| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
11. නිමිත්‌තසුත්‌තවණ්‌ණනා
11. Nimittasuttavaṇṇanā
103. එකාදසමෙ යෙහි ඵලං නිමීයති, උප්‌පජ්‌ජනට්‌ඨානෙ පක්‌ඛිපමානං විය හොති, තානි නිමිත්‌තානි. තෙනාහ ‘‘තීණි කාරණානී’’ති. කාලෙන කාලන්‌ති එත්‌ථ කාලෙනාති භුම්‌මත්‌ථෙ කරණවචනං. කාලන්‌ති ච උපයොගවචනන්‌ති ආහ ‘‘කාලෙ කාලෙ’’ති. මනසි කාතබ්‌බාති චිත්‌තෙ කාතබ්‌බා, උප්‌පාදෙතබ්‌බාති අත්‌ථො. උපලක්‌ඛිතසමාධානාකාරො සමාධියෙව ඉධ සමාධිනිමිත්‌තන්‌ති ආහ ‘‘එකග්‌ගතා හි ඉධ සමාධිනිමිත්‌තන්‌ති වුත්‌තා’’ති. ඨානං තං චිත්‌තං කොසජ්‌ජාය සංවත්‌තෙය්‍යාති එත්‌ථ ඨානං අත්‌ථීති වචනසෙසො. තං භාවනාචිත්‌තං කොසජ්‌ජාය සංවත්‌තෙය්‍ය, තස්‌ස සංවත්‌තනස්‌ස කාරණං අත්‌ථීති අත්‌ථො. තං වා මනසිකරණං චිත්‌තං කොසජ්‌ජාය සංවත්‌තෙය්‍ය, එතස්‌ස ඨානං කාරණං අත්‌ථීති අත්‌ථො. තෙනාහ ‘‘කාරණං විජ්‌ජතී’’තිආදි. ඤාණජවන්‌ති සඞ්‌ඛාරෙසු අනිච්‌චාදිවසෙන පවත්‌තමානං පඤ්‌ඤාජවං.
103. Ekādasame yehi phalaṃ nimīyati, uppajjanaṭṭhāne pakkhipamānaṃ viya hoti, tāni nimittāni. Tenāha ‘‘tīṇi kāraṇānī’’ti. Kālena kālanti ettha kālenāti bhummatthe karaṇavacanaṃ. Kālanti ca upayogavacananti āha ‘‘kāle kāle’’ti. Manasi kātabbāti citte kātabbā, uppādetabbāti attho. Upalakkhitasamādhānākāro samādhiyeva idha samādhinimittanti āha ‘‘ekaggatā hi idha samādhinimittanti vuttā’’ti. Ṭhānaṃ taṃ cittaṃ kosajjāya saṃvatteyyāti ettha ṭhānaṃ atthīti vacanaseso. Taṃ bhāvanācittaṃ kosajjāya saṃvatteyya, tassa saṃvattanassa kāraṇaṃ atthīti attho. Taṃ vā manasikaraṇaṃ cittaṃ kosajjāya saṃvatteyya, etassa ṭhānaṃ kāraṇaṃ atthīti attho. Tenāha ‘‘kāraṇaṃ vijjatī’’tiādi. Ñāṇajavanti saṅkhāresu aniccādivasena pavattamānaṃ paññājavaṃ.
යං කිඤ්‌චි සුවණ්‌ණතාපනයොග්‌ගඅඞ්‌ගාරභාජනං ඉධ ‘‘උක්‌කා’’ති අධිප්‌පෙතන්‌ති ආහ ‘‘අඞ්‌ගාරකපල්‌ල’’න්‌ති. සජ්‌ජෙය්‍යාති යථා තත්‌ථ පක්‌ඛිත්‌තං සුවණ්‌ණං තප්‌පති, එවං පටියාදියෙය්‍ය. ආලිම්‌පෙය්‍යාති ආදියෙය්‍ය, ජලෙය්‍යාති අත්‌ථො. තෙනාහ ‘‘තත්‌ථ අඞ්‌ගාරෙ…පෙ.… ගාහාපෙය්‍යා’’ති. මූසාය වා පක්‌ඛිපෙය්‍යාති තත්‌තකෙ වා පක්‌ඛිපෙය්‍ය. උපධාරෙතීති සල්‌ලක්‌ඛෙති.
Yaṃ kiñci suvaṇṇatāpanayoggaaṅgārabhājanaṃ idha ‘‘ukkā’’ti adhippetanti āha ‘‘aṅgārakapalla’’nti. Sajjeyyāti yathā tattha pakkhittaṃ suvaṇṇaṃ tappati, evaṃ paṭiyādiyeyya. Ālimpeyyāti ādiyeyya, jaleyyāti attho. Tenāha ‘‘tattha aṅgāre…pe… gāhāpeyyā’’ti. Mūsāya vā pakkhipeyyāti tattake vā pakkhipeyya. Upadhāretīti sallakkheti.
නිමිත්‌තසුත්‌තවණ්‌ණනා නිට්‌ඨිතා.
Nimittasuttavaṇṇanā niṭṭhitā.
ලොණකපල්‌ලවග්‌ගවණ්‌ණනා නිට්‌ඨිතා.
Loṇakapallavaggavaṇṇanā niṭṭhitā.
දුතියපණ්‌ණාසකං නිට්‌ඨිතං.
Dutiyapaṇṇāsakaṃ niṭṭhitaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 11. නිමිත්‌තසුත්‌තං • 11. Nimittasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 11. නිමිත්‌තසුත්‌තවණ්‌ණනා • 11. Nimittasuttavaṇṇanā
