| Library / Tipiṭaka / ਤਿਪਿਟਕ • Tipiṭaka / ਚੂਲ਼વਗ੍ਗ-ਅਟ੍ਠਕਥਾ • Cūḷavagga-aṭṭhakathā |
ਨਿਮਨ੍ਤਨਭਤ੍ਤਕਥਾ
Nimantanabhattakathā
ਨਿਮਨ੍ਤਨਂ ਪੁਗ੍ਗਲਿਕਞ੍ਚੇ, ਸਯਮੇવ ਇਸ੍ਸਰੋ। ਸਙ੍ਘਿਕਂ ਪਨ ਉਦ੍ਦੇਸਭਤ੍ਤੇ વੁਤ੍ਤਨਯੇਨੇવ ਗਾਹੇਤਬ੍ਬਂ। ਸਚੇ ਪਨੇਤ੍ਥ ਦੂਤੋ ਬ੍ਯਤ੍ਤੋ ਹੋਤਿ, ‘‘ਭਨ੍ਤੇ , ਰਾਜਗੇਹੇ ਭਿਕ੍ਖੁਸਙ੍ਘਸ੍ਸ ਭਤ੍ਤਂ ਗਣ੍ਹਥਾ’’ਤਿ ਅવਤ੍વਾ ‘‘ਭਿਕ੍ਖਂ ਗਣ੍ਹਥਾ’’ਤਿ વਦਤਿ, ਪਿਣ੍ਡਪਾਤਿਕਾਨਮ੍ਪਿ વਟ੍ਟਤਿ। ਅਥ ਦੂਤੋ ਅਬ੍ਯਤ੍ਤੋ ‘‘ਭਤ੍ਤਂ ਗਣ੍ਹਥਾ’’ਤਿ વਦਤਿ, ਭਤ੍ਤੁਦ੍ਦੇਸਕੋ ਬ੍ਯਤ੍ਤੋ ‘‘ਭਤ੍ਤ’’ਨ੍ਤਿ ਅવਤ੍વਾ ‘‘ਭਨ੍ਤੇ, ਤੁਮ੍ਹੇ ਯਾਥਾ’’ਤਿ વਦਤਿ; ਏવਮ੍ਪਿ ਪਿਣ੍ਡਪਾਤਿਕਾਨਮ੍ਪਿ વਟ੍ਟਤਿ। ਤੁਮ੍ਹਾਕਂ ਪਟਿਪਾਟਿਯਾ ‘‘ਭਤ੍ਤਂ ਪਾਪੁਣਾਤੀ’’ਤਿ વੁਤ੍ਤੇ ਪਨ ਨ વਟ੍ਟਤਿ। ਸਚੇ ਨਿਮਨ੍ਤੇਤੁਂ ਆਗਤਮਨੁਸ੍ਸੋ ਆਸਨਸਾਲਂ ਪવਿਸਿਤ੍વਾ ‘‘ਅਟ੍ਠ ਭਿਕ੍ਖੂ ਦੇਥਾ’’ਤਿ વਾ ‘‘ਅਟ੍ਠ ਪਤ੍ਤੇ ਦੇਥਾ’’ਤਿ વਾ વਦਤਿ; ਏવਮ੍ਪਿ ਪਿਣ੍ਡਪਾਤਿਕਾਨਂ વਟ੍ਟਤਿ, ‘‘ਤੁਮ੍ਹੇ ਚ ਤੁਮ੍ਹੇ ਚ ਗਚ੍ਛਥਾ’’ਤਿ વਤ੍ਤਬ੍ਬਂ। ਸਚੇ ਪਨ ‘‘ਅਟ੍ਠ ਭਿਕ੍ਖੂ ਦੇਥ; ਭਤ੍ਤਂ ਗਣ੍ਹਥ, ਅਟ੍ਠ ਪਤ੍ਤੇ ਦੇਥ; ਭਤ੍ਤਂ ਗਣ੍ਹਥਾ’’ਤਿ વਦਤਿ, ਪਟਿਪਾਟਿਯਾ ਗਾਹੇਤਬ੍ਬਂ। ਗਾਹੇਨ੍ਤੇਨ ਪਨ વਿਚ੍ਛਿਨ੍ਦਿਤ੍વਾ ‘‘ਭਤ੍ਤ’’ਨ੍ਤਿ ਅવਦਨ੍ਤੇਨ ‘‘ਤੁਮ੍ਹੇ ਚ ਤੁਮ੍ਹੇ ਚ ਗਚ੍ਛਥਾ’’ਤਿ વੁਤ੍ਤੇ ਪਿਣ੍ਡਪਾਤਿਕਾਨਂ વਟ੍ਟਤਿ। ‘‘ਭਨ੍ਤੇ, ਤੁਮ੍ਹਾਕਂ ਪਤ੍ਤਂ ਦੇਥ, ਤੁਮ੍ਹੇ ਏਥਾ’’ਤਿ વੁਤ੍ਤੇ ਪਨ ‘‘ਸਾਧੁ, ਉਪਾਸਕਾ’’ਤਿ ਗਨ੍ਤਬ੍ਬਂ। ਸਙ੍ਘਤੋ ਉਦ੍ਦਿਸਿਤ੍વਾ ‘‘ਤੁਮ੍ਹੇ ਏਥਾ’’ਤਿ વੁਤ੍ਤੇਪਿ ਯਥਾਠਿਤਿਕਾਯ ਗਾਹੇਤਬ੍ਬਂ।
