| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
ನಿಮನ್ತನಭತ್ತಕಥಾ
Nimantanabhattakathā
ನಿಮನ್ತನಂ ಪುಗ್ಗಲಿಕಂ ಸಙ್ಘಿಕಞ್ಚಾತಿ ದುವಿಧಂ। ತತ್ಥ ಪುಗ್ಗಲಿಕಂ ಸನ್ಧಾಯ ವುತ್ತಂ ‘‘ಪುಗ್ಗಲಿಕಂ ಚೇ ಸಯಮೇವ ಇಸ್ಸರೋ’’ತಿ। ‘‘ಏತ್ತಕೇ ಭಿಕ್ಖೂ ಸಙ್ಘತೋ ಉದ್ದಿಸಥಾ’’ತಿಆದೀನಿ ಅವತ್ವಾ ‘‘ಏತ್ತಕಾನಂ ಭಿಕ್ಖೂನಂ ಭತ್ತಂ ಗಣ್ಹಥಾ’’ತಿ ನಿಮನ್ತೇತ್ವಾ ದಿನ್ನಂ ಸಙ್ಘಿಕಂ ನಿಮನ್ತನಂ ನಾಮ। ಏತ್ಥಾತಿ ನಿಮನ್ತನೇ। ಪಿಣ್ಡಪಾತಿಕಾನಮ್ಪಿ ವಟ್ಟತೀತಿ ‘‘ಭಿಕ್ಖ’’ನ್ತಿ ಕಪ್ಪಿಯವೋಹಾರೇನ ವುತ್ತತ್ತಾ ಪಿಣ್ಡಪಾತಿಕಾನಮ್ಪಿ ವಟ್ಟತಿ। ಪಟಿಪಾಟಿಯಾತಿ ಸಙ್ಘತೋ ಲದ್ಧಪಟಿಪಾಟಿಯಾ। ಆಗತಮನುಸ್ಸೋ ವದತೀತಿ ಸಮ್ಬನ್ಧೋ। ವಿಚ್ಛಿನ್ದಿತ್ವಾತಿ ‘‘ತುಮ್ಹೇ ಚ ಗಚ್ಛಥಾ’’ತಿ ವಚನಂ ವಿಚ್ಛಿನ್ದಿತ್ವಾ।
Nimantanaṃ puggalikaṃ saṅghikañcāti duvidhaṃ. Tattha puggalikaṃ sandhāya vuttaṃ ‘‘puggalikaṃ ce sayameva issaro’’ti. ‘‘Ettake bhikkhū saṅghato uddisathā’’tiādīni avatvā ‘‘ettakānaṃ bhikkhūnaṃ bhattaṃ gaṇhathā’’ti nimantetvā dinnaṃ saṅghikaṃ nimantanaṃ nāma. Etthāti nimantane. Piṇḍapātikānampi vaṭṭatīti ‘‘bhikkha’’nti kappiyavohārena vuttattā piṇḍapātikānampi vaṭṭati. Paṭipāṭiyāti saṅghato laddhapaṭipāṭiyā. Āgatamanusso vadatīti sambandho. Vicchinditvāti ‘‘tumhe ca gacchathā’’ti vacanaṃ vicchinditvā.
ನಿಮನ್ತನಭತ್ತಘರತೋತಿ ನಿಮನ್ತನಭತ್ತಸ್ಸ ದಿನ್ನಘರತೋ। ಏಕೋ ಆಹರತೀತಿ ಸಮ್ಬನ್ಧೋ। ಪೂರೇತ್ವಾತಿ ಭತ್ತಸ್ಸ ಪೂರೇತ್ವಾ। ತನ್ತಿ ಭತ್ತಂ। ಇಧಾಪೀತಿ ನಿಮನ್ತನೇಪಿ।
Nimantanabhattagharatoti nimantanabhattassa dinnagharato. Eko āharatīti sambandho. Pūretvāti bhattassa pūretvā. Tanti bhattaṃ. Idhāpīti nimantanepi.
