| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. நிமொக்க²ஸுத்தவண்ணனா
2. Nimokkhasuttavaṇṇanā
2. இதா³னி து³தியஸுத்ததோ பட்டா²ய பட²மமாக³தஞ்ச உத்தானத்த²ஞ்ச பஹாய யங் யங் அனுத்தானங், தங் ததே³வ வண்ணயிஸ்ஸாம. ஜானாஸி நோதி ஜானாஸி நு. நிமொக்க²ந்திஆதீ³னி மக்³கா³தீ³னங் நாமானி . மக்³கே³ன ஹி ஸத்தா கிலேஸப³ந்த⁴னதோ நிமுச்சந்தி, தஸ்மா மக்³கோ³ ஸத்தானங் நிமொக்கோ²தி வுத்தோ. ப²லக்க²ணே பன தே கிலேஸப³ந்த⁴னதோ பமுத்தா, தஸ்மா ப²லங் ஸத்தானங் பமொக்கோ²தி வுத்தங். நிப்³பா³னங் பத்வா ஸத்தானங் ஸப்³ப³து³க்க²ங் விவிச்சதி, தஸ்மா நிப்³பா³னங் விவேகோதி வுத்தங். ஸப்³பா³னி வா ஏதானி நிப்³பா³னஸ்ஸேவ நாமானி. நிப்³பா³னஞ்ஹி பத்வா ஸத்தா ஸப்³ப³து³க்க²தோ நிமுச்சந்தி பமுச்சந்தி விவிச்சந்தி, தஸ்மா ததே³வ ‘‘நிமொக்கோ² பமொக்கோ² விவேகோ’’தி வுத்தங். ஜானாமி க்²வாஹந்தி ஜானாமி கோ² அஹங். அவதா⁴ரணத்தோ² கோ²காரோ . அஹங் ஜானாமியேவ. ஸத்தானங் நிமொக்கா²தி³ஜானநத்த²மேவ ஹி மயா ஸமதிங்ஸ பாரமியோ பூரெத்வா ஸப்³ப³ஞ்ஞுதஞ்ஞாணங் படிவித்³த⁴ந்தி ஸீஹனாத³ங் நத³தி. பு³த்³த⁴ஸீஹனாத³ங் நாம கிர ஏதங் ஸுத்தங்.
2. Idāni dutiyasuttato paṭṭhāya paṭhamamāgatañca uttānatthañca pahāya yaṃ yaṃ anuttānaṃ, taṃ tadeva vaṇṇayissāma. Jānāsi noti jānāsi nu. Nimokkhantiādīni maggādīnaṃ nāmāni . Maggena hi sattā kilesabandhanato nimuccanti, tasmā maggo sattānaṃ nimokkhoti vutto. Phalakkhaṇe pana te kilesabandhanato pamuttā, tasmā phalaṃ sattānaṃ pamokkhoti vuttaṃ. Nibbānaṃ patvā sattānaṃ sabbadukkhaṃ viviccati, tasmā nibbānaṃ vivekoti vuttaṃ. Sabbāni vā etāni nibbānasseva nāmāni. Nibbānañhi patvā sattā sabbadukkhato nimuccanti pamuccanti viviccanti, tasmā tadeva ‘‘nimokkho pamokkho viveko’’ti vuttaṃ. Jānāmi khvāhanti jānāmi kho ahaṃ. Avadhāraṇattho khokāro . Ahaṃ jānāmiyeva. Sattānaṃ nimokkhādijānanatthameva hi mayā samatiṃsa pāramiyo pūretvā sabbaññutaññāṇaṃ paṭividdhanti sīhanādaṃ nadati. Buddhasīhanādaṃ nāma kira etaṃ suttaṃ.