Nimantanaṃ puggalikañce, sayameva issaro. Saṅghikaṃ pana uddesabhatte vuttanayeneva gāhetabbaṃ. Sace panettha dūto byatto hoti, ‘‘bhante , rājagehe bhikkhusaṅghassa bhattaṃ gaṇhathā’’ti avatvā ‘‘bhikkhaṃ gaṇhathā’’ti vadati, piṇḍapātikānampi vaṭṭati. Atha dūto abyatto ‘‘bhattaṃ gaṇhathā’’ti vadati, bhattuddesako byatto ‘‘bhatta’’nti avatvā ‘‘bhante, tumhe yāthā’’ti vadati; evampi piṇḍapātikānampi vaṭṭati. Tumhākaṃ paṭipāṭiyā ‘‘bhattaṃ pāpuṇātī’’ti vutte pana na vaṭṭati. Sace nimantetuṃ āgatamanusso āsanasālaṃ pavisitvā ‘‘aṭṭha bhikkhū dethā’’ti vā ‘‘aṭṭha patte dethā’’ti vā vadati; evampi piṇḍapātikānaṃ vaṭṭati, ‘‘tumhe ca tumhe ca gacchathā’’ti vattabbaṃ. Sace pana ‘‘aṭṭha bhikkhū detha; bhattaṃ gaṇhatha, aṭṭha patte detha; bhattaṃ gaṇhathā’’ti vadati, paṭipāṭiyā gāhetabbaṃ. Gāhentena pana vicchinditvā ‘‘bhatta’’nti avadantena ‘‘tumhe ca tumhe ca gacchathā’’ti vutte piṇḍapātikānaṃ vaṭṭati. ‘‘Bhante, tumhākaṃ pattaṃ detha, tumhe ethā’’ti vutte pana ‘‘sādhu, upāsakā’’ti gantabbaṃ. Saṅghato uddisitvā ‘‘tumhe ethā’’ti vuttepi yathāṭhitikāya gāhetabbaṃ.
