| Library / Tipiṭaka / ติปิฎก • Tipiṭaka / วิมติวิโนทนี-ฎีกา • Vimativinodanī-ṭīkā |
นิมนฺตนภตฺตกถาวณฺณนา
Nimantanabhattakathāvaṇṇanā
วิจฺฉินฺทิตฺวาติ ‘‘ภตฺตํ คณฺหถา’’ติ ปทํ อวตฺวาฯ เตเนวาห ‘‘ภตฺตนฺติ อวทเนฺตนา’’ติฯ
Vicchinditvāti ‘‘bhattaṃ gaṇhathā’’ti padaṃ avatvā. Tenevāha ‘‘bhattanti avadantenā’’ti.
อาโลปสเงฺขเปนาติ เอเกกปิณฺฑวเสน, เอวญฺจ ภาชนํ อุเทฺทสภเตฺต น วฎฺฎติฯ ตตฺถ หิ เอกสฺส ปโหนกปฺปมาเณเนว ภาเชตพฺพํฯ
Ālopasaṅkhepenāti ekekapiṇḍavasena, evañca bhājanaṃ uddesabhatte na vaṭṭati. Tattha hi ekassa pahonakappamāṇeneva bhājetabbaṃ.
อารุฬฺหาเยว มาติกํ, สงฺฆโต อฎฺฐ ภิกฺขูติ เอตฺถ เย มาติกํ อารุฬฺหา, เต อฎฺฐ ภิกฺขูติ โยเชตพฺพํฯ อุเทฺทสภตฺตนิมนฺตนภตฺตาทิสงฺฆิกภตฺตมาติกาสุ นิมนฺตนภตฺตมาติกาย ฐิติวเสน อารุเฬฺห ภตฺตุเทฺทสเกน วา สยํ วา สงฺฆโต อุทฺทิสาเปตฺวา คเหตฺวา คนฺตพฺพํ, น อตฺตโน รุจิเต คเหตฺวาติ อธิปฺปาโยฯ มาติกํ อาโรเปตฺวาติ ‘‘สงฺฆโต คณฺหามี’’ติอาทินา วุตฺตมาติกาเภทํ ทายกสฺส วิญฺญาเปตฺวาติ อโตฺถฯ
Āruḷhāyeva mātikaṃ, saṅghato aṭṭha bhikkhūti ettha ye mātikaṃ āruḷhā, te aṭṭha bhikkhūti yojetabbaṃ. Uddesabhattanimantanabhattādisaṅghikabhattamātikāsu nimantanabhattamātikāya ṭhitivasena āruḷhe bhattuddesakena vā sayaṃ vā saṅghato uddisāpetvā gahetvā gantabbaṃ, na attano rucite gahetvāti adhippāyo. Mātikaṃ āropetvāti ‘‘saṅghato gaṇhāmī’’tiādinā vuttamātikābhedaṃ dāyakassa viññāpetvāti attho.
ปฎิพทฺธกาลโต ปน ปฎฺฐายาติ ตเตฺถว วาสสฺส นิพทฺธกาลโต ปฎฺฐายฯ
Paṭibaddhakālato pana paṭṭhāyāti tattheva vāsassa nibaddhakālato paṭṭhāya.
นิมนฺตนภตฺตกถาวณฺณนา นิฎฺฐิตาฯ
Nimantanabhattakathāvaṇṇanā niṭṭhitā.
