| Library / Tipiṭaka / ཏིཔིཊཀ • Tipiṭaka / པཱཙིཏྱཱདིཡོཛནཱཔཱལི༹ • Pācityādiyojanāpāḷi |
ནིམནྟནབྷཏྟཀཐཱ
Nimantanabhattakathā
ནིམནྟནཾ པུགྒལིཀཾ སངྒྷིཀཉྩཱཏི དུཝིདྷཾ། ཏཏྠ པུགྒལིཀཾ སནྡྷཱཡ ཝུཏྟཾ ‘‘པུགྒལིཀཾ ཙེ སཡམེཝ ཨིསྶརོ’’ཏི། ‘‘ཨེཏྟཀེ བྷིཀྑཱུ སངྒྷཏོ ཨུདྡིསཐཱ’’ཏིཨཱདཱིནི ཨཝཏྭཱ ‘‘ཨེཏྟཀཱནཾ བྷིཀྑཱུནཾ བྷཏྟཾ གཎྷཐཱ’’ཏི ནིམནྟེཏྭཱ དིནྣཾ སངྒྷིཀཾ ནིམནྟནཾ ནཱམ། ཨེཏྠཱཏི ནིམནྟནེ། པིཎྜཔཱཏིཀཱནམྤི ཝཊྚཏཱིཏི ‘‘བྷིཀྑ’’ནྟི ཀཔྤིཡཝོཧཱརེན ཝུཏྟཏྟཱ པིཎྜཔཱཏིཀཱནམྤི ཝཊྚཏི། པཊིཔཱཊིཡཱཏི སངྒྷཏོ ལདྡྷཔཊིཔཱཊིཡཱ། ཨཱགཏམནུསྶོ ཝདཏཱིཏི སམྦནྡྷོ། ཝིཙྪིནྡིཏྭཱཏི ‘‘ཏུམྷེ ཙ གཙྪཐཱ’’ཏི ཝཙནཾ ཝིཙྪིནྡིཏྭཱ།
Nimantanaṃ puggalikaṃ saṅghikañcāti duvidhaṃ. Tattha puggalikaṃ sandhāya vuttaṃ ‘‘puggalikaṃ ce sayameva issaro’’ti. ‘‘Ettake bhikkhū saṅghato uddisathā’’tiādīni avatvā ‘‘ettakānaṃ bhikkhūnaṃ bhattaṃ gaṇhathā’’ti nimantetvā dinnaṃ saṅghikaṃ nimantanaṃ nāma. Etthāti nimantane. Piṇḍapātikānampi vaṭṭatīti ‘‘bhikkha’’nti kappiyavohārena vuttattā piṇḍapātikānampi vaṭṭati. Paṭipāṭiyāti saṅghato laddhapaṭipāṭiyā. Āgatamanusso vadatīti sambandho. Vicchinditvāti ‘‘tumhe ca gacchathā’’ti vacanaṃ vicchinditvā.
ནིམནྟནབྷཏྟགྷརཏོཏི ནིམནྟནབྷཏྟསྶ དིནྣགྷརཏོ། ཨེཀོ ཨཱཧརཏཱིཏི སམྦནྡྷོ། པཱུརེཏྭཱཏི བྷཏྟསྶ པཱུརེཏྭཱ། ཏནྟི བྷཏྟཾ། ཨིདྷཱཔཱིཏི ནིམནྟནེཔི།
Nimantanabhattagharatoti nimantanabhattassa dinnagharato. Eko āharatīti sambandho. Pūretvāti bhattassa pūretvā. Tanti bhattaṃ. Idhāpīti nimantanepi.
ཏཏོཏི ཝདནཀཱརཎཱ། ‘‘སོ བྷིཀྑཱུ’’ཏི པདཾ ‘‘ཨསྶཱ’’ཏི པདེ པཀཏིཀཏྟཱ, ‘‘ཛིགུཙྪནཱིཡོ’’ཏི པདཾ ཏཏྠེཝ ཝིཀཏིཀཏྟཱ། ཨསྶཱཏི བྷཝེཡྻ, ཧོཏི ཝཱ། ‘‘པཏྟཏྠཱཡ ཨཱགཏོམྷཱི’’ཏི ཝདནྟསྶ ཏསྶ པཏྟོ དཱཏབྦོཏི ཡོཛནཱ། བྷཏྟཱཧརཎཀཔཏྟནྟི བྷཏྟཾ ཨཱཧརཏི ཨནེནཱཏི བྷཏྟཱཧརཎཀོ, སོཡེཝ པཏྟོ བྷཏྟཱཧརཎཀཔཏྟོ, ཏཾ། པཊིཔཱཊིབྷཏྟནྟི པཊིཔཱཊིཡཱ ལདྡྷཾ བྷཏྟཾ།
Tatoti vadanakāraṇā. ‘‘So bhikkhū’’ti padaṃ ‘‘assā’’ti pade pakatikattā, ‘‘jigucchanīyo’’ti padaṃ tattheva vikatikattā. Assāti bhaveyya, hoti vā. ‘‘Pattatthāya āgatomhī’’ti vadantassa tassa patto dātabboti yojanā. Bhattāharaṇakapattanti bhattaṃ āharati anenāti bhattāharaṇako, soyeva patto bhattāharaṇakapatto, taṃ. Paṭipāṭibhattanti paṭipāṭiyā laddhaṃ bhattaṃ.