ਨਿਮਨ੍ਤਨਭਤ੍ਤਘਰਤੋ ਪਨ ਪਤ੍ਤਤ੍ਥਾਯ ਆਗਤਸ੍ਸ ਉਦ੍ਦੇਸਭਤ੍ਤੇ વੁਤ੍ਤਨਯੇਨੇવ ਠਿਤਿਕਾਯ ਪਤ੍ਤੋ ਦਾਤਬ੍ਬੋ। ਏਕੋ ‘‘ਸਙ੍ਘਤੋ ਪਟਿਪਾਟਿਯਾ ਪਤ੍ਤ’’ਨ੍ਤਿ ਅવਤ੍વਾ ਕੇવਲਂ ‘‘ਏਕਂ ਪਤ੍ਤਂ ਦੇਥਾ’’ਤਿ વਤ੍વਾ ਅਗਾਹਿਤੇਯੇવ ਪਤ੍ਤੇ ਯਸ੍ਸ ਕਸ੍ਸਚਿ ਪਤ੍ਤਂ ਗਹੇਤ੍વਾ ਪੂਰੇਤ੍વਾ ਆਹਰਤਿ, ਤਂ ਪਤ੍ਤਸਾਮਿਕਸ੍ਸੇવ ਹੋਤਿ, ਉਦ੍ਦੇਸਭਤ੍ਤੇ વਿਯ ਠਿਤਿਕਾਯ ਨ ਗਾਹੇਤਬ੍ਬਂ। ਇਧਾਪਿ ਯੋ ਆਗਨ੍ਤ੍વਾ ਤੁਣ੍ਹੀਭੂਤੋ ਤਿਟ੍ਠਤਿ, ਸੋ ‘‘ਕਸ੍ਸ ਸਨ੍ਤਿਕਂ ਆਗਤੋਸੀ’’ਤਿ વਾ ‘‘ਕਸ੍ਸ ਪਤ੍ਤਂ ਹਰਿਸ੍ਸਸੀ’’ਤਿ વਾ ਨ વਤ੍ਤਬ੍ਬੋ।
Nimantanabhattagharato pana pattatthāya āgatassa uddesabhatte vuttanayeneva ṭhitikāya patto dātabbo. Eko ‘‘saṅghato paṭipāṭiyā patta’’nti avatvā kevalaṃ ‘‘ekaṃ pattaṃ dethā’’ti vatvā agāhiteyeva patte yassa kassaci pattaṃ gahetvā pūretvā āharati, taṃ pattasāmikasseva hoti, uddesabhatte viya ṭhitikāya na gāhetabbaṃ. Idhāpi yo āgantvā tuṇhībhūto tiṭṭhati, so ‘‘kassa santikaṃ āgatosī’’ti vā ‘‘kassa pattaṃ harissasī’’ti vā na vattabbo.
ਪੁਚ੍ਛਾਸਭਾਗੇਨ ਹਿ ‘‘ਤੁਮ੍ਹਾਕਂ ਸਨ੍ਤਿਕਂ ਆਗਤੋ, ਤੁਮ੍ਹਾਕਂ ਪਤ੍ਤਂ ਹਰਿਸ੍ਸਾਮੀ’’ਤਿ વਦੇਯ੍ਯ, ਤਤੋ ਸੋ ਭਿਕ੍ਖੁ ਭਿਕ੍ਖੂਹਿ ਜਿਗੁਚ੍ਛਨੀਯੋ ਅਸ੍ਸ। ‘‘ਕੁਹਿਂ ਗਚ੍ਛਸਿ, ਕਿਂ ਕਰੋਨ੍ਤੋ ਆਹਿਣ੍ਡਸੀ’’ਤਿ ਪਨ વੁਤ੍ਤੇ ‘‘ਤਸ੍ਸ ਪਤ੍ਤਤ੍ਥਾਯ ਆਗਤੋਮ੍ਹੀ’’ਤਿ વਦਨ੍ਤਸ੍ਸ ਪਟਿਪਾਟਿਯਾ ਭਤ੍ਤਟ੍ਠਿਤਿਕਾਯ ਗਾਹੇਤ੍વਾ ਪਤ੍ਤੋ ਦਾਤਬ੍ਬੋ। ‘‘ਭਤ੍ਤਾਹਰਣਕਪਤ੍ਤਂ ਦੇਥਾ’’ਤਿ વੁਤ੍ਤੇਪਿ ਪਟਿਪਾਟਿਯਾ ਭਤ੍ਤਟ੍ਠਿਤਿਕਾਯ ਏવ ਦਾਤਬ੍ਬੋ। ਸਚੇ ਆਹਰਿਤ੍વਾ ‘‘ਸਬ੍ਬੋ ਸਙ੍ਘੋ ਭੁਞ੍ਜਤੂ’’ਤਿ વਦਤਿ, ਭਾਜੇਤ੍વਾ ਭੁਞ੍ਜਿਤਬ੍ਬਂ। ਪਤ੍ਤਸਾਮਿਕਸ੍ਸ ਅਤਿਕ੍ਕਨ੍ਤਮ੍ਪਿ ਠਿਤਿਕਂ ਠਪੇਤ੍વਾ ਅਞ੍ਞਂ ਪਟਿਪਾਟਿਭਤ੍ਤਂ ਗਾਹੇਤਬ੍ਬਂ।