ತತೋತಿ ವದನಕಾರಣಾ। ‘‘ಸೋ ಭಿಕ್ಖೂ’’ತಿ ಪದಂ ‘‘ಅಸ್ಸಾ’’ತಿ ಪದೇ ಪಕತಿಕತ್ತಾ, ‘‘ಜಿಗುಚ್ಛನೀಯೋ’’ತಿ ಪದಂ ತತ್ಥೇವ ವಿಕತಿಕತ್ತಾ। ಅಸ್ಸಾತಿ ಭವೇಯ್ಯ, ಹೋತಿ ವಾ। ‘‘ಪತ್ತತ್ಥಾಯ ಆಗತೋಮ್ಹೀ’’ತಿ ವದನ್ತಸ್ಸ ತಸ್ಸ ಪತ್ತೋ ದಾತಬ್ಬೋತಿ ಯೋಜನಾ। ಭತ್ತಾಹರಣಕಪತ್ತನ್ತಿ ಭತ್ತಂ ಆಹರತಿ ಅನೇನಾತಿ ಭತ್ತಾಹರಣಕೋ, ಸೋಯೇವ ಪತ್ತೋ ಭತ್ತಾಹರಣಕಪತ್ತೋ, ತಂ। ಪಟಿಪಾಟಿಭತ್ತನ್ತಿ ಪಟಿಪಾಟಿಯಾ ಲದ್ಧಂ ಭತ್ತಂ।
Tatoti vadanakāraṇā. ‘‘So bhikkhū’’ti padaṃ ‘‘assā’’ti pade pakatikattā, ‘‘jigucchanīyo’’ti padaṃ tattheva vikatikattā. Assāti bhaveyya, hoti vā. ‘‘Pattatthāya āgatomhī’’ti vadantassa tassa patto dātabboti yojanā. Bhattāharaṇakapattanti bhattaṃ āharati anenāti bhattāharaṇako, soyeva patto bhattāharaṇakapatto, taṃ. Paṭipāṭibhattanti paṭipāṭiyā laddhaṃ bhattaṃ.
ಆಲೋಪಭತ್ತಟ್ಠಿತಿಕತೋತಿ ಏಕೇಕಆಲೋಪೇನ ಲದ್ಧಸ್ಸ ಭತ್ತಸ್ಸ ಠಿತಿಕತೋ। ಆಲೋಪಸಙ್ಖೇಪೇನಾತಿ ಏಕೇಕಸ್ಮಿಂ ಆಲೋಪೇ ತಂಸಂಖಿಪನೇನ। ಅಯಂ ನಯೋ ಉದ್ದೇಸಭತ್ತತೋ ವಿಸೇಸೋ। ಕಸ್ಸ ತೇ ಆಭತನ್ತಿ ಕಸ್ಸ ಅತ್ಥಾಯ ತಯಾ ಆಭತನ್ತಿ ಯೋಜನಾ। ಸಙ್ಘಸ್ಸ ಮೇ ಭತ್ತನ್ತಿ ಸಙ್ಘಸ್ಸ ಅತ್ಥಾಯ ಮಯಾ ಭತ್ತಂ ಆಭತಂ। ಥೇರಾನಂ ಮೇ ಭತ್ತನ್ತಿ ಥೇರಾನಂ ಮಯಾ ಭತ್ತಂ ಆಭತಂ।
Ālopabhattaṭṭhitikatoti ekekaālopena laddhassa bhattassa ṭhitikato. Ālopasaṅkhepenāti ekekasmiṃ ālope taṃsaṃkhipanena. Ayaṃ nayo uddesabhattato viseso. Kassa te ābhatanti kassa atthāya tayā ābhatanti yojanā. Saṅghassa me bhattanti saṅghassa atthāya mayā bhattaṃ ābhataṃ. Therānaṃ me bhattanti therānaṃ mayā bhattaṃ ābhataṃ.