ཨཱལོཔབྷཏྟཊྛིཏིཀཏོཏི ཨེཀེཀཨཱལོཔེན ལདྡྷསྶ བྷཏྟསྶ ཋིཏིཀཏོ། ཨཱལོཔསངྑེཔེནཱཏི ཨེཀེཀསྨིཾ ཨཱལོཔེ ཏཾསཾཁིཔནེན། ཨཡཾ ནཡོ ཨུདྡེསབྷཏྟཏོ ཝིསེསོ། ཀསྶ ཏེ ཨཱབྷཏནྟི ཀསྶ ཨཏྠཱཡ ཏཡཱ ཨཱབྷཏནྟི ཡོཛནཱ། སངྒྷསྶ མེ བྷཏྟནྟི སངྒྷསྶ ཨཏྠཱཡ མཡཱ བྷཏྟཾ ཨཱབྷཏཾ། ཐེརཱནཾ མེ བྷཏྟནྟི ཐེརཱནཾ མཡཱ བྷཏྟཾ ཨཱབྷཏཾ།
Ālopabhattaṭṭhitikatoti ekekaālopena laddhassa bhattassa ṭhitikato. Ālopasaṅkhepenāti ekekasmiṃ ālope taṃsaṃkhipanena. Ayaṃ nayo uddesabhattato viseso. Kassa te ābhatanti kassa atthāya tayā ābhatanti yojanā. Saṅghassa me bhattanti saṅghassa atthāya mayā bhattaṃ ābhataṃ. Therānaṃ me bhattanti therānaṃ mayā bhattaṃ ābhataṃ.
ཨུཔཱསཀོ པཧིཎཱཏཱིཏི སམྦནྡྷོ། ཨིམེ ཏཡོ ཛནཱཏི སངྒྷཏྠེརོ ཙ གནྠདྷུཏངྒཝསེན ཨབྷིཉྙཱཏོ ཙ བྷཏྟུདྡེསཀོ ཙཱཏི ཨིམེ ཏཡོ ཛནཱ། པུཙྪིཏུནྟི ‘‘ཀིཾ སངྒྷཏོ གཎྷཱམི, ཨུདཱཧུ ཡེ ཛཱནཱམི, ཏེཧི སདྡྷིཾ ཨཱགཙྪཱམཱི’’ཏི པུཙྪིཏུཾ། ཨཱརུཧིཡིཏྠཱཏི ཨཱརཱུལ༹ྷཱ། ཨཏྟནཝམེཧཱིཏི ཨཏྟཱ ནཝམོ ཨེཏེསནྟི ཨཏྟནཝམཱ, ཏེཧི བྷིཀྑཱུཧཱིཏི སམྦནྡྷོ། ཧཱིཏི ཡསྨཱ། ཨེཏེ བྷིཀྑཱུཏི སངྒྷཏྠེརཱདཡོ ཏཡོ ཨེཏེ བྷིཀྑཱུ། ཏེནཱཏི གནྠདྷུཏངྒཱདཱིཧི ཨནབྷིཉྙཱཏེན བྷིཀྑུནཱ པཊིཔཛྫིཏབྦནྟི སམྦནྡྷོ། ནིསྶིཏཀེ ཝཱ, ཡེ བྷིཀྑཱུ ཛཱནཱཐ, ཏེ བྷིཀྑཱུ ཝཱ གཧེཏྭཱཏི ཡོཛནཱ། ཨཏྟནཱ ཨཉྙོ གཱམོ གནྟབྦོཏི སམྦནྡྷོ། སོཡེཝ གཱམོཏི ནིམནྟནགཱམོཡེཝ།
Upāsako pahiṇātīti sambandho. Ime tayo janāti saṅghatthero ca ganthadhutaṅgavasena abhiññāto ca bhattuddesako cāti ime tayo janā. Pucchitunti ‘‘kiṃ saṅghato gaṇhāmi, udāhu ye jānāmi, tehi saddhiṃ āgacchāmī’’ti pucchituṃ. Āruhiyitthāti ārūḷhā. Attanavamehīti attā navamo etesanti attanavamā, tehi bhikkhūhīti sambandho. Hīti yasmā. Ete bhikkhūti saṅghattherādayo tayo ete bhikkhū. Tenāti ganthadhutaṅgādīhi anabhiññātena bhikkhunā paṭipajjitabbanti sambandho. Nissitake vā, ye bhikkhū jānātha, te bhikkhū vā gahetvāti yojanā. Attanā añño gāmo gantabboti sambandho. Soyeva gāmoti nimantanagāmoyeva.