Pucchāsabhāgena hi ‘‘tumhākaṃ santikaṃ āgato, tumhākaṃ pattaṃ harissāmī’’ti vadeyya, tato so bhikkhu bhikkhūhi jigucchanīyo assa. ‘‘Kuhiṃ gacchasi, kiṃ karonto āhiṇḍasī’’ti pana vutte ‘‘tassa pattatthāya āgatomhī’’ti vadantassa paṭipāṭiyā bhattaṭṭhitikāya gāhetvā patto dātabbo. ‘‘Bhattāharaṇakapattaṃ dethā’’ti vuttepi paṭipāṭiyā bhattaṭṭhitikāya eva dātabbo. Sace āharitvā ‘‘sabbo saṅgho bhuñjatū’’ti vadati, bhājetvā bhuñjitabbaṃ. Pattasāmikassa atikkantampi ṭhitikaṃ ṭhapetvā aññaṃ paṭipāṭibhattaṃ gāhetabbaṃ.
ਏਕੋ ਪਾਤਿਯਾ ਭਤ੍ਤਂ ਆਹਰਿਤ੍વਾ ‘‘ਸਙ੍ਘਸ੍ਸ ਦਮ੍ਮੀ’’ਤਿ વਦਤਿ, ਆਲੋਪਭਤ੍ਤਟ੍ਠਿਤਿਕਤੋ ਪਟ੍ਠਾਯ ਆਲੋਪਸਙ੍ਖੇਪੇਨ ਭਾਜੇਤਬ੍ਬਂ। ਸਚੇ ਪਨ ਤੁਣ੍ਹੀਭੂਤੋ ਅਚ੍ਛਤਿ, ‘‘ਕਸ੍ਸ ਤੇ ਆਭਤਂ, ਕਸ੍ਸ ਦਾਤੁਕਾਮੋਸੀ’’ਤਿ ਨ વਤ੍ਤਬ੍ਬੋ। ਸਚੇ ਪਨ ‘‘ਕੁਹਿਂ ਗਚ੍ਛਸਿ, ਕਿਂ ਕਰੋਨ੍ਤੋ ਆਹਿਣ੍ਡਸੀ’’ਤਿ વੁਤ੍ਤੇ ‘‘ਸਙ੍ਘਸ੍ਸ ਮੇ ਭਤ੍ਤਂ ਆਭਤਂ, ਥੇਰਾਨਂ ਮੇ ਭਤ੍ਤਂ ਆਭਤ’’ਨ੍ਤਿ વਦਤਿ, ਗਹੇਤ੍વਾ ਆਲੋਪਭਤ੍ਤਟ੍ਠਿਤਿਕਾਯ ਭਾਜੇਤਬ੍ਬਂ। ਸਚੇ ਪਨ ਏવਂ ਆਭਤਂ ਬਹੁਂ ਹੋਤਿ, ਸਕਲਸ੍ਸ ਸਙ੍ਘਸ੍ਸ ਬਹੁ ਹੋਤਿ, ਅਭਿਹਟਭਿਕ੍ਖਾ ਨਾਮ ਪਿਣ੍ਡਪਾਤਿਕਾਨਮ੍ਪਿ વਟ੍ਟਤਿ, ਠਿਤਿਕਾਪੁਚ੍ਛਨਕਿਚ੍ਚਂ ਨਤ੍ਥਿ, ਥੇਰਾਸਨਤੋ ਪਟ੍ਠਾਯ ਪਤ੍ਤਂ ਪੂਰੇਤ੍વਾ ਦਾਤਬ੍ਬਂ।
Eko pātiyā bhattaṃ āharitvā ‘‘saṅghassa dammī’’ti vadati, ālopabhattaṭṭhitikato paṭṭhāya ālopasaṅkhepena bhājetabbaṃ. Sace pana tuṇhībhūto acchati, ‘‘kassa te ābhataṃ, kassa dātukāmosī’’ti na vattabbo. Sace pana ‘‘kuhiṃ gacchasi, kiṃ karonto āhiṇḍasī’’ti vutte ‘‘saṅghassa me bhattaṃ ābhataṃ, therānaṃ me bhattaṃ ābhata’’nti vadati, gahetvā ālopabhattaṭṭhitikāya bhājetabbaṃ. Sace pana evaṃ ābhataṃ bahuṃ hoti, sakalassa saṅghassa bahu hoti, abhihaṭabhikkhā nāma piṇḍapātikānampi vaṭṭati, ṭhitikāpucchanakiccaṃ natthi, therāsanato paṭṭhāya pattaṃ pūretvā dātabbaṃ.
