| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၁၁. နိမိတ္တသုတ္တဝဏ္ဏနာ
11. Nimittasuttavaṇṇanā
၁၀၃. ဧကာဒသမေပိ အဓိစိတ္တံ သမထဝိပသ္သနာစိတ္တမေဝ။ တီဏိ နိမိတ္တာနီတိ တီဏိ ကာရဏာနိ။ ကာလေန ကာလန္တိ ကာလေ ကာလေ, ယုတ္တကာလေတိ အတ္ထော။ ကာလေန ကာလံ သမာဓိနိမိတ္တံ မနသိကာတဗ္ဗန္တိအာဒီသု တံ တံ ကာလံ သလ္လက္ခေတ္ဝာ ဧကဂ္ဂတာယ ယုတ္တကာလေ ဧကဂ္ဂတာ မနသိကာတဗ္ဗာ။ ဧကဂ္ဂတာ ဟိ ဣဓ သမာဓိနိမိတ္တန္တိ ဝုတ္တာ။ တတ္ရ ဝစနတ္ထော – သမာဓိယေဝ နိမိတ္တံ သမာဓိနိမိတ္တံ။ သေသပဒဒ္ဝယေပိ ဧသေဝ နယော။ ပဂ္ဂဟောတိ ပန ဝီရိယသ္သ နာမံ, ဥပေက္ခာတိ မဇ္ဈတ္တဘာဝသ္သ။ တသ္မာ ဝီရိယသ္သ ယုတ္တကာလေ ဝီရိယံ မနသိကာတဗ္ဗံ, မဇ္ဈတ္တဘာဝသ္သ ယုတ္တကာလေ မဇ္ဈတ္တဘာဝေ ဌာတဗ္ဗန္တိ။ ဌာနံ တံ စိတ္တံ ကောသဇ္ဇာယ သံဝတ္တေယ္ယာတိ ကာရဏံ ဝိဇ္ဇတိ ယေန တံ စိတ္တံ ကောသဇ္ဇဘာဝေ တိဋ္ဌေယ္ယ။ ဣတရေသုပိ ဧသေဝ နယော။ ဥပေက္ခာနိမိတ္တံယေဝ မနသိ ကရေယ္ယာတိ ဧတ္ထ စ ဉာဏဇဝံ ဥပေက္ခေယ္ယာတိ အယမတ္ထော။ အာသဝာနံ ခယာယာတိ အရဟတ္တဖလတ္ထာယ။
103. Ekādasamepi adhicittaṃ samathavipassanācittameva. Tīṇi nimittānīti tīṇi kāraṇāni. Kālena kālanti kāle kāle, yuttakāleti attho. Kālena kālaṃ samādhinimittaṃ manasikātabbantiādīsu taṃ taṃ kālaṃ sallakkhetvā ekaggatāya yuttakāle ekaggatā manasikātabbā. Ekaggatā hi idha samādhinimittanti vuttā. Tatra vacanattho – samādhiyeva nimittaṃ samādhinimittaṃ. Sesapadadvayepi eseva nayo. Paggahoti pana vīriyassa nāmaṃ, upekkhāti majjhattabhāvassa. Tasmā vīriyassa yuttakāle vīriyaṃ manasikātabbaṃ, majjhattabhāvassa yuttakāle majjhattabhāve ṭhātabbanti. Ṭhānaṃ taṃ cittaṃ kosajjāya saṃvatteyyāti kāraṇaṃ vijjati yena taṃ cittaṃ kosajjabhāve tiṭṭheyya. Itaresupi eseva nayo. Upekkhānimittaṃyeva manasi kareyyāti ettha ca ñāṇajavaṃ upekkheyyāti ayamattho. Āsavānaṃ khayāyāti arahattaphalatthāya.
ဥက္ကံ ဗန္ဓေယ္ယာတိ အင္ဂာရကပလ္လံ သဇ္ဇေယ္ယ။ အာလိမ္ပေယ္ယာတိ တတ္ထ အင္ဂာရေ ပက္ခိပိတ္ဝာ အဂ္ဂိံ ဒတ္ဝာ နာဠိကာယ ဓမန္တော အဂ္ဂိံ ဂာဟာပေယ္ယ။ ဥက္ကာမုခေ ပက္ခိပေယ္ယာတိ အင္ဂာရေ ဝိယူဟိတ္ဝာ အင္ဂာရမတ္ထကေ ဝာ ဌပေယ္ယ, မူသာယ ဝာ ပက္ခိပေယ္ယ။ အဇ္ဈုပေက္ခတီတိ ပက္ကာပက္ကဘာဝံ ဥပဓာရေတိ။
Ukkaṃ bandheyyāti aṅgārakapallaṃ sajjeyya. Ālimpeyyāti tattha aṅgāre pakkhipitvā aggiṃ datvā nāḷikāya dhamanto aggiṃ gāhāpeyya. Ukkāmukhe pakkhipeyyāti aṅgāre viyūhitvā aṅgāramatthake vā ṭhapeyya, mūsāya vā pakkhipeyya. Ajjhupekkhatīti pakkāpakkabhāvaṃ upadhāreti.
သမ္မာ သမာဓိယတိ အာသဝာနံ ခယာယာတိ အရဟတ္တဖလတ္ထာယ သမ္မာ ဌပီယတိ။ ဧတ္တာဝတာ ဟိ ဝိပသ္သနံ ဝဍ္ဎေတ္ဝာ အရဟတ္တပ္ပတ္တော ဘိက္ခု ဒသ္သိတော။ ဣဒာနိ တသ္သ ခီဏာသဝသ္သ အဘိညာယ ပဋိပဒံ ဒသ္သေန္တော ယသ္သ ယသ္သ စာတိအာဒိမာဟ။ တံ ဟေဋ္ဌာ ဝုတ္တနယေနေဝ ဝေဒိတဗ္ဗံ။
Sammā samādhiyati āsavānaṃ khayāyāti arahattaphalatthāya sammā ṭhapīyati. Ettāvatā hi vipassanaṃ vaḍḍhetvā arahattappatto bhikkhu dassito. Idāni tassa khīṇāsavassa abhiññāya paṭipadaṃ dassento yassa yassa cātiādimāha. Taṃ heṭṭhā vuttanayeneva veditabbaṃ.
လောဏကပလ္လဝဂ္ဂော ပဉ္စမော။
Loṇakapallavaggo pañcamo.
ဒုတိယပဏ္ဏာသကံ နိဋ္ဌိတံ။
Dutiyapaṇṇāsakaṃ niṭṭhitaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၁. နိမိတ္တသုတ္တံ • 11. Nimittasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁၁. နိမိတ္တသုတ္တဝဏ္ဏနာ • 11. Nimittasuttavaṇṇanā