நந்தீ³ப⁴வபரிக்க²யாதி நந்தீ³மூலகஸ்ஸ கம்மப⁴வஸ்ஸ பரிக்க²யேன. நந்தி³யா ச ப⁴வஸ்ஸ சாதிபி வட்டதி. தத்த² ஹி புரிமனயே நந்தீ³ப⁴வேன திவித⁴கம்மாபி⁴ஸங்கா²ரவஸேன ஸங்கா²ரக்க²ந்தோ⁴ க³ஹிதோ, ஸஞ்ஞாவிஞ்ஞாணேஹி தங்ஸம்பயுத்தா ச த்³வே க²ந்தா⁴. தேஹி பன தீஹி க²ந்தே⁴ஹி ஸம்பயுத்தா வேத³னா தேஸங் க³ஹணேன க³ஹிதாவாதி அனுபாதி³ண்ணகானங் சதுன்னங் அரூபக்க²ந்தா⁴னங் அப்பவத்திவஸேன ஸஉபாதி³ஸேஸங் நிப்³பா³னங் கதி²தங் ஹோதி. வேத³னானங் நிரோதா⁴ உபஸமாதி உபாதி³ண்ணகவேத³னானங் நிரோதே⁴ன ச உபஸமேன ச. தத்த² வேத³னாக³ஹணேன தங்ஸம்பயுத்தா தயோ க²ந்தா⁴ க³ஹிதாவ ஹொந்தி, தேஸங் வத்தா²ரம்மணவஸேன ரூபக்க²ந்தோ⁴பி. ஏவங் இமேஸங் உபாதி³ண்ணகானங் பஞ்சன்னங் க²ந்தா⁴னங் அப்பவத்திவஸேன அனுபாதி³ஸேஸங் நிப்³பா³னங் கதி²தங் ஹோதி. து³தியனயே பன நந்தி³க்³க³ஹணேன ஸங்கா²ரக்க²ந்தோ⁴ க³ஹிதோ, ப⁴வக்³க³ஹணேன உபபத்திப⁴வஸங்கா²தோ ரூபக்க²ந்தோ⁴, ஸஞ்ஞாதீ³ஹி ஸரூபேனேவ தயோ க²ந்தா⁴. ஏவங் இமேஸங் பஞ்சன்னங் க²ந்தா⁴னங் அப்பவத்திவஸேன நிப்³பா³னங் கதி²தங் ஹோதீதி வேதி³தப்³ப³ங். இமமேவ ச நயங் சதுனிகாயிகப⁴ண்டி³கத்தே²ரோ ரோசேதி. இதி நிப்³பா³னவஸேனேவ ப⁴க³வா தே³ஸனங் நிட்டா²பேஸீதி.
Nandībhavaparikkhayāti nandīmūlakassa kammabhavassa parikkhayena. Nandiyā ca bhavassa cātipi vaṭṭati. Tattha hi purimanaye nandībhavena tividhakammābhisaṅkhāravasena saṅkhārakkhandho gahito, saññāviññāṇehi taṃsampayuttā ca dve khandhā. Tehi pana tīhi khandhehi sampayuttā vedanā tesaṃ gahaṇena gahitāvāti anupādiṇṇakānaṃ catunnaṃ arūpakkhandhānaṃ appavattivasena saupādisesaṃ nibbānaṃ kathitaṃ hoti. Vedanānaṃ nirodhā upasamāti upādiṇṇakavedanānaṃ nirodhena ca upasamena ca. Tattha vedanāgahaṇena taṃsampayuttā tayo khandhā gahitāva honti, tesaṃ vatthārammaṇavasena rūpakkhandhopi. Evaṃ imesaṃ upādiṇṇakānaṃ pañcannaṃ khandhānaṃ appavattivasena anupādisesaṃ nibbānaṃ kathitaṃ hoti. Dutiyanaye pana nandiggahaṇena saṅkhārakkhandho gahito, bhavaggahaṇena upapattibhavasaṅkhāto rūpakkhandho, saññādīhi sarūpeneva tayo khandhā. Evaṃ imesaṃ pañcannaṃ khandhānaṃ appavattivasena nibbānaṃ kathitaṃ hotīti veditabbaṃ. Imameva ca nayaṃ catunikāyikabhaṇḍikatthero roceti. Iti nibbānavaseneva bhagavā desanaṃ niṭṭhāpesīti.
நிமொக்க²ஸுத்தவண்ணனா நிட்டி²தா.
Nimokkhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. நிமொக்க²ஸுத்தங் • 2. Nimokkhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. நிமொக்க²ஸுத்தவண்ணனா • 2. Nimokkhasuttavaṇṇanā