ਉਪਾਸਕੋ ਸਙ੍ਘਤ੍ਥੇਰਸ੍ਸ વਾ ਗਨ੍ਥਧੁਤਙ੍ਗવਸੇਨ ਅਭਿਞ੍ਞਾਤਸ੍ਸ વਾ ਭਤ੍ਤੁਦ੍ਦੇਸਕਸ੍ਸ વਾ ਪਹਿਣਾਤਿ ‘‘ਅਮ੍ਹਾਕਂ ਭਤ੍ਤਗਹਣਤ੍ਥਾਯ ਅਟ੍ਠ ਭਿਕ੍ਖੂ ਗਹੇਤ੍વਾ ਆਗਚ੍ਛਥਾ’’ਤਿ, ਸਚੇਪਿ ਞਾਤਿਉਪਟ੍ਠਾਕੇਹਿ ਪੇਸਿਤਂ ਹੋਤਿ, ਇਮੇ ਤਯੋ ਜਨਾ ਪੁਚ੍ਛਿਤੁਂ ਨ ਲਭਨ੍ਤਿ, ਆਰੁਲ਼੍ਹਾਯੇવ ਮਾਤਿਕਂ, ਸਙ੍ਘਤੋ ਅਟ੍ਠ ਭਿਕ੍ਖੂ ਉਦ੍ਦਿਸਾਪੇਤ੍વਾ ਅਤ੍ਤਨવਮੇਹਿ ਗਨ੍ਤਬ੍ਬਂ। ਕਸ੍ਮਾ? ਭਿਕ੍ਖੁਸਙ੍ਘਸ੍ਸ ਹਿ ਏਤੇ ਭਿਕ੍ਖੂ ਨਿਸ੍ਸਾਯ ਲਾਭੋ ਉਪ੍ਪਜ੍ਜਤੀਤਿ। ਗਨ੍ਥਧੁਤਙ੍ਗਾਦੀਹਿ ਪਨ ਅਨਭਿਞ੍ਞਾਤੋ ਆવਾਸਿਕਭਿਕ੍ਖੁ ਪੁਚ੍ਛਿਤੁਂ ਲਭਤਿ, ਤਸ੍ਮਾ ਤੇਨ ‘‘ਕਿਂ ਸਙ੍ਘਤੋ ਗਣ੍ਹਾਮਿ, ਉਦਾਹੁ ਯੇ ਜਾਨਾਮਿ, ਤੇਹਿ ਸਦ੍ਧਿਂ ਆਗਚ੍ਛਾਮੀ’’ਤਿ ਮਾਤਿਕਂ ਆਰੋਪੇਤ੍વਾ ਯਥਾ ਦਾਯਕਾ વਦਨ੍ਤਿ, ਤਥਾ ਪਟਿਪਜ੍ਜਿਤਬ੍ਬਂ। ‘‘ਤੁਮ੍ਹਾਕਂ ਨਿਸ੍ਸਿਤਕੇ વਾ ਯੇ વਾ ਜਾਨਾਥ, ਤੇ ਗਹੇਤ੍વਾ ਏਥਾ’’ਤਿ વੁਤ੍ਤੇ ਪਨ ਯੇ ਇਚ੍ਛਨ੍ਤਿ, ਤੇਹਿ ਸਦ੍ਧਿਂ ਗਨ੍ਤੁਂ ਲਭਤਿ। ਸਚੇ ‘‘ਅਟ੍ਠ ਭਿਕ੍ਖੂ ਪਹਿਣਥਾ’’ਤਿ ਪੇਸੇਨ੍ਤਿ, ਸਙ੍ਘਤੋવ ਪੇਸੇਤਬ੍ਬਾ। ਅਤ੍ਤਨਾ ਸਚੇ ਅਞ੍ਞਸ੍ਮਿਂ ਗਾਮੇ ਸਕ੍ਕਾ ਹੋਤਿ ਭਿਕ੍ਖਾ ਲਭਿਤੁਂ, ਅਞ੍ਞੋ ਗਾਮੋ ਗਨ੍ਤਬ੍ਬੋ। ਨ ਸਕ੍ਕਾ ਚੇ ਹੋਤਿ ਲਭਿਤੁਂ, ਸੋਯੇવ ਗਾਮੋ ਪਿਣ੍ਡਾਯ ਪવਿਸਿਤਬ੍ਬੋ।
Upāsako saṅghattherassa vā ganthadhutaṅgavasena abhiññātassa vā bhattuddesakassa vā pahiṇāti ‘‘amhākaṃ bhattagahaṇatthāya aṭṭha bhikkhū gahetvā āgacchathā’’ti, sacepi ñātiupaṭṭhākehi pesitaṃ hoti, ime tayo janā pucchituṃ na labhanti, āruḷhāyeva mātikaṃ, saṅghato aṭṭha bhikkhū uddisāpetvā attanavamehi gantabbaṃ. Kasmā? Bhikkhusaṅghassa hi ete bhikkhū nissāya lābho uppajjatīti. Ganthadhutaṅgādīhi pana