ཏཏྲཱཏི ཨསནསཱལཱཡཾ། ཨུསྶཝཱདཱིསཱུཏི ཚཎཱདཱིསུ། ཨཱདིསདྡེན ཨཉྙེན ཀེནཙི ཀཱརཎེན མནུསྶཱནཾ བཧུསནྣིཔཱཏཾ སངྒཎྷཱཏི། ཏདཱཏི ཏསྨིཾ ནིམནྟནཀཱལེ། སནྣིཔཱཏཊྛཱནཏོཏི བྷིཀྑཱུནཾ སནྣིཔཱཏཊྛཱནཏོ། ཡཐཱསཏྟཱིཏི སཏྟིཡཱ ཨནུརཱུཔཾ, སཏྟིཾ ཨནཏིཀྐམིཏྭཱཏི ཨཏྠོ། ཨེཏྠ ཙ སཏྟིསདྡསྶ ཀུནྟསངྑཱཏསྶ སཏྠསྶཔི ཝཱཙཀཏྟཱ ཏཾ པཊིཀྑིཔནྟོ ཨཱཧ ‘‘ཡཐཱབལ’’ནྟི།
Tatrāti asanasālāyaṃ. Ussavādīsūti chaṇādīsu. Ādisaddena aññena kenaci kāraṇena manussānaṃ bahusannipātaṃ saṅgaṇhāti. Tadāti tasmiṃ nimantanakāle. Sannipātaṭṭhānatoti bhikkhūnaṃ sannipātaṭṭhānato. Yathāsattīti sattiyā anurūpaṃ, sattiṃ anatikkamitvāti attho. Ettha ca sattisaddassa kuntasaṅkhātassa satthassapi vācakattā taṃ paṭikkhipanto āha ‘‘yathābala’’nti.
སངྒྷཏྠེརོ ཝཱ ཨཱགཙྪནྟཱིཏི སམྦནྡྷོ། བཧུཀཏྟཱརམཔེཀྑིཏྭཱ ‘‘ཨཱགཙྪནྟཱི’’ཏི བཧུཝཙནཝསེན ཝུཏྟཾ། ཨེཀཝཱརནྟི ཨེཀསྨིཾ དིཝསེ, ཨཱགམནདིཝསེཏི ཨཏྠོ། པཊིབདྡྷཀཱལཏོཏི ཏཏྠེཝ སཀཊྛཱནེ ཝཱསསྶ ནིབདྡྷཀཱལཏོ། དུཏིཡཝཱརེཏི དུཏིཡདིཝསེ། ཨབྷིནཝཨཱགནྟུཀཱཝཱཏི ཨནཱགམནཔུབྦཱ ཨབྷིནཝཱ ཨཱགནྟུཀཱཝ། ཏཏྲཱཏི ཏསྨིཾ པཏྟཊྛཱནེ། ཏེསནྟི ཨབྷིནཝཨཱགནྟུཀཱནཾ། ཨེཏྠཱཏི ཨནཱགཏཔུབྦཊྛཱནེ།
Saṅghatthero vā āgacchantīti sambandho. Bahukattāramapekkhitvā ‘‘āgacchantī’’ti bahuvacanavasena vuttaṃ. Ekavāranti ekasmiṃ divase, āgamanadivaseti attho. Paṭibaddhakālatoti tattheva sakaṭṭhāne vāsassa nibaddhakālato. Dutiyavāreti dutiyadivase. Abhinavaāgantukāvāti anāgamanapubbā abhinavā āgantukāva. Tatrāti tasmiṃ pattaṭṭhāne. Tesanti abhinavaāgantukānaṃ. Etthāti anāgatapubbaṭṭhāne.
སབྦཏྠཱཏི སབྦེསུ སཀཊྛཱནཨཱགནྟུཀཊྛཱནེསུ། ཏེནཱཏི ཨཏིལཱབྷིནཱ བྷིཀྑུནཱ། ཨཝིསེསེཏྭཱཏི ཝིསེསམཀཏྭཱ།
Sabbatthāti sabbesu sakaṭṭhānaāgantukaṭṭhānesu. Tenāti atilābhinā bhikkhunā. Avisesetvāti visesamakatvā.
