| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
១១. និមិត្តសុត្តវណ្ណនា
11. Nimittasuttavaṇṇanā
១០៣. ឯកាទសមេបិ អធិចិត្តំ សមថវិបស្សនាចិត្តមេវ។ តីណិ និមិត្តានីតិ តីណិ ការណានិ។ កាលេន កាលន្តិ កាលេ កាលេ, យុត្តកាលេតិ អត្ថោ។ កាលេន កាលំ សមាធិនិមិត្តំ មនសិកាតព្ពន្តិអាទីសុ តំ តំ កាលំ សល្លក្ខេត្វា ឯកគ្គតាយ យុត្តកាលេ ឯកគ្គតា មនសិកាតព្ពា។ ឯកគ្គតា ហិ ឥធ សមាធិនិមិត្តន្តិ វុត្តា។ តត្រ វចនត្ថោ – សមាធិយេវ និមិត្តំ សមាធិនិមិត្តំ។ សេសបទទ្វយេបិ ឯសេវ នយោ។ បគ្គហោតិ បន វីរិយស្ស នាមំ, ឧបេក្ខាតិ មជ្ឈត្តភាវស្ស។ តស្មា វីរិយស្ស យុត្តកាលេ វីរិយំ មនសិកាតព្ពំ, មជ្ឈត្តភាវស្ស យុត្តកាលេ មជ្ឈត្តភាវេ ឋាតព្ពន្តិ។ ឋានំ តំ ចិត្តំ កោសជ្ជាយ សំវត្តេយ្យាតិ ការណំ វិជ្ជតិ យេន តំ ចិត្តំ កោសជ្ជភាវេ តិដ្ឋេយ្យ។ ឥតរេសុបិ ឯសេវ នយោ។ ឧបេក្ខានិមិត្តំយេវ មនសិ ករេយ្យាតិ ឯត្ថ ច ញាណជវំ ឧបេក្ខេយ្យាតិ អយមត្ថោ។ អាសវានំ ខយាយាតិ អរហត្តផលត្ថាយ។
103. Ekādasamepi adhicittaṃ samathavipassanācittameva. Tīṇi nimittānīti tīṇi kāraṇāni. Kālena kālanti kāle kāle, yuttakāleti attho. Kālena kālaṃ samādhinimittaṃ manasikātabbantiādīsu taṃ taṃ kālaṃ sallakkhetvā ekaggatāya yuttakāle ekaggatā manasikātabbā. Ekaggatā hi idha samādhinimittanti vuttā. Tatra vacanattho – samādhiyeva nimittaṃ samādhinimittaṃ. Sesapadadvayepi eseva nayo. Paggahoti pana vīriyassa nāmaṃ, upekkhāti majjhattabhāvassa. Tasmā vīriyassa yuttakāle vīriyaṃ manasikātabbaṃ, majjhattabhāvassa yuttakāle majjhattabhāve ṭhātabbanti. Ṭhānaṃ taṃ cittaṃ kosajjāya saṃvatteyyāti kāraṇaṃ vijjati yena taṃ cittaṃ kosajjabhāve tiṭṭheyya. Itaresupi eseva nayo. Upekkhānimittaṃyeva manasi kareyyāti ettha ca ñāṇajavaṃ upekkheyyāti ayamattho. Āsavānaṃ khayāyāti arahattaphalatthāya.
ឧក្កំ ពន្ធេយ្យាតិ អង្គារកបល្លំ សជ្ជេយ្យ។ អាលិម្បេយ្យាតិ តត្ថ អង្គារេ បក្ខិបិត្វា អគ្គិំ ទត្វា នាឡិកាយ ធមន្តោ អគ្គិំ គាហាបេយ្យ។ ឧក្កាមុខេ បក្ខិបេយ្យាតិ អង្គារេ វិយូហិត្វា អង្គារមត្ថកេ វា ឋបេយ្យ, មូសាយ វា បក្ខិបេយ្យ។ អជ្ឈុបេក្ខតីតិ បក្កាបក្កភាវំ ឧបធារេតិ។
Ukkaṃ bandheyyāti aṅgārakapallaṃ sajjeyya. Ālimpeyyāti tattha aṅgāre pakkhipitvā aggiṃ datvā nāḷikāya dhamanto aggiṃ gāhāpeyya. Ukkāmukhe pakkhipeyyāti aṅgāre viyūhitvā aṅgāramatthake vā ṭhapeyya, mūsāya vā pakkhipeyya. Ajjhupekkhatīti pakkāpakkabhāvaṃ upadhāreti.
សម្មា សមាធិយតិ អាសវានំ ខយាយាតិ អរហត្តផលត្ថាយ សម្មា ឋបីយតិ។ ឯត្តាវតា ហិ វិបស្សនំ វឌ្ឍេត្វា អរហត្តប្បត្តោ ភិក្ខុ ទស្សិតោ។ ឥទានិ តស្ស ខីណាសវស្ស អភិញ្ញាយ បដិបទំ ទស្សេន្តោ យស្ស យស្ស ចាតិអាទិមាហ។ តំ ហេដ្ឋា វុត្តនយេនេវ វេទិតព្ពំ។
Sammā samādhiyati āsavānaṃ khayāyāti arahattaphalatthāya sammā ṭhapīyati. Ettāvatā hi vipassanaṃ vaḍḍhetvā arahattappatto bhikkhu dassito. Idāni tassa khīṇāsavassa abhiññāya paṭipadaṃ dassento yassa yassa cātiādimāha. Taṃ heṭṭhā vuttanayeneva veditabbaṃ.
លោណកបល្លវគ្គោ បញ្ចមោ។
Loṇakapallavaggo pañcamo.
ទុតិយបណ្ណាសកំ និដ្ឋិតំ។
Dutiyapaṇṇāsakaṃ niṭṭhitaṃ.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ១១. និមិត្តសុត្តំ • 11. Nimittasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១១. និមិត្តសុត្តវណ្ណនា • 11. Nimittasuttavaṇṇanā