anabhiññāto āvāsikabhikkhu pucchituṃ labhati, tasmā tena ‘‘kiṃ saṅghato gaṇhāmi, udāhu ye jānāmi, tehi saddhiṃ āgacchāmī’’ti mātikaṃ āropetvā yathā dāyakā vadanti, tathā paṭipajjitabbaṃ. ‘‘Tumhākaṃ nissitake vā ye vā jānātha, te gahetvā ethā’’ti vutte pana ye icchanti, tehi saddhiṃ gantuṃ labhati. Sace ‘‘aṭṭha bhikkhū pahiṇathā’’ti pesenti, saṅghatova pesetabbā. Attanā sace aññasmiṃ gāme sakkā hoti bhikkhā labhituṃ, añño gāmo gantabbo. Na sakkā ce hoti labhituṃ, soyeva gāmo piṇḍāya pavisitabbo.
ਨਿਮਨ੍ਤਿਤਭਿਕ੍ਖੂ ਆਸਨਸਾਲਾਯ ਨਿਸਿਨ੍ਨਾ ਹੋਨ੍ਤਿ, ਤਤ੍ਰ ਚੇ ਮਨੁਸ੍ਸਾ ‘‘ਪਤ੍ਤੇ ਦੇਥਾ’’ਤਿ ਆਗਚ੍ਛਨ੍ਤਿ, ਅਨਿਮਨ੍ਤਿਤੇਹਿ ਨ ਦਾਤਬ੍ਬਾ। ‘‘ਏਤੇ ਨਿਮਨ੍ਤਿਤਭਿਕ੍ਖੂ’’ਤਿ વਤ੍ਤਬ੍ਬਂ। ‘‘ਤੁਮ੍ਹੇਪਿ ਦੇਥਾ’’ਤਿ વੁਤ੍ਤੇ ਪਨ ਦਾਤੁਂ વਟ੍ਟਤਿ। ਉਸ੍ਸવਾਦੀਸੁ ਮਨੁਸ੍ਸਾ ਸਯਮੇવ ਪਰਿવੇਣਾਨਿ ਚ ਪਧਾਨਘਰਾਨਿ ਚ ਗਨ੍ਤ੍વਾ ਤਿਪਿਟਕੇ ਚ ਧਮ੍ਮਕਥਿਕੇ ਚ ਭਿਕ੍ਖੁਸਤੇਨਪਿ ਸਦ੍ਧਿਂ ਨਿਮਨ੍ਤੇਨ੍ਤਿ। ਤਦਾ ਯੇਪਿ ਜਾਨਨ੍ਤਿ, ਤੇ ਗਹੇਤ੍વਾ ਗਨ੍ਤੁਂ વਟ੍ਟਤਿ। ਕਸ੍ਮਾ? ਨ ਹਿ ਮਹਾਭਿਕ੍ਖੁਸਙ੍ਘੇਨ ਅਤ੍ਥਿਕਾ ਮਨੁਸ੍ਸਾ ਪਰਿવੇਣਾਨਿ ਚ ਪਧਾਨਘਰਾਨਿ ਗਚ੍ਛਨ੍ਤਿ, ਸਨ੍ਨਿਪਾਤਟ੍ਠਾਨਤੋવ ਯਥਾਸਤ੍ਤਿ ਯਥਾਬਲਂ ਭਿਕ੍ਖੂ ਗਣ੍ਹਿਤ੍વਾ ਗਚ੍ਛਨ੍ਤੀਤਿ।
Nimantitabhikkhū āsanasālāya nisinnā honti, tatra ce manussā ‘‘patte dethā’’ti āgacchanti, animantitehi na dātabbā. ‘‘Ete nimantitabhikkhū’’ti vattabbaṃ. ‘‘Tumhepi dethā’’ti vutte pana dātuṃ vaṭṭati. Ussavādīsu manussā sayameva pariveṇāni ca