| Library / Tipiṭaka / तिपिटक • Tipiṭaka / अपदानपाळि • Apadānapāḷi |
३. निपन्नञ्जलिकत्थेरअपदानं
3. Nipannañjalikattheraapadānaṃ
१६.
16.
‘‘रुक्खमूले निसिन्नोहं, ब्याधितो परमेन च।
‘‘Rukkhamūle nisinnohaṃ, byādhito paramena ca;
परमकारुञ्ञपत्तोम्हि, अरञ्ञे कानने अहं॥
Paramakāruññapattomhi, araññe kānane ahaṃ.
१७.
17.
‘‘अनुकम्पं उपादाय, तिस्सो सत्था उपेसि मं।
‘‘Anukampaṃ upādāya, tisso satthā upesi maṃ;
सोहं निपन्नको सन्तो, सिरे कत्वान अञ्जलिं॥
Sohaṃ nipannako santo, sire katvāna añjaliṃ.
१८.
18.
‘‘पसन्नचित्तो सुमनो, सब्बसत्तानमुत्तमं।
‘‘Pasannacitto sumano, sabbasattānamuttamaṃ;
सम्बुद्धं अभिवादेत्वा, तत्थ कालङ्कतो अहं॥
Sambuddhaṃ abhivādetvā, tattha kālaṅkato ahaṃ.
१९.
19.
‘‘द्वेनवुते इतो कप्पे, यं वन्दिं पुरिसुत्तमं।
‘‘Dvenavute ito kappe, yaṃ vandiṃ purisuttamaṃ;
दुग्गतिं नाभिजानामि, वन्दनाय इदं फलं॥
Duggatiṃ nābhijānāmi, vandanāya idaṃ phalaṃ.
२०.
20.
‘‘इतो पञ्चमके कप्पे, पञ्चेवासुं महासिखा।
‘‘Ito pañcamake kappe, pañcevāsuṃ mahāsikhā;
सत्तरतनसम्पन्ना, चक्कवत्ती महब्बला॥
Sattaratanasampannā, cakkavattī mahabbalā.
२१.
21.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा निपन्नञ्जलिको थेरो इमा गाथायो अभासित्थाति।
Itthaṃ sudaṃ āyasmā nipannañjaliko thero imā gāthāyo abhāsitthāti.
निपन्नञ्जलिकत्थेरस्सापदानं ततियं।
Nipannañjalikattherassāpadānaṃ tatiyaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ३. निपन्नञ्जलिकत्थेरअपदानवण्णना • 3. Nipannañjalikattheraapadānavaṇṇanā