ಉಪಾಸಕೋ ಪಹಿಣಾತೀತಿ ಸಮ್ಬನ್ಧೋ। ಇಮೇ ತಯೋ ಜನಾತಿ ಸಙ್ಘತ್ಥೇರೋ ಚ ಗನ್ಥಧುತಙ್ಗವಸೇನ ಅಭಿಞ್ಞಾತೋ ಚ ಭತ್ತುದ್ದೇಸಕೋ ಚಾತಿ ಇಮೇ ತಯೋ ಜನಾ। ಪುಚ್ಛಿತುನ್ತಿ ‘‘ಕಿಂ ಸಙ್ಘತೋ ಗಣ್ಹಾಮಿ, ಉದಾಹು ಯೇ ಜಾನಾಮಿ, ತೇಹಿ ಸದ್ಧಿಂ ಆಗಚ್ಛಾಮೀ’’ತಿ ಪುಚ್ಛಿತುಂ। ಆರುಹಿಯಿತ್ಥಾತಿ ಆರೂಳ್ಹಾ। ಅತ್ತನವಮೇಹೀತಿ ಅತ್ತಾ ನವಮೋ ಏತೇಸನ್ತಿ ಅತ್ತನವಮಾ, ತೇಹಿ ಭಿಕ್ಖೂಹೀತಿ ಸಮ್ಬನ್ಧೋ। ಹೀತಿ ಯಸ್ಮಾ। ಏತೇ ಭಿಕ್ಖೂತಿ ಸಙ್ಘತ್ಥೇರಾದಯೋ ತಯೋ ಏತೇ ಭಿಕ್ಖೂ। ತೇನಾತಿ ಗನ್ಥಧುತಙ್ಗಾದೀಹಿ ಅನಭಿಞ್ಞಾತೇನ ಭಿಕ್ಖುನಾ ಪಟಿಪಜ್ಜಿತಬ್ಬನ್ತಿ ಸಮ್ಬನ್ಧೋ। ನಿಸ್ಸಿತಕೇ ವಾ, ಯೇ ಭಿಕ್ಖೂ ಜಾನಾಥ, ತೇ ಭಿಕ್ಖೂ ವಾ ಗಹೇತ್ವಾತಿ ಯೋಜನಾ। ಅತ್ತನಾ ಅಞ್ಞೋ ಗಾಮೋ ಗನ್ತಬ್ಬೋತಿ ಸಮ್ಬನ್ಧೋ। ಸೋಯೇವ ಗಾಮೋತಿ ನಿಮನ್ತನಗಾಮೋಯೇವ।
Upāsako pahiṇātīti sambandho. Ime tayo janāti saṅghatthero ca ganthadhutaṅgavasena abhiññāto ca bhattuddesako cāti ime tayo janā. Pucchitunti ‘‘kiṃ saṅghato gaṇhāmi, udāhu ye jānāmi, tehi saddhiṃ āgacchāmī’’ti pucchituṃ. Āruhiyitthāti ārūḷhā. Attanavamehīti attā navamo etesanti attanavamā, tehi bhikkhūhīti sambandho. Hīti yasmā. Ete bhikkhūti saṅghattherādayo tayo ete bhikkhū. Tenāti ganthadhutaṅgādīhi anabhiññātena bhikkhunā paṭipajjitabbanti sambandho. Nissitake vā, ye bhikkhū jānātha, te bhikkhū vā gahetvāti yojanā. Attanā añño gāmo gantabboti sambandho. Soyeva gāmoti nimantanagāmoyeva.