padhānagharāni ca gantvā tipiṭake ca dhammakathike ca bhikkhusatenapi saddhiṃ nimantenti. Tadā yepi jānanti, te gahetvā gantuṃ vaṭṭati. Kasmā? Na hi mahābhikkhusaṅghena atthikā manussā pariveṇāni ca padhānagharāni gacchanti, sannipātaṭṭhānatova yathāsatti yathābalaṃ bhikkhū gaṇhitvā gacchantīti.
ਸਚੇ ਪਨ ਸਙ੍ਘਤ੍ਥੇਰੋ વਾ ਗਨ੍ਥਧੁਤਙ੍ਗવਸੇਨ ਅਭਿਞ੍ਞਾਤਕੋ વਾ ਭਤ੍ਤੁਦ੍ਦੇਸਕੋ વਾ ਅਞ੍ਞਤ੍ਰ વਾ વਸ੍ਸਂ વਸਿਤ੍વਾ ਕਤ੍ਥਚਿ વਾ ਗਨ੍ਤ੍વਾ ਪੁਨ ਸਕਟ੍ਠਾਨਂ ਆਗਚ੍ਛਨ੍ਤਿ, ਮਨੁਸ੍ਸਾ ਚ ਆਗਨ੍ਤੁਕਸ੍ਸ ਸਕ੍ਕਾਰਂ ਕਰੋਨ੍ਤਿ, ਏਕવਾਰਂ ਯੇ ਜਾਨਨ੍ਤਿ, ਤੇ ਗਹੇਤ੍વਾ ਗਨ੍ਤਬ੍ਬਂ। ਪਟਿਬਦ੍ਧਕਾਲਤੋ ਪਨ ਪਟ੍ਠਾਯ ਦੁਤਿਯવਾਰੇ ਆਰਦ੍ਧੇ ਸਙ੍ਘਤੋਯੇવ ਗਹੇਤ੍વਾ ਗਨ੍ਤਬ੍ਬਂ। ਅਭਿਨવਆਗਨ੍ਤੁਕਾવ ਹੁਤ੍વਾ ਞਾਤੀ વਾ ਉਪਟ੍ਠਾਕੇ વਾ ਪਸ੍ਸਿਸ੍ਸਾਮਾਤਿ ਗਚ੍ਛਨ੍ਤਿ, ਤਤ੍ਰ ਤੇਸਂ ਞਾਤੀ ਚ ਉਪਟ੍ਠਾਕਾ ਚ ਸਕ੍ਕਾਰਂ ਕਰੋਨ੍ਤਿ। ਏਤ੍ਥ ਪਨ ਯੇ ਜਾਨਨ੍ਤਿ, ਤੇ ਗਹੇਤ੍વਾ ਗਨ੍ਤੁਂ વਟ੍ਟਤਿ।
Sace pana saṅghatthero vā ganthadhutaṅgavasena abhiññātako vā bhattuddesako vā aññatra vā vassaṃ vasitvā katthaci vā gantvā puna sakaṭṭhānaṃ āgacchanti, manussā ca āgantukassa sakkāraṃ karonti, ekavāraṃ ye jānanti, te gahetvā gantabbaṃ. Paṭibaddhakālato pana paṭṭhāya dutiyavāre āraddhe saṅghatoyeva gahetvā gantabbaṃ. Abhinavaāgantukāva hutvā ñātī vā upaṭṭhāke vā passissāmāti gacchanti, tatra tesaṃ ñātī ca upaṭṭhākā ca sakkāraṃ karonti. Ettha pana ye jānanti, te gahetvā gantuṃ vaṭṭati.
