| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
3. நிபன்னஞ்ஜலிகத்தே²ரஅபதா³னவண்ணனா
3. Nipannañjalikattheraapadānavaṇṇanā
ருக்க²மூலே நிஸின்னோஹந்திஆதி³கங் ஆயஸ்மதோ நிபன்னஞ்ஜலிகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ அனேகேஸு ப⁴வேஸு விவட்டூபனிஸ்ஸயானி புஞ்ஞானி உபசினந்தோ திஸ்ஸஸ்ஸ ப⁴க³வதோ காலே குலகே³ஹே நிப்³ப³த்தோ வுத்³தி⁴ப்பத்தோ பப்³ப³ஜித்வா ருக்க²மூலிகங்க³ங் பூரயமானோ அரஞ்ஞே விஹரதி. தஸ்மிங் ஸமயே க²ரோ ஆபா³தோ⁴ உப்பஜ்ஜி, தேன பீளிதோ பரமகாருஞ்ஞப்பத்தோ அஹோஸி. ததா³ ப⁴க³வா தஸ்ஸ காருஞ்ஞேன தத்த² அக³மாஸி. அத² ஸோ நிபன்னகோவ உட்டி²துங் அஸக்கொந்தோ ஸிரஸி அஞ்ஜலிங் கத்வா ப⁴க³வதோ பணாமங் அகாஸி. ஸோ ததோ சுதோ துஸிதப⁴வனே உப்பன்னோ தத்த² ஸம்பத்திமனுப⁴வித்வா ஏவங் ச² காமாவசரஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ வுத்³தி⁴ப்பத்தோ ஸத்த²ரி பஸீதி³த்வா பப்³ப³ஜிதோ நசிரஸ்ஸேவ அரஹா அஹோஸி, புராகதபுஞ்ஞவஸேன நிபன்னஞ்ஜலிகத்தே²ரோதி பாகடோ.
Rukkhamūlenisinnohantiādikaṃ āyasmato nipannañjalikattherassa apadānaṃ. Ayampi purimabuddhesu katādhikāro anekesu bhavesu vivaṭṭūpanissayāni puññāni upacinanto tissassa bhagavato kāle kulagehe nibbatto vuddhippatto pabbajitvā rukkhamūlikaṅgaṃ pūrayamāno araññe viharati. Tasmiṃ samaye kharo ābādho uppajji, tena pīḷito paramakāruññappatto ahosi. Tadā bhagavā tassa kāruññena tattha agamāsi. Atha so nipannakova uṭṭhituṃ asakkonto sirasi añjaliṃ katvā bhagavato paṇāmaṃ akāsi. So tato cuto tusitabhavane uppanno tattha sampattimanubhavitvā evaṃ cha kāmāvacarasampattiyo anubhavitvā imasmiṃ buddhuppāde ekasmiṃ kulagehe nibbatto vuddhippatto satthari pasīditvā pabbajito nacirasseva arahā ahosi, purākatapuññavasena nipannañjalikattheroti pākaṭo.
16. ஸோ அபரபா⁴கே³ அத்தனோ புஞ்ஞஸம்பத்தியோ ஓலோகெத்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ருக்க²மூலே நிஸின்னோஹந்திஆதி³மாஹ. தத்த² ருஹதி படிருஹதி உத்³த⁴முத்³த⁴ங் ஆரோஹதீதி ருக்கோ², தஸ்ஸ ருக்க²ஸ்ஸ மூலே ஸமீபேதி அத்தோ². ப்³யாதி⁴தோ பரமேன சாதி பரமேன அதி⁴கேன க²ரேன கக்க²ளேன ப்³யாதி⁴னா ரோகே³ன ப்³யாதி⁴தோ, ப்³யாதி⁴னா அஹங் ஸமன்னாக³தோதி அத்தோ². பரமகாருஞ்ஞப்பத்தொம்ஹீதி பரமங் அதி⁴கங் காருஞ்ஞங் தீ³னபா⁴வங் து³க்கி²தபா⁴வங் பத்தொம்ஹி அரஞ்ஞே கானநேதி ஸம்ப³ந்தோ⁴.
16. So aparabhāge attano puññasampattiyo oloketvā somanassajāto pubbacaritāpadānaṃ pakāsento rukkhamūle nisinnohantiādimāha. Tattha ruhati paṭiruhati uddhamuddhaṃ ārohatīti rukkho, tassa rukkhassa mūle samīpeti attho. Byādhito paramena cāti paramena adhikena kharena kakkhaḷena byādhinā rogena byādhito, byādhinā ahaṃ samannāgatoti attho. Paramakāruññappattomhīti paramaṃ adhikaṃ kāruññaṃ dīnabhāvaṃ dukkhitabhāvaṃ pattomhi araññe kānaneti sambandho.
20. பஞ்சேவாஸுங் மஹாஸிகா²தி ஸிரஸி பிளந்த⁴னத்தே²ன ஸிகா² வுச்சதி சூளா. மணீதி ஜோதமானங் மகுடங் தஸ்ஸ அத்தீ²தி ஸிகோ², சக்கவத்தினோ ஏகனாமகா பஞ்சேவ சக்கவத்தினோ ஆஸுங் அஹேஸுந்தி அத்தோ². ஸேஸங் ஸப்³ப³த்த² உத்தானத்த²மேவாதி.
20.Pañcevāsuṃ mahāsikhāti sirasi piḷandhanatthena sikhā vuccati cūḷā. Maṇīti jotamānaṃ makuṭaṃ tassa atthīti sikho, cakkavattino ekanāmakā pañceva cakkavattino āsuṃ ahesunti attho. Sesaṃ sabbattha uttānatthamevāti.
நிபன்னஞ்ஜலிகத்தே²ரஅபதா³னவண்ணனா ஸமத்தா.
Nipannañjalikattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 3. நிபன்னஞ்ஜலிகத்தே²ரஅபதா³னங் • 3. Nipannañjalikattheraapadānaṃ
