| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
2. நிப்பபஞ்சவக்³கோ³
2. Nippapañcavaggo
1. நிப்பபஞ்சபஞ்ஹோ
1. Nippapañcapañho
1. ‘‘ப⁴ந்தே நாக³ஸேன, பா⁴ஸிதம்பேதங் ப⁴க³வதா ‘நிப்பபஞ்சாராமா, பி⁴க்க²வே, விஹரத² நிப்பபஞ்சரதினோ’தி, கதமங் தங் நிப்பபஞ்ச’’ந்தி? ‘‘ஸோதாபத்திப²லங், மஹாராஜ, நிப்பபஞ்சங், ஸகதா³கா³மிப²லங் நிப்பபஞ்சங், அனாகா³மிப²லங் நிப்பபஞ்சங், அரஹத்தப²லங் நிப்பபஞ்ச’’ந்தி.
1. ‘‘Bhante nāgasena, bhāsitampetaṃ bhagavatā ‘nippapañcārāmā, bhikkhave, viharatha nippapañcaratino’ti, katamaṃ taṃ nippapañca’’nti? ‘‘Sotāpattiphalaṃ, mahārāja, nippapañcaṃ, sakadāgāmiphalaṃ nippapañcaṃ, anāgāmiphalaṃ nippapañcaṃ, arahattaphalaṃ nippapañca’’nti.
‘‘யதி³, ப⁴ந்தே நாக³ஸேன, ஸோதாபத்திப²லங் நிப்பபஞ்சங், ஸகதா³கா³மிஅனாகா³மிஅரஹத்தப²லங் நிப்பபஞ்சங் , கிஸ்ஸ பன இமே பி⁴க்கூ² உத்³தி³ஸந்தி பரிபுச்ச²ந்தி ஸுத்தங் கெ³ய்யங் வெய்யாகரணங் கா³த²ங் உதா³னங் இதிவுத்தகங் ஜாதகங் அப்³பு⁴தத⁴ம்மங் வேத³ல்லங், நவகம்மேன பலிபு³ஜ்ஜ²ந்தி தா³னேன ச பூஜாய ச, நனு தே ஜினப்படிக்கி²த்தங் கம்மங் கரோதீ’’தி?
‘‘Yadi, bhante nāgasena, sotāpattiphalaṃ nippapañcaṃ, sakadāgāmianāgāmiarahattaphalaṃ nippapañcaṃ , kissa pana ime bhikkhū uddisanti paripucchanti suttaṃ geyyaṃ veyyākaraṇaṃ gāthaṃ udānaṃ itivuttakaṃ jātakaṃ abbhutadhammaṃ vedallaṃ, navakammena palibujjhanti dānena ca pūjāya ca, nanu te jinappaṭikkhittaṃ kammaṃ karotī’’ti?
‘‘யே தே, மஹாராஜ, பி⁴க்கூ² உத்³தி³ஸந்தி பரிபுச்ச²ந்தி ஸுத்தங் கெ³ய்யங் வெய்யாகரணங் கா³த²ங் உதா³னங் இதிவுத்தகங் ஜாதகங் அப்³பு⁴தத⁴ம்மங் வேத³ல்லங், நவகம்மேன பலிபு³ஜ்ஜ²ந்தி தா³னேன ச பூஜாய ச, ஸப்³பே³ தே நிப்பபஞ்சஸ்ஸ பத்தியா கரொந்தி. யே தே, மஹாராஜ, ஸபா⁴வபரிஸுத்³தா⁴ புப்³பே³ வாஸிதவாஸனா, தே ஏகசித்தக்க²ணேன நிப்பபச ஹொந்தி. யே பன தே பி⁴க்கூ² மஹாரஜக்கா², தே இமேஹி பயோகே³ஹி நிப்பபஞ்சா ஹொந்தி.
‘‘Ye te, mahārāja, bhikkhū uddisanti paripucchanti suttaṃ geyyaṃ veyyākaraṇaṃ gāthaṃ udānaṃ itivuttakaṃ jātakaṃ abbhutadhammaṃ vedallaṃ, navakammena palibujjhanti dānena ca pūjāya ca, sabbe te nippapañcassa pattiyā karonti. Ye te, mahārāja, sabhāvaparisuddhā pubbe vāsitavāsanā, te ekacittakkhaṇena nippapaca honti. Ye pana te bhikkhū mahārajakkhā, te imehi payogehi nippapañcā honti.
‘‘யதா², மஹாராஜ, ஏகோ புரிஸோ கெ²த்தே பீ³ஜங் ரோபெத்வா அத்தனோ யதா²ப³லவீரியேன வினா பாகாரவதியா த⁴ஞ்ஞங் உத்³த⁴ரெய்ய, ஏகோ புரிஸோ கெ²த்தே பீ³ஜங் ரோபெத்வா வனங் பவிஸித்வா கட்ட²ஞ்ச ஸாக²ஞ்ச சி²ந்தி³த்வா வதிபாகாரங் கத்வா த⁴ஞ்ஞங் உத்³த⁴ரெய்ய. யா தத்த² தஸ்ஸ வதிபாகாரபரியேஸனா, ஸா த⁴ஞ்ஞத்தா²ய. ஏவமேவ கோ², மஹாராஜ, யே தே ஸபா⁴வபரிஸுத்³தா⁴ புப்³பே³ வாஸிதவாஸனா, தே ஏகசித்தக்க²ணேன நிப்பபஞ்சா ஹொந்தி, வினா வதிபாகாரங் புரிஸோ விய த⁴ஞ்ஞுத்³தா⁴ரோ. யே பன தே பி⁴க்கூ² மஹாரஜக்கா², தே இமேஹி பயோகே³ஹி நிப்பபஞ்சா ஹொந்தி, வதிபாகாரங் கத்வா புரிஸோ விய த⁴ஞ்ஞுத்³தா⁴ரோ.
‘‘Yathā, mahārāja, eko puriso khette bījaṃ ropetvā attano yathābalavīriyena vinā pākāravatiyā dhaññaṃ uddhareyya, eko puriso khette bījaṃ ropetvā vanaṃ pavisitvā kaṭṭhañca sākhañca chinditvā vatipākāraṃ katvā dhaññaṃ uddhareyya. Yā tattha tassa vatipākārapariyesanā, sā dhaññatthāya. Evameva kho, mahārāja, ye te sabhāvaparisuddhā pubbe vāsitavāsanā, te ekacittakkhaṇena nippapañcā honti, vinā vatipākāraṃ puriso viya dhaññuddhāro. Ye pana te bhikkhū mahārajakkhā, te imehi payogehi nippapañcā honti, vatipākāraṃ katvā puriso viya dhaññuddhāro.
‘‘யதா² வா பன, மஹாராஜ, புரிஸோ மஹதிமஹந்தே அம்ப³ருக்க²மத்த²கே ப²லபிண்டி³ ப⁴வெய்ய, அத² தத்த² யோ கோசி இத்³தி⁴மா ஆக³ந்த்வா தஸ்ஸ ப²லங் ஹரெய்ய, யோ பன தத்த² அனித்³தி⁴மா, ஸோ கட்ட²ஞ்ச வல்லிஞ்ச சி²ந்தி³த்வா நிஸ்ஸேணிங் ப³ந்தி⁴த்வா தாய தங் ருக்க²ங் அபி⁴ருஹித்வா ப²லங் ஹரெய்ய. யா தத்த² தஸ்ஸ நிஸ்ஸேணிபரியேஸனா, ஸா ப²லத்தா²ய. ஏவமேவ கோ², மஹாராஜ, யே தே ஸபா⁴வபரிஸுத்³தா⁴ புப்³பே³ வாஸிதவாஸனா, தே ஏகசித்தக்க²ணேன நிப்பபஞ்சா ஹொந்தி, இத்³தி⁴மா விய ருக்க²ப²லங் ஹரந்தோ. யே பன தே பி⁴க்கூ² மஹாரஜக்கா², தே இமினா பயோகே³ன ஸச்சானி அபி⁴ஸமெந்தி, நிஸ்ஸேணியா விய புரிஸோ ருக்க²ப²லங் ஹரந்தோ .
‘‘Yathā vā pana, mahārāja, puriso mahatimahante ambarukkhamatthake phalapiṇḍi bhaveyya, atha tattha yo koci iddhimā āgantvā tassa phalaṃ hareyya, yo pana tattha aniddhimā, so kaṭṭhañca valliñca chinditvā nisseṇiṃ bandhitvā tāya taṃ rukkhaṃ abhiruhitvā phalaṃ hareyya. Yā tattha tassa nisseṇipariyesanā, sā phalatthāya. Evameva kho, mahārāja, ye te sabhāvaparisuddhā pubbe vāsitavāsanā, te ekacittakkhaṇena nippapañcā honti, iddhimā viya rukkhaphalaṃ haranto. Ye pana te bhikkhū mahārajakkhā, te iminā payogena saccāni abhisamenti, nisseṇiyā viya puriso rukkhaphalaṃ haranto .
‘‘யதா² வா பன, மஹாராஜ, ஏகோ புரிஸோ அத்த²கரணிகோ ஏககோ யேவ ஸாமிகங் உபக³ந்த்வா அத்த²ங் ஸாதே⁴தி. ஏகோ த⁴னவா த⁴னவஸேன பரிஸங் வட்³டெ⁴த்வா பரிஸாய அத்த²ங் ஸாதே⁴தி. யா தத்த² தஸ்ஸ பரிஸபரியேஸனா, ஸா அத்த²த்தா²ய. ஏவமேவ கோ², மஹாராஜ, யே தே ஸபா⁴வபரிஸுத்³தா⁴ புப்³பே³ வாஸிதவாஸனா, தே ஏகசித்தக்க²ணேன ச²ஸு அபி⁴ஞ்ஞாஸு வஸிபா⁴வங் பாபுணந்தி, புரிஸோ விய ஏககோ அத்த²ஸித்³தி⁴ங் கரொந்தோ. யே பன தே பி⁴க்கூ² மஹாரஜக்கா², தே இமேஹி பயோகே³ஹி ஸாமஞ்ஞத்த²மபி⁴ஸாதெ⁴ந்தி, பரிஸாய விய புரிஸோ அத்த²ஸித்³தி⁴ங் கரொந்தோ.