ਯੋ ਪਨ ਅਤਿਲਾਭੀ ਹੋਤਿ, ਸਕਟ੍ਠਾਨਞ੍ਚ ਆਗਨ੍ਤੁਕਟ੍ਠਾਨਞ੍ਚ ਏਕਸਦਿਸਂ, ਸਬ੍ਬਤ੍ਥ ਮਨੁਸ੍ਸਾ ਸਙ੍ਘਭਤ੍ਤਂ ਸਜ੍ਜੇਤ੍વਾવ ਨਿਸੀਦਨ੍ਤਿ, ਤੇਨ ਸਙ੍ਘਤੋવ ਗਹੇਤ੍વਾ ਗਨ੍ਤਬ੍ਬਨ੍ਤਿ ਅਯਂ ਨਿਮਨ੍ਤਨੇ વਿਸੇਸੋ। ਅવਸੇਸੋ ਸਬ੍ਬਪਞ੍ਹੋ ਉਦ੍ਦੇਸਭਤ੍ਤੇ વੁਤ੍ਤਨਯੇਨੇવ વੇਦਿਤਬ੍ਬੋ। ਕੁਰੁਨ੍ਦਿਯਂ ਪਨ ‘‘ਅਟ੍ਠ ਮਹਾਥੇਰੇ ਦੇਥਾ’’ਤਿ વੁਤ੍ਤੇ ‘‘ਅਟ੍ਠ ਮਹਾਥੇਰਾવ ਦਾਤਬ੍ਬਾ’’ਤਿ વੁਤ੍ਤਂ। ਏਸ ਨਯੋ ਮਜ੍ਝਿਮਾਦੀਸੁ। ਸਚੇ ਪਨ ਅવਿਸੇਸੇਤ੍વਾ ‘‘ਅਟ੍ਠ ਭਿਕ੍ਖੂ ਦੇਥਾ’’ਤਿ વਦਤਿ, ਸਙ੍ਘਤੋ ਦਾਤਬ੍ਬਾ।
Yo pana atilābhī hoti, sakaṭṭhānañca āgantukaṭṭhānañca ekasadisaṃ, sabbattha manussā saṅghabhattaṃ sajjetvāva nisīdanti, tena saṅghatova gahetvā gantabbanti ayaṃ nimantane viseso. Avaseso sabbapañho uddesabhatte vuttanayeneva veditabbo. Kurundiyaṃ pana ‘‘aṭṭha mahāthere dethā’’ti vutte ‘‘aṭṭha mahātherāva dātabbā’’ti vuttaṃ. Esa nayo majjhimādīsu. Sace pana avisesetvā ‘‘aṭṭha bhikkhū dethā’’ti vadati, saṅghato dātabbā.
ਨਿਮਨ੍ਤਨਭਤ੍ਤਕਥਾ ਨਿਟ੍ਠਿਤਾ।
Nimantanabhattakathā niṭṭhitā.
