৰ যথাসত্তি যথাবলং ভিক্খূ গণ্হিত্ৰা গচ্ছন্তীতি।
Nimantitabhikkhū āsanasālāya nisinnā honti, tatra ce manussā ‘‘patte dethā’’ti āgacchanti, animantitehi na dātabbā. ‘‘Ete nimantitabhikkhū’’ti vattabbaṃ. ‘‘Tumhepi dethā’’ti vutte pana dātuṃ vaṭṭati. Ussavādīsu manussā sayameva pariveṇāni ca padhānagharāni ca gantvā tipiṭake ca dhammakathike ca bhikkhusatenapi saddhiṃ nimantenti. Tadā yepi jānanti, te gahetvā gantuṃ vaṭṭati. Kasmā? Na hi mahābhikkhusaṅghena atthikā manussā pariveṇāni ca padhānagharāni gacchanti, sannipātaṭṭhānatova yathāsatti yathābalaṃ bhikkhū gaṇhitvā gacchantīti.
সচে পন সঙ্ঘত্থেরো ৰা গন্থধুতঙ্গৰসেন অভিঞ্ঞাতকো ৰা ভত্তুদ্দেসকো ৰা অঞ্ঞত্র ৰা ৰস্সং ৰসিত্ৰা কত্থচি ৰা গন্ত্ৰা পুন সকট্ঠানং আগচ্ছন্তি, মনুস্সা চ আগন্তুকস্স সক্কারং করোন্তি, একৰারং যে জানন্তি, তে গহেত্ৰা গন্তব্বং। পটিবদ্ধকালতো পন পট্ঠায দুতিযৰারে আরদ্ধে সঙ্ঘতোযেৰ গহেত্ৰা গন্তব্বং। অভিনৰআগন্তুকাৰ হুত্ৰা ঞাতী ৰা উপট্ঠাকে ৰা পস্সিস্সামাতি গচ্ছন্তি, তত্র তেসং ঞাতী চ উপট্ঠাকা চ সক্কারং করোন্তি। এত্থ পন যে জানন্তি, তে গহেত্ৰা গন্তুং ৰট্টতি।
Sace pana saṅghatthero vā ganthadhutaṅgavasena abhiññātako vā bhattuddesako vā aññatra vā vassaṃ vasitvā katthaci vā gantvā puna sakaṭṭhānaṃ āgacchanti, manussā ca āgantukassa sakkāraṃ karonti, ekavāraṃ ye jānanti, te gahetvā gantabbaṃ. Paṭibaddhakālato pana paṭṭhāya dutiyavāre āraddhe saṅghatoyeva gahetvā gantabbaṃ. Abhinavaāgantukāva hutvā ñātī vā upaṭṭhāke vā passissāmāti gacchanti, tatra tesaṃ ñātī ca upaṭṭhākā ca sakkāraṃ karonti. Ettha pana ye jānanti, te gahetvā gantuṃ vaṭṭati.
যো পন অতিলাভী হোতি, সকট্ঠানঞ্চ আগন্তুকট্ঠানঞ্চ একসদিসং, সব্বত্থ মনুস্সা সঙ্ঘভত্তং সজ্জেত্ৰাৰ নিসীদন্তি, তেন সঙ্ঘতোৰ গহেত্ৰা গন্তব্বন্তি অযং নিমন্তনে ৰিসেসো। অৰসেসো সব্বপঞ্হো উদ্দেসভত্তে ৰুত্তনযেনেৰ ৰেদিতব্বো। কুরুন্দিযং পন ‘‘অট্ঠ মহাথেরে দেথা’’তি ৰুত্তে ‘‘অট্ঠ মহাথেরাৰ দাতব্বা’’তি ৰুত্তং। এস নযো মজ্ঝিমাদীসু। সচে পন অৰিসেসেত্ৰা ‘‘অট্ঠ ভিক্খূ দেথা’’তি ৰদতি, সঙ্ঘতো দাতব্বা।
Yo pana atilābhī hoti, sakaṭṭhānañca āgantukaṭṭhānañca ekasadisaṃ, sabbattha manussā saṅghabhattaṃ sajjetvāva nisīdanti, tena saṅghatova gahetvā gantabbanti ayaṃ nimantane viseso. Avaseso sabbapañho uddesabhatte vuttanayeneva veditabbo. Kurundiyaṃ pana ‘‘aṭṭha mahāthere dethā’’ti vutte ‘‘aṭṭha mahātherāva dātabbā’’ti vuttaṃ. Esa nayo majjhimādīsu. Sace pana avisesetvā ‘‘aṭṭha bhikkhū dethā’’ti vadati, saṅghato dātabbā.
নিমন্তনভত্তকথা নিট্ঠিতা।
Nimantanabhattakathā niṭṭhitā.