‘‘Yathā vā pana, mahārāja, eko puriso atthakaraṇiko ekako yeva sāmikaṃ upagantvā atthaṃ sādheti. Eko dhanavā dhanavasena parisaṃ vaḍḍhetvā parisāya atthaṃ sādheti. Yā tattha tassa parisapariyesanā, sā atthatthāya. Evameva kho, mahārāja, ye te sabhāvaparisuddhā pubbe vāsitavāsanā, te ekacittakkhaṇena chasu abhiññāsu vasibhāvaṃ pāpuṇanti, puriso viya ekako atthasiddhiṃ karonto. Ye pana te bhikkhū mahārajakkhā, te imehi payogehi sāmaññatthamabhisādhenti, parisāya viya puriso atthasiddhiṃ karonto.
‘‘உத்³தே³ஸோபி, மஹாராஜ, ப³ஹுகாரோ, பரிபுச்சா²பி ப³ஹுகாரா, நவகம்மம்பி ப³ஹுகாரங், தா³னம்பி ப³ஹுகாரங், பூஜாபி ப³ஹுகாரா தேஸு தேஸு கரணீயேஸு. யதா², மஹாராஜ, புரிஸோ ராஜூபஸேவீ கதாவீ அமச்சப⁴டப³லதோ³வாரிகஅனீகட்ட²பாரிஸஜ்ஜஜனேஹி, தே தஸ்ஸ கரணீயே அனுப்பத்தே ஸப்³பே³பி உபகாரா ஹொந்தி. ஏவமேவ கோ², மஹாராஜ, உத்³தே³ஸோபி ப³ஹுகாரோ, பரிபுச்சா²பி ப³ஹுகாரா, நவகம்மம்பி ப³ஹுகாரங், தா³னம்பி ப³ஹுகாரங், பூஜாபி ப³ஹுகாரா தேஸு தேஸு கரணீயேஸு. யதி³, மஹாராஜ, ஸப்³பே³பி அபி⁴ஜாதிபரிஸுத்³தா⁴ ப⁴வெய்யுங், அனுஸாஸனேன 1 கரணீயங் ந ப⁴வெய்ய. யஸ்மா ச கோ², மஹாராஜ, ஸவனேன கரணீயங் ஹோதி, தே²ரோ, மஹாராஜ, ஸாரிபுத்தோ அபரிமிதமஸங்கெ²ய்யகப்பங் உபாதா³ய உபசிதகுஸலமூலோ பஞ்ஞாய கோடிங் க³தோ, ஸோபி வினா ஸவனேன நாஸக்கி² ஆஸவக்க²யங் பாபுணிதுங். தஸ்மா, மஹாராஜ, ப³ஹுகாரங் ஸவனங், ததா² உத்³தே³ஸோபி பரிபுச்சா²பி. தஸ்மா உத்³தே³ஸபரிபுச்சா²பி நிப்பபஞ்சா ஸங்க²தா’’தி. ‘‘ஸுனிஜ்ஜா²பிதோ, ப⁴ந்தே நாக³ஸேன, பஞ்ஹோ, ஏவமேதங் ததா² ஸம்படிச்சா²மீ’’தி.
‘‘Uddesopi, mahārāja, bahukāro, paripucchāpi bahukārā, navakammampi bahukāraṃ, dānampi bahukāraṃ, pūjāpi bahukārā tesu tesu karaṇīyesu. Yathā, mahārāja, puriso rājūpasevī katāvī amaccabhaṭabaladovārikaanīkaṭṭhapārisajjajanehi, te tassa karaṇīye anuppatte sabbepi upakārā honti. Evameva kho, mahārāja, uddesopi bahukāro, paripucchāpi bahukārā, navakammampi bahukāraṃ, dānampi bahukāraṃ, pūjāpi bahukārā tesu tesu karaṇīyesu. Yadi, mahārāja, sabbepi abhijātiparisuddhā bhaveyyuṃ, anusāsanena 2 karaṇīyaṃ na bhaveyya. Yasmā ca kho, mahārāja, savanena karaṇīyaṃ hoti, thero, mahārāja, sāriputto aparimitamasaṅkheyyakappaṃ upādāya upacitakusalamūlo paññāya koṭiṃ gato, sopi vinā savanena nāsakkhi āsavakkhayaṃ pāpuṇituṃ. Tasmā, mahārāja, bahukāraṃ savanaṃ, tathā uddesopi paripucchāpi. Tasmā uddesaparipucchāpi nippapañcā saṅkhatā’’ti. ‘‘Sunijjhāpito, bhante nāgasena, pañho, evametaṃ tathā sampaṭicchāmī’’ti.
நிப்பபஞ்சபஞ்ஹோ பட²மோ.
Nippapañcapañho paṭhamo.
Footnotes:
