| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
நிமந்தனப⁴த்தகதா²வண்ணனா
Nimantanabhattakathāvaṇṇanā
‘‘எத்தகே பி⁴க்கூ² ஸங்க⁴தோ உத்³தி³ஸித்வா தே³தா²’’திஆதீ³னி அவத்வா ‘‘எத்தகானங் பி⁴க்கூ²னங் ப⁴த்தங் க³ண்ஹதா²’’தி வத்வா தி³ன்னங் ஸங்கி⁴கங் நிமந்தனங் நாம. பிண்ட³பாதிகானம்பி வட்டதீதி பி⁴க்கா²பரியாயேன வுத்தத்தா வட்டதி. படிபாடியாதி லத்³த⁴படிபாடியா. விச்சி²ந்தி³த்வாதி ‘‘ப⁴த்தங் க³ண்ஹதா²’’தி பத³ங் அவத்வா. தேனேவாஹ ‘‘ப⁴த்தந்தி அவத³ந்தேனா’’தி. ஆலோபஸங்கே²பேனாதி ஏகேகபிண்ட³வஸேன. அயஞ்ச நயோ நிமந்தனேயேவ, ந உத்³தே³ஸப⁴த்தே. தத்த² ஹி ஏகஸ்ஸ பஹோனகப்பமாணங்யேவ பா⁴ஜேதப்³ப³ங், தஸ்மா உத்³தே³ஸப⁴த்தே ஆலோபட்டி²திகா நாம நத்தி². அச்ச²தீதி திட்ட²தி. ‘‘ஏகவாரந்தி யாவ தஸ்மிங் ஆவாஸே வஸந்தி பி⁴க்கூ², ஸப்³பே³ லப⁴ந்தீ’’தி க³ண்டி²பதே³ஸு வுத்தங். அயங் பனெத்த² அதி⁴ப்பாயோ – ஏகவாரந்தி ந ஏகதி³வஸங் ஸந்தா⁴ய வுத்தங், யத்தகா பன பி⁴க்கூ² தஸ்மிங் ஆவாஸே வஸந்தி, தே ஸப்³பே³. ஏகஸ்மிங் தி³வஸே க³ஹிதபி⁴க்கூ² அஞ்ஞதா³ அக்³க³ஹெத்வா யாவ ஏகவாரங் ஸப்³பே³ பி⁴க்கூ² போ⁴ஜிதா ஹொந்தி, தாவ யே ஜானந்தி, தே க³ஹெத்வா க³ந்தப்³ப³ந்தி.
‘‘Ettake bhikkhū saṅghato uddisitvā dethā’’tiādīni avatvā ‘‘ettakānaṃ bhikkhūnaṃ bhattaṃ gaṇhathā’’ti vatvā dinnaṃ saṅghikaṃ nimantanaṃ nāma. Piṇḍapātikānampi vaṭṭatīti bhikkhāpariyāyena vuttattā vaṭṭati. Paṭipāṭiyāti laddhapaṭipāṭiyā. Vicchinditvāti ‘‘bhattaṃ gaṇhathā’’ti padaṃ avatvā. Tenevāha ‘‘bhattanti avadantenā’’ti. Ālopasaṅkhepenāti ekekapiṇḍavasena. Ayañca nayo nimantaneyeva, na uddesabhatte. Tattha hi ekassa pahonakappamāṇaṃyeva bhājetabbaṃ, tasmā uddesabhatte ālopaṭṭhitikā nāma natthi. Acchatīti tiṭṭhati. ‘‘Ekavāranti yāva tasmiṃ āvāse vasanti bhikkhū, sabbe labhantī’’ti gaṇṭhipadesu vuttaṃ. Ayaṃ panettha adhippāyo – ekavāranti na ekadivasaṃ sandhāya vuttaṃ, yattakā pana bhikkhū tasmiṃ āvāse vasanti, te sabbe. Ekasmiṃ divase gahitabhikkhū aññadā aggahetvā yāva ekavāraṃ sabbe bhikkhū bhojitā honti, tāva ye jānanti, te gahetvā gantabbanti.
