| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
১১. নিমিত্তসুত্তৰণ্ণনা
11. Nimittasuttavaṇṇanā
১০৩. একাদসমেপি অধিচিত্তং সমথৰিপস্সনাচিত্তমেৰ। তীণি নিমিত্তানীতি তীণি কারণানি। কালেন কালন্তি কালে কালে, যুত্তকালেতি অত্থো। কালেন কালং সমাধিনিমিত্তং মনসিকাতব্বন্তিআদীসু তং তং কালং সল্লক্খেত্ৰা একগ্গতায যুত্তকালে একগ্গতা মনসিকাতব্বা। একগ্গতা হি ইধ সমাধিনিমিত্তন্তি ৰুত্তা। তত্র ৰচনত্থো – সমাধিযেৰ নিমিত্তং সমাধিনিমিত্তং। সেসপদদ্ৰযেপি এসেৰ নযো। পগ্গহোতি পন ৰীরিযস্স নামং, উপেক্খাতি মজ্ঝত্তভাৰস্স। তস্মা ৰীরিযস্স যুত্তকালে ৰীরিযং মনসিকাতব্বং, মজ্ঝত্তভাৰস্স যুত্তকালে মজ্ঝত্তভাৰে ঠাতব্বন্তি। ঠানং তং চিত্তং কোসজ্জায সংৰত্তেয্যাতি কারণং ৰিজ্জতি যেন তং চিত্তং কোসজ্জভাৰে তিট্ঠেয্য। ইতরেসুপি এসেৰ নযো। উপেক্খানিমিত্তংযেৰ মনসি করেয্যাতি এত্থ চ ঞাণজৰং উপেক্খেয্যাতি অযমত্থো। আসৰানং খযাযাতি অরহত্তফলত্থায।
103. Ekādasamepi adhicittaṃ samathavipassanācittameva. Tīṇi nimittānīti tīṇi kāraṇāni. Kālena kālanti kāle kāle, yuttakāleti attho. Kālena kālaṃ samādhinimittaṃ manasikātabbantiādīsu taṃ taṃ kālaṃ sallakkhetvā ekaggatāya yuttakāle ekaggatā manasikātabbā. Ekaggatā hi idha samādhinimittanti vuttā. Tatra vacanattho – samādhiyeva nimittaṃ samādhinimittaṃ. Sesapadadvayepi eseva nayo. Paggahoti pana vīriyassa nāmaṃ, upekkhāti majjhattabhāvassa. Tasmā vīriyassa yuttakāle vīriyaṃ manasikātabbaṃ, majjhattabhāvassa yuttakāle majjhattabhāve ṭhātabbanti. Ṭhānaṃ taṃ cittaṃ kosajjāya saṃvatteyyāti kāraṇaṃ vijjati yena taṃ cittaṃ kosajjabhāve tiṭṭheyya. Itaresupi eseva nayo. Upekkhānimittaṃyeva manasi kareyyāti ettha ca ñāṇajavaṃ upekkheyyāti ayamattho. Āsavānaṃ khayāyāti arahattaphalatthāya.
উক্কং বন্ধেয্যাতি অঙ্গারকপল্লং সজ্জেয্য। আলিম্পেয্যাতি তত্থ অঙ্গারে পক্খিপিত্ৰা অগ্গিং দত্ৰা নাল়িকায ধমন্তো অগ্গিং গাহাপেয্য। উক্কামুখে পক্খিপেয্যাতি অঙ্গারে ৰিযূহিত্ৰা অঙ্গারমত্থকে ৰা ঠপেয্য, মূসায ৰা পক্খিপেয্য। অজ্ঝুপেক্খতীতি পক্কাপক্কভাৰং উপধারেতি।
Ukkaṃ bandheyyāti aṅgārakapallaṃ sajjeyya. Ālimpeyyāti tattha aṅgāre pakkhipitvā aggiṃ datvā nāḷikāya dhamanto aggiṃ gāhāpeyya. Ukkāmukhe pakkhipeyyāti aṅgāre viyūhitvā aṅgāramatthake vā ṭhapeyya, mūsāya vā pakkhipeyya. Ajjhupekkhatīti pakkāpakkabhāvaṃ upadhāreti.
সম্মা সমাধিযতি আসৰানং খযাযাতি অরহত্তফলত্থায সম্মা ঠপীযতি। এত্তাৰতা হি ৰিপস্সনং ৰড্ঢেত্ৰা অরহত্তপ্পত্তো ভিক্খু দস্সিতো। ইদানি তস্স খীণাসৰস্স অভিঞ্ঞায পটিপদং দস্সেন্তো যস্স যস্স চাতিআদিমাহ। তং হেট্ঠা ৰুত্তনযেনেৰ ৰেদিতব্বং।
Sammā samādhiyati āsavānaṃ khayāyāti arahattaphalatthāya sammā ṭhapīyati. Ettāvatā hi vipassanaṃ vaḍḍhetvā arahattappatto bhikkhu dassito. Idāni tassa khīṇāsavassa abhiññāya paṭipadaṃ dassento yassa yassa cātiādimāha. Taṃ heṭṭhā vuttanayeneva veditabbaṃ.
লোণকপল্লৰগ্গো পঞ্চমো।
Loṇakapallavaggo pañcamo.
দুতিযপণ্ণাসকং নিট্ঠিতং।
Dutiyapaṇṇāsakaṃ niṭṭhitaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১১. নিমিত্তসুত্তং • 11. Nimittasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১১. নিমিত্তসুত্তৰণ্ণনা • 11. Nimittasuttavaṇṇanā
