| Library / Tipiṭaka / തിപിടക • Tipiṭaka / അപദാന-അട്ഠകഥാ • Apadāna-aṭṭhakathā |
൩. നിപന്നഞ്ജലികത്ഥേരഅപദാനവണ്ണനാ
3. Nipannañjalikattheraapadānavaṇṇanā
രുക്ഖമൂലേ നിസിന്നോഹന്തിആദികം ആയസ്മതോ നിപന്നഞ്ജലികത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ അനേകേസു ഭവേസു വിവട്ടൂപനിസ്സയാനി പുഞ്ഞാനി ഉപചിനന്തോ തിസ്സസ്സ ഭഗവതോ കാലേ കുലഗേഹേ നിബ്ബത്തോ വുദ്ധിപ്പത്തോ പബ്ബജിത്വാ രുക്ഖമൂലികങ്ഗം പൂരയമാനോ അരഞ്ഞേ വിഹരതി. തസ്മിം സമയേ ഖരോ ആബാധോ ഉപ്പജ്ജി, തേന പീളിതോ പരമകാരുഞ്ഞപ്പത്തോ അഹോസി. തദാ ഭഗവാ തസ്സ കാരുഞ്ഞേന തത്ഥ അഗമാസി. അഥ സോ നിപന്നകോവ ഉട്ഠിതും അസക്കോന്തോ സിരസി അഞ്ജലിം കത്വാ ഭഗവതോ പണാമം അകാസി. സോ തതോ ചുതോ തുസിതഭവനേ ഉപ്പന്നോ തത്ഥ സമ്പത്തിമനുഭവിത്വാ ഏവം ഛ കാമാവചരസമ്പത്തിയോ അനുഭവിത്വാ ഇമസ്മിം ബുദ്ധുപ്പാദേ ഏകസ്മിം കുലഗേഹേ നിബ്ബത്തോ വുദ്ധിപ്പത്തോ സത്ഥരി പസീദിത്വാ പബ്ബജിതോ നചിരസ്സേവ അരഹാ അഹോസി, പുരാകതപുഞ്ഞവസേന നിപന്നഞ്ജലികത്ഥേരോതി പാകടോ.
Rukkhamūlenisinnohantiādikaṃ āyasmato nipannañjalikattherassa apadānaṃ. Ayampi purimabuddhesu katādhikāro anekesu bhavesu vivaṭṭūpanissayāni puññāni upacinanto tissassa bhagavato kāle kulagehe nibbatto vuddhippatto pabbajitvā rukkhamūlikaṅgaṃ pūrayamāno araññe viharati. Tasmiṃ samaye kharo ābādho uppajji, tena pīḷito paramakāruññappatto ahosi. Tadā bhagavā tassa kāruññena tattha agamāsi. Atha so nipannakova uṭṭhituṃ asakkonto sirasi añjaliṃ katvā bhagavato paṇāmaṃ akāsi. So tato cuto tusitabhavane uppanno tattha sampattimanubhavitvā evaṃ cha kāmāvacarasampattiyo anubhavitvā imasmiṃ buddhuppāde ekasmiṃ kulagehe nibbatto vuddhippatto satthari pasīditvā pabbajito nacirasseva arahā ahosi, purākatapuññavasena nipannañjalikattheroti pākaṭo.
൧൬. സോ അപരഭാഗേ അത്തനോ പുഞ്ഞസമ്പത്തിയോ ഓലോകേത്വാ സോമനസ്സജാതോ പുബ്ബചരിതാപദാനം പകാസേന്തോ രുക്ഖമൂലേ നിസിന്നോഹന്തിആദിമാഹ. തത്ഥ രുഹതി പടിരുഹതി ഉദ്ധമുദ്ധം ആരോഹതീതി രുക്ഖോ, തസ്സ രുക്ഖസ്സ മൂലേ സമീപേതി അത്ഥോ. ബ്യാധിതോ പരമേന ചാതി പരമേന അധികേന ഖരേന കക്ഖളേന ബ്യാധിനാ രോഗേന ബ്യാധിതോ, ബ്യാധിനാ അഹം സമന്നാഗതോതി അത്ഥോ. പരമകാരുഞ്ഞപ്പത്തോമ്ഹീതി പരമം അധികം കാരുഞ്ഞം ദീനഭാവം ദുക്ഖിതഭാവം പത്തോമ്ഹി അരഞ്ഞേ കാനനേതി സമ്ബന്ധോ.
16. So aparabhāge attano puññasampattiyo oloketvā somanassajāto pubbacaritāpadānaṃ pakāsento rukkhamūle nisinnohantiādimāha. Tattha ruhati paṭiruhati uddhamuddhaṃ ārohatīti rukkho, tassa rukkhassa mūle samīpeti attho. Byādhito paramena cāti paramena adhikena kharena kakkhaḷena byādhinā rogena byādhito, byādhinā ahaṃ samannāgatoti attho. Paramakāruññappattomhīti paramaṃ adhikaṃ kāruññaṃ dīnabhāvaṃ dukkhitabhāvaṃ pattomhi araññe kānaneti sambandho.
൨൦. പഞ്ചേവാസും മഹാസിഖാതി സിരസി പിളന്ധനത്ഥേന സിഖാ വുച്ചതി ചൂളാ. മണീതി ജോതമാനം മകുടം തസ്സ അത്ഥീതി സിഖോ, ചക്കവത്തിനോ ഏകനാമകാ പഞ്ചേവ ചക്കവത്തിനോ ആസും അഹേസുന്തി അത്ഥോ. സേസം സബ്ബത്ഥ ഉത്താനത്ഥമേവാതി.
20.Pañcevāsuṃ mahāsikhāti sirasi piḷandhanatthena sikhā vuccati cūḷā. Maṇīti jotamānaṃ makuṭaṃ tassa atthīti sikho, cakkavattino ekanāmakā pañceva cakkavattino āsuṃ ahesunti attho. Sesaṃ sabbattha uttānatthamevāti.
നിപന്നഞ്ജലികത്ഥേരഅപദാനവണ്ണനാ സമത്താ.
Nipannañjalikattheraapadānavaṇṇanā samattā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / ഖുദ്ദകനികായ • Khuddakanikāya / അപദാനപാളി • Apadānapāḷi / ൩. നിപന്നഞ്ജലികത്ഥേരഅപദാനം • 3. Nipannañjalikattheraapadānaṃ
