| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༢. ནིཔྤཔཉྩཝགྒོ
2. Nippapañcavaggo
༡. ནིཔྤཔཉྩཔཉྷོ
1. Nippapañcapañho
༡. ‘‘བྷནྟེ ནཱགསེན, བྷཱསིཏམྤེཏཾ བྷགཝཏཱ ‘ནིཔྤཔཉྩཱརཱམཱ, བྷིཀྑཝེ, ཝིཧརཐ ནིཔྤཔཉྩརཏིནོ’ཏི, ཀཏམཾ ཏཾ ནིཔྤཔཉྩ’’ནྟི? ‘‘སོཏཱཔཏྟིཕལཾ, མཧཱརཱཛ, ནིཔྤཔཉྩཾ, སཀདཱགཱམིཕལཾ ནིཔྤཔཉྩཾ, ཨནཱགཱམིཕལཾ ནིཔྤཔཉྩཾ, ཨརཧཏྟཕལཾ ནིཔྤཔཉྩ’’ནྟི།
1. ‘‘Bhante nāgasena, bhāsitampetaṃ bhagavatā ‘nippapañcārāmā, bhikkhave, viharatha nippapañcaratino’ti, katamaṃ taṃ nippapañca’’nti? ‘‘Sotāpattiphalaṃ, mahārāja, nippapañcaṃ, sakadāgāmiphalaṃ nippapañcaṃ, anāgāmiphalaṃ nippapañcaṃ, arahattaphalaṃ nippapañca’’nti.
‘‘ཡདི, བྷནྟེ ནཱགསེན, སོཏཱཔཏྟིཕལཾ ནིཔྤཔཉྩཾ, སཀདཱགཱམིཨནཱགཱམིཨརཧཏྟཕལཾ ནིཔྤཔཉྩཾ , ཀིསྶ པན ཨིམེ བྷིཀྑཱུ ཨུདྡིསནྟི པརིཔུཙྪནྟི སུཏྟཾ གེཡྻཾ ཝེཡྻཱཀརཎཾ གཱཐཾ ཨུདཱནཾ ཨིཏིཝུཏྟཀཾ ཛཱཏཀཾ ཨབྦྷུཏདྷམྨཾ ཝེདལླཾ, ནཝཀམྨེན པལིབུཛ྄ཛྷནྟི དཱནེན ཙ པཱུཛཱཡ ཙ, ནནུ ཏེ ཛིནཔྤཊིཀྑིཏྟཾ ཀམྨཾ ཀརོཏཱི’’ཏི?
‘‘Yadi, bhante nāgasena, sotāpattiphalaṃ nippapañcaṃ, sakadāgāmianāgāmiarahattaphalaṃ nippapañcaṃ , kissa pana ime bhikkhū uddisanti paripucchanti suttaṃ geyyaṃ veyyākaraṇaṃ gāthaṃ udānaṃ itivuttakaṃ jātakaṃ abbhutadhammaṃ vedallaṃ, navakammena palibujjhanti dānena ca pūjāya ca, nanu te jinappaṭikkhittaṃ kammaṃ karotī’’ti?
‘‘ཡེ ཏེ, མཧཱརཱཛ, བྷིཀྑཱུ ཨུདྡིསནྟི པརིཔུཙྪནྟི སུཏྟཾ གེཡྻཾ ཝེཡྻཱཀརཎཾ གཱཐཾ ཨུདཱནཾ ཨིཏིཝུཏྟཀཾ ཛཱཏཀཾ ཨབྦྷུཏདྷམྨཾ ཝེདལླཾ, ནཝཀམྨེན པལིབུཛ྄ཛྷནྟི དཱནེན ཙ པཱུཛཱཡ ཙ, སབྦེ ཏེ ནིཔྤཔཉྩསྶ པཏྟིཡཱ ཀརོནྟི། ཡེ ཏེ, མཧཱརཱཛ, སབྷཱཝཔརིསུདྡྷཱ པུབྦེ ཝཱསིཏཝཱསནཱ, ཏེ ཨེཀཙིཏྟཀྑཎེན ནིཔྤཔཙ ཧོནྟི། ཡེ པན ཏེ བྷིཀྑཱུ མཧཱརཛཀྑཱ, ཏེ ཨིམེཧི པཡོགེཧི ནིཔྤཔཉྩཱ ཧོནྟི།
‘‘Ye te, mahārāja, bhikkhū uddisanti paripucchanti suttaṃ geyyaṃ veyyākaraṇaṃ gāthaṃ udānaṃ itivuttakaṃ jātakaṃ abbhutadhammaṃ vedallaṃ, navakammena palibujjhanti dānena ca pūjāya ca, sabbe te nippapañcassa pattiyā karonti. Ye te, mahārāja, sabhāvaparisuddhā pubbe vāsitavāsanā, te ekacittakkhaṇena nippapaca honti. Ye pana te bhikkhū mahārajakkhā, te imehi payogehi nippapañcā honti.
‘‘ཡཐཱ, མཧཱརཱཛ, ཨེཀོ པུརིསོ ཁེཏྟེ བཱིཛཾ རོཔེཏྭཱ ཨཏྟནོ ཡཐཱབལཝཱིརིཡེན ཝིནཱ པཱཀཱརཝཏིཡཱ དྷཉྙཾ ཨུདྡྷརེཡྻ, ཨེཀོ པུརིསོ ཁེཏྟེ བཱིཛཾ རོཔེཏྭཱ ཝནཾ པཝིསིཏྭཱ ཀཊྛཉྩ སཱཁཉྩ ཚིནྡིཏྭཱ ཝཏིཔཱཀཱརཾ ཀཏྭཱ དྷཉྙཾ ཨུདྡྷརེཡྻ། ཡཱ ཏཏྠ ཏསྶ ཝཏིཔཱཀཱརཔརིཡེསནཱ, སཱ དྷཉྙཏྠཱཡ། ཨེཝམེཝ ཁོ, མཧཱརཱཛ, ཡེ ཏེ སབྷཱཝཔརིསུདྡྷཱ པུབྦེ ཝཱསིཏཝཱསནཱ, ཏེ ཨེཀཙིཏྟཀྑཎེན ནིཔྤཔཉྩཱ ཧོནྟི, ཝིནཱ ཝཏིཔཱཀཱརཾ པུརིསོ ཝིཡ དྷཉྙུདྡྷཱརོ། ཡེ པན ཏེ བྷིཀྑཱུ མཧཱརཛཀྑཱ, ཏེ ཨིམེཧི པཡོགེཧི ནིཔྤཔཉྩཱ ཧོནྟི, ཝཏིཔཱཀཱརཾ ཀཏྭཱ པུརིསོ ཝིཡ དྷཉྙུདྡྷཱརོ།
‘‘Yathā, mahārāja, eko puriso khette bījaṃ ropetvā attano yathābalavīriyena vinā pākāravatiyā dhaññaṃ uddhareyya, eko puriso khette bījaṃ ropetvā vanaṃ pavisitvā kaṭṭhañca sākhañca chinditvā vatipākāraṃ katvā dhaññaṃ uddhareyya. Yā tattha tassa vatipākārapariyesanā, sā dhaññatthāya. Evameva kho, mahārāja, ye te sabhāvaparisuddhā pubbe vāsitavāsanā, te ekacittakkhaṇena nippapañcā honti, vinā vatipākāraṃ puriso viya dhaññuddhāro. Ye pana te bhikkhū mahārajakkhā, te imehi payogehi nippapañcā honti, vatipākāraