| Library / Tipiṭaka / තිපිටක • Tipiṭaka / අපදානපාළි • Apadānapāḷi |
3. නිපන්‌නඤ්‌ජලිකත්‌ථෙරඅපදානං
3. Nipannañjalikattheraapadānaṃ
16.
16.
‘‘රුක්‌ඛමූලෙ නිසින්‌නොහං, බ්‍යාධිතො පරමෙන ච;
‘‘Rukkhamūle nisinnohaṃ, byādhito paramena ca;
පරමකාරුඤ්‌ඤපත්‌තොම්‌හි, අරඤ්‌ඤෙ කානනෙ අහං.
Paramakāruññapattomhi, araññe kānane ahaṃ.
17.
17.
‘‘අනුකම්‌පං උපාදාය, තිස්‌සො සත්‌ථා උපෙසි මං;
‘‘Anukampaṃ upādāya, tisso satthā upesi maṃ;
සොහං නිපන්‌නකො සන්‌තො, සිරෙ කත්‌වාන අඤ්‌ජලිං.
Sohaṃ nipannako santo, sire katvāna añjaliṃ.
18.
18.
‘‘පසන්‌නචිත්‌තො සුමනො, සබ්‌බසත්‌තානමුත්‌තමං;
‘‘Pasannacitto sumano, sabbasattānamuttamaṃ;
සම්‌බුද්‌ධං අභිවාදෙත්‌වා, තත්‌ථ කාලඞ්‌කතො අහං.
Sambuddhaṃ abhivādetvā, tattha kālaṅkato ahaṃ.
19.
19.
‘‘ද්‌වෙනවුතෙ ඉතො කප්‌පෙ, යං වන්‌දිං පුරිසුත්‌තමං;
‘‘Dvenavute ito kappe, yaṃ vandiṃ purisuttamaṃ;
දුග්‌ගතිං නාභිජානාමි, වන්‌දනාය ඉදං ඵලං.
Duggatiṃ nābhijānāmi, vandanāya idaṃ phalaṃ.
20.
20.
‘‘ඉතො පඤ්‌චමකෙ කප්‌පෙ, පඤ්‌චෙවාසුං මහාසිඛා;
‘‘Ito pañcamake kappe, pañcevāsuṃ mahāsikhā;
සත්‌තරතනසම්‌පන්‌නා, චක්‌කවත්‌තී මහබ්‌බලා.
Sattaratanasampannā, cakkavattī mahabbalā.
21.
21.
‘‘පටිසම්‌භිදා චතස්‌සො…පෙ.… කතං බුද්‌ධස්‌ස සාසනං’’.
‘‘Paṭisambhidā catasso…pe… kataṃ buddhassa sāsanaṃ’’.
ඉත්‌ථං සුදං ආයස්‌මා නිපන්‌නඤ්‌ජලිකො ථෙරො ඉමා ගාථායො අභාසිත්‌ථාති.
Itthaṃ sudaṃ āyasmā nipannañjaliko thero imā gāthāyo abhāsitthāti.
නිපන්‌නඤ්‌ජලිකත්‌ථෙරස්‌සාපදානං තතියං.
Nipannañjalikattherassāpadānaṃ tatiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / අපදාන-අට්‌ඨකථා • Apadāna-aṭṭhakathā / 3. නිපන්‌නඤ්‌ජලිකත්‌ථෙරඅපදානවණ්‌ණනා • 3. Nipannañjalikattheraapadānavaṇṇanā
