| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
11. නිමිත්‌තසුත්‌තවණ්‌ණනා
11. Nimittasuttavaṇṇanā
103. එකාදසමෙපි අධිචිත්‌තං සමථවිපස්‌සනාචිත්‌තමෙව. තීණි නිමිත්‌තානීති තීණි කාරණානි. කාලෙන කාලන්‌ති කාලෙ කාලෙ, යුත්‌තකාලෙති අත්‌ථො. කාලෙන කාලං සමාධිනිමිත්‌තං මනසිකාතබ්‌බන්‌තිආදීසු තං තං කාලං සල්‌ලක්‌ඛෙත්‌වා එකග්‌ගතාය යුත්‌තකාලෙ එකග්‌ගතා මනසිකාතබ්‌බා. එකග්‌ගතා හි ඉධ සමාධිනිමිත්‌තන්‌ති වුත්‌තා. තත්‍ර වචනත්‌ථො – සමාධියෙව නිමිත්‌තං සමාධිනිමිත්‌තං. සෙසපදද්‌වයෙපි එසෙව නයො. පග්‌ගහොති පන වීරියස්‌ස නාමං, උපෙක්‌ඛාති මජ්‌ඣත්‌තභාවස්‌ස. තස්‌මා වීරියස්‌ස යුත්‌තකාලෙ වීරියං මනසිකාතබ්‌බං, මජ්‌ඣත්‌තභාවස්‌ස යුත්‌තකාලෙ මජ්‌ඣත්‌තභාවෙ ඨාතබ්‌බන්‌ති. ඨානං තං චිත්‌තං කොසජ්‌ජාය සංවත්‌තෙය්‍යාති කාරණං විජ්‌ජති යෙන තං චිත්‌තං කොසජ්‌ජභාවෙ තිට්‌ඨෙය්‍ය. ඉතරෙසුපි එසෙව නයො. උපෙක්‌ඛානිමිත්‌තංයෙව මනසි කරෙය්‍යාති එත්‌ථ ච ඤාණජවං උපෙක්‌ඛෙය්‍යාති අයමත්‌ථො. ආසවානං ඛයායාති අරහත්‌තඵලත්‌ථාය.
103. Ekādasamepi adhicittaṃ samathavipassanācittameva. Tīṇi nimittānīti tīṇi kāraṇāni. Kālena kālanti kāle kāle, yuttakāleti attho. Kālena kālaṃ samādhinimittaṃ manasikātabbantiādīsu taṃ taṃ kālaṃ sallakkhetvā ekaggatāya yuttakāle ekaggatā manasikātabbā. Ekaggatā hi idha samādhinimittanti vuttā. Tatra vacanattho – samādhiyeva nimittaṃ samādhinimittaṃ. Sesapadadvayepi eseva nayo. Paggahoti pana vīriyassa nāmaṃ, upekkhāti majjhattabhāvassa. Tasmā vīriyassa yuttakāle vīriyaṃ manasikātabbaṃ, majjhattabhāvassa yuttakāle majjhattabhāve ṭhātabbanti. Ṭhānaṃ taṃ cittaṃ kosajjāya saṃvatteyyāti kāraṇaṃ vijjati yena taṃ cittaṃ kosajjabhāve tiṭṭheyya. Itaresupi eseva nayo. Upekkhānimittaṃyeva manasi kareyyāti ettha ca ñāṇajavaṃ upekkheyyāti ayamattho. Āsavānaṃ khayāyāti arahattaphalatthāya.
උක්‌කං බන්‌ධෙය්‍යාති අඞ්‌ගාරකපල්‌ලං සජ්‌ජෙය්‍ය. ආලිම්‌පෙය්‍යාති තත්‌ථ අඞ්‌ගාරෙ පක්‌ඛිපිත්‌වා අග්‌ගිං දත්‌වා නාළිකාය ධමන්‌තො අග්‌ගිං ගාහාපෙය්‍ය. උක්‌කාමුඛෙ පක්‌ඛිපෙය්‍යාති අඞ්‌ගාරෙ වියූහිත්‌වා අඞ්‌ගාරමත්‌ථකෙ වා ඨපෙය්‍ය, මූසාය වා පක්‌ඛිපෙය්‍ය. අජ්‌ඣුපෙක්‌ඛතීති පක්‌කාපක්‌කභාවං උපධාරෙති.
Ukkaṃ bandheyyāti aṅgārakapallaṃ sajjeyya. Ālimpeyyāti tattha aṅgāre pakkhipitvā aggiṃ datvā nāḷikāya dhamanto aggiṃ gāhāpeyya. Ukkāmukhe pakkhipeyyāti aṅgāre viyūhitvā aṅgāramatthake vā ṭhapeyya, mūsāya vā pakkhipeyya. Ajjhupekkhatīti pakkāpakkabhāvaṃ upadhāreti.
සම්‌මා සමාධියති ආසවානං ඛයායාති අරහත්‌තඵලත්‌ථාය සම්‌මා ඨපීයති. එත්‌තාවතා හි විපස්‌සනං වඩ්‌ඪෙත්‌වා අරහත්‌තප්‌පත්‌තො භික්‌ඛු දස්‌සිතො. ඉදානි තස්‌ස ඛීණාසවස්‌ස අභිඤ්‌ඤාය පටිපදං දස්‌සෙන්‌තො යස්‌ස යස්‌ස චාතිආදිමාහ. තං හෙට්‌ඨා වුත්‌තනයෙනෙව වෙදිතබ්‌බං.
Sammā samādhiyati āsavānaṃ khayāyāti arahattaphalatthāya sammā ṭhapīyati. Ettāvatā hi vipassanaṃ vaḍḍhetvā arahattappatto bhikkhu dassito. Idāni tassa khīṇāsavassa abhiññāya paṭipadaṃ dassento yassa yassa cātiādimāha. Taṃ heṭṭhā vuttanayeneva veditabbaṃ.
ලොණකපල්‌ලවග්‌ගො පඤ්‌චමො.
Loṇakapallavaggo pañcamo.
දුතියපණ්‌ණාසකං නිට්‌ඨිතං.
Dutiyapaṇṇāsakaṃ niṭṭhitaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 11. නිමිත්‌තසුත්‌තං • 11. Nimittasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 11. නිමිත්‌තසුත්‌තවණ්‌ණනා • 11. Nimittasuttavaṇṇanā