ತತ್ರಾತಿ ಅಸನಸಾಲಾಯಂ। ಉಸ್ಸವಾದೀಸೂತಿ ಛಣಾದೀಸು। ಆದಿಸದ್ದೇನ ಅಞ್ಞೇನ ಕೇನಚಿ ಕಾರಣೇನ ಮನುಸ್ಸಾನಂ ಬಹುಸನ್ನಿಪಾತಂ ಸಙ್ಗಣ್ಹಾತಿ। ತದಾತಿ ತಸ್ಮಿಂ ನಿಮನ್ತನಕಾಲೇ। ಸನ್ನಿಪಾತಟ್ಠಾನತೋತಿ ಭಿಕ್ಖೂನಂ ಸನ್ನಿಪಾತಟ್ಠಾನತೋ। ಯಥಾಸತ್ತೀತಿ ಸತ್ತಿಯಾ ಅನುರೂಪಂ, ಸತ್ತಿಂ ಅನತಿಕ್ಕಮಿತ್ವಾತಿ ಅತ್ಥೋ। ಏತ್ಥ ಚ ಸತ್ತಿಸದ್ದಸ್ಸ ಕುನ್ತಸಙ್ಖಾತಸ್ಸ ಸತ್ಥಸ್ಸಪಿ ವಾಚಕತ್ತಾ ತಂ ಪಟಿಕ್ಖಿಪನ್ತೋ ಆಹ ‘‘ಯಥಾಬಲ’’ನ್ತಿ।
Tatrāti asanasālāyaṃ. Ussavādīsūti chaṇādīsu. Ādisaddena aññena kenaci kāraṇena manussānaṃ bahusannipātaṃ saṅgaṇhāti. Tadāti tasmiṃ nimantanakāle. Sannipātaṭṭhānatoti bhikkhūnaṃ sannipātaṭṭhānato. Yathāsattīti sattiyā anurūpaṃ, sattiṃ anatikkamitvāti attho. Ettha ca sattisaddassa kuntasaṅkhātassa satthassapi vācakattā taṃ paṭikkhipanto āha ‘‘yathābala’’nti.
ಸಙ್ಘತ್ಥೇರೋ ವಾ ಆಗಚ್ಛನ್ತೀತಿ ಸಮ್ಬನ್ಧೋ। ಬಹುಕತ್ತಾರಮಪೇಕ್ಖಿತ್ವಾ ‘‘ಆಗಚ್ಛನ್ತೀ’’ತಿ ಬಹುವಚನವಸೇನ ವುತ್ತಂ। ಏಕವಾರನ್ತಿ ಏಕಸ್ಮಿಂ ದಿವಸೇ, ಆಗಮನದಿವಸೇತಿ ಅತ್ಥೋ। ಪಟಿಬದ್ಧಕಾಲತೋತಿ ತತ್ಥೇವ ಸಕಟ್ಠಾನೇ ವಾಸಸ್ಸ ನಿಬದ್ಧಕಾಲತೋ। ದುತಿಯವಾರೇತಿ ದುತಿಯದಿವಸೇ। ಅಭಿನವಆಗನ್ತುಕಾವಾತಿ ಅನಾಗಮನಪುಬ್ಬಾ ಅಭಿನವಾ ಆಗನ್ತುಕಾವ। ತತ್ರಾತಿ ತಸ್ಮಿಂ ಪತ್ತಟ್ಠಾನೇ। ತೇಸನ್ತಿ ಅಭಿನವಆಗನ್ತುಕಾನಂ। ಏತ್ಥಾತಿ ಅನಾಗತಪುಬ್ಬಟ್ಠಾನೇ।
Saṅghatthero vā āgacchantīti sambandho. Bahukattāramapekkhitvā ‘‘āgacchantī’’ti bahuvacanavasena vuttaṃ. Ekavāranti ekasmiṃ divase, āgamanadivaseti attho. Paṭibaddhakālatoti tattheva sakaṭṭhāne vāsassa nibaddhakālato. Dutiyavāreti dutiyadivase. Abhinavaāgantukāvāti anāgamanapubbā abhinavā āgantukāva. Tatrāti tasmiṃ pattaṭṭhāne. Tesanti abhinavaāgantukānaṃ. Etthāti anāgatapubbaṭṭhāne.
ಸಬ್ಬತ್ಥಾತಿ ಸಬ್ಬೇಸು ಸಕಟ್ಠಾನಆಗನ್ತುಕಟ್ಠಾನೇಸು। ತೇನಾತಿ ಅತಿಲಾಭಿನಾ ಭಿಕ್ಖುನಾ। ಅವಿಸೇಸೇತ್ವಾತಿ ವಿಸೇಸಮಕತ್ವಾ।
Sabbatthāti sabbesu sakaṭṭhānaāgantukaṭṭhānesu. Tenāti atilābhinā bhikkhunā. Avisesetvāti visesamakatvā.
