| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၁၁. နိမိတ္တသုတ္တဝဏ္ဏနာ
11. Nimittasuttavaṇṇanā
၁၀၃. ဧကာဒသမေ ယေဟိ ဖလံ နိမီယတိ, ဥပ္ပဇ္ဇနဋ္ဌာနေ ပက္ခိပမာနံ ဝိယ ဟောတိ, တာနိ နိမိတ္တာနိ။ တေနာဟ ‘‘တီဏိ ကာရဏာနီ’’တိ။ ကာလေန ကာလန္တိ ဧတ္ထ ကာလေနာတိ ဘုမ္မတ္ထေ ကရဏဝစနံ။ ကာလန္တိ စ ဥပယောဂဝစနန္တိ အာဟ ‘‘ကာလေ ကာလေ’’တိ။ မနသိ ကာတဗ္ဗာတိ စိတ္တေ ကာတဗ္ဗာ, ဥပ္ပာဒေတဗ္ဗာတိ အတ္ထော။ ဥပလက္ခိတသမာဓာနာကာရော သမာဓိယေဝ ဣဓ သမာဓိနိမိတ္တန္တိ အာဟ ‘‘ဧကဂ္ဂတာ ဟိ ဣဓ သမာဓိနိမိတ္တန္တိ ဝုတ္တာ’’တိ။ ဌာနံ တံ စိတ္တံ ကောသဇ္ဇာယ သံဝတ္တေယ္ယာတိ ဧတ္ထ ဌာနံ အတ္ထီတိ ဝစနသေသော။ တံ ဘာဝနာစိတ္တံ ကောသဇ္ဇာယ သံဝတ္တေယ္ယ, တသ္သ သံဝတ္တနသ္သ ကာရဏံ အတ္ထီတိ အတ္ထော။ တံ ဝာ မနသိကရဏံ စိတ္တံ ကောသဇ္ဇာယ သံဝတ္တေယ္ယ, ဧတသ္သ ဌာနံ ကာရဏံ အတ္ထီတိ အတ္ထော။ တေနာဟ ‘‘ကာရဏံ ဝိဇ္ဇတီ’’တိအာဒိ။ ဉာဏဇဝန္တိ သင္ခာရေသု အနိစ္စာဒိဝသေန ပဝတ္တမာနံ ပညာဇဝံ။
103. Ekādasame yehi phalaṃ nimīyati, uppajjanaṭṭhāne pakkhipamānaṃ viya hoti, tāni nimittāni. Tenāha ‘‘tīṇi kāraṇānī’’ti. Kālena kālanti ettha kālenāti bhummatthe karaṇavacanaṃ. Kālanti ca upayogavacananti āha ‘‘kāle kāle’’ti. Manasi kātabbāti citte kātabbā, uppādetabbāti attho. Upalakkhitasamādhānākāro samādhiyeva idha samādhinimittanti āha ‘‘ekaggatā hi idha samādhinimittanti vuttā’’ti. Ṭhānaṃ taṃ cittaṃ kosajjāya saṃvatteyyāti ettha ṭhānaṃ atthīti vacanaseso. Taṃ bhāvanācittaṃ kosajjāya saṃvatteyya, tassa saṃvattanassa kāraṇaṃ atthīti attho. Taṃ vā manasikaraṇaṃ cittaṃ kosajjāya saṃvatteyya, etassa ṭhānaṃ kāraṇaṃ atthīti attho. Tenāha ‘‘kāraṇaṃ vijjatī’’tiādi. Ñāṇajavanti saṅkhāresu aniccādivasena pavattamānaṃ paññājavaṃ.
ယံ ကိဉ္စိ သုဝဏ္ဏတာပနယောဂ္ဂအင္ဂာရဘာဇနံ ဣဓ ‘‘ဥက္ကာ’’တိ အဓိပ္ပေတန္တိ အာဟ ‘‘အင္ဂာရကပလ္လ’’န္တိ။ သဇ္ဇေယ္ယာတိ ယထာ တတ္ထ ပက္ခိတ္တံ သုဝဏ္ဏံ တပ္ပတိ, ဧဝံ ပဋိယာဒိယေယ္ယ။ အာလိမ္ပေယ္ယာတိ အာဒိယေယ္ယ, ဇလေယ္ယာတိ အတ္ထော။ တေနာဟ ‘‘တတ္ထ အင္ဂာရေ။ပေ.။ ဂာဟာပေယ္ယာ’’တိ။ မူသာယ ဝာ ပက္ခိပေယ္ယာတိ တတ္တကေ ဝာ ပက္ခိပေယ္ယ။ ဥပဓာရေတီတိ သလ္လက္ခေတိ။
Yaṃ kiñci suvaṇṇatāpanayoggaaṅgārabhājanaṃ idha ‘‘ukkā’’ti adhippetanti āha ‘‘aṅgārakapalla’’nti. Sajjeyyāti yathā tattha pakkhittaṃ suvaṇṇaṃ tappati, evaṃ paṭiyādiyeyya. Ālimpeyyāti ādiyeyya, jaleyyāti attho. Tenāha ‘‘tattha aṅgāre…pe… gāhāpeyyā’’ti. Mūsāya vā pakkhipeyyāti tattake vā pakkhipeyya. Upadhāretīti sallakkheti.
နိမိတ္တသုတ္တဝဏ္ဏနာ နိဋ္ဌိတာ။
Nimittasuttavaṇṇanā niṭṭhitā.
လောဏကပလ္လဝဂ္ဂဝဏ္ဏနာ နိဋ္ဌိတာ။
Loṇakapallavaggavaṇṇanā niṭṭhitā.
ဒုတိယပဏ္ဏာသကံ နိဋ္ဌိတံ။
Dutiyapaṇṇāsakaṃ niṭṭhitaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၁. နိမိတ္တသုတ္တံ • 11. Nimittasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁၁. နိမိတ္တသုတ္တဝဏ္ဏနာ • 11. Nimittasuttavaṇṇanā
