| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
நிமந்தனப⁴த்தகதா²வண்ணனா
Nimantanabhattakathāvaṇṇanā
விச்சி²ந்தி³த்வாதி ‘‘ப⁴த்தங் க³ண்ஹதா²’’தி பத³ங் அவத்வா. தேனேவாஹ ‘‘ப⁴த்தந்தி அவத³ந்தேனா’’தி.
Vicchinditvāti ‘‘bhattaṃ gaṇhathā’’ti padaṃ avatvā. Tenevāha ‘‘bhattanti avadantenā’’ti.
ஆலோபஸங்கே²பேனாதி ஏகேகபிண்ட³வஸேன, ஏவஞ்ச பா⁴ஜனங் உத்³தே³ஸப⁴த்தே ந வட்டதி. தத்த² ஹி ஏகஸ்ஸ பஹோனகப்பமாணேனேவ பா⁴ஜேதப்³ப³ங்.
Ālopasaṅkhepenāti ekekapiṇḍavasena, evañca bhājanaṃ uddesabhatte na vaṭṭati. Tattha hi ekassa pahonakappamāṇeneva bhājetabbaṃ.
ஆருள்ஹாயேவ மாதிகங், ஸங்க⁴தோ அட்ட² பி⁴க்கூ²தி எத்த² யே மாதிகங் ஆருள்ஹா, தே அட்ட² பி⁴க்கூ²தி யோஜேதப்³ப³ங். உத்³தே³ஸப⁴த்தனிமந்தனப⁴த்தாதி³ஸங்கி⁴கப⁴த்தமாதிகாஸு நிமந்தனப⁴த்தமாதிகாய டி²திவஸேன ஆருள்ஹே ப⁴த்துத்³தே³ஸகேன வா ஸயங் வா ஸங்க⁴தோ உத்³தி³ஸாபெத்வா க³ஹெத்வா க³ந்தப்³ப³ங், ந அத்தனோ ருசிதே க³ஹெத்வாதி அதி⁴ப்பாயோ. மாதிகங் ஆரோபெத்வாதி ‘‘ஸங்க⁴தோ க³ண்ஹாமீ’’திஆதி³னா வுத்தமாதிகாபே⁴த³ங் தா³யகஸ்ஸ விஞ்ஞாபெத்வாதி அத்தோ².
Āruḷhāyeva mātikaṃ, saṅghato aṭṭha bhikkhūti ettha ye mātikaṃ āruḷhā, te aṭṭha bhikkhūti yojetabbaṃ. Uddesabhattanimantanabhattādisaṅghikabhattamātikāsu nimantanabhattamātikāya ṭhitivasena āruḷhe bhattuddesakena vā sayaṃ vā saṅghato uddisāpetvā gahetvā gantabbaṃ, na attano rucite gahetvāti adhippāyo. Mātikaṃ āropetvāti ‘‘saṅghato gaṇhāmī’’tiādinā vuttamātikābhedaṃ dāyakassa viññāpetvāti attho.
படிப³த்³த⁴காலதோ பன பட்டா²யாதி தத்தே²வ வாஸஸ்ஸ நிப³த்³த⁴காலதோ பட்டா²ய.
Paṭibaddhakālato pana paṭṭhāyāti tattheva vāsassa nibaddhakālato paṭṭhāya.
நிமந்தனப⁴த்தகதா²வண்ணனா நிட்டி²தா.
Nimantanabhattakathāvaṇṇanā niṭṭhitā.
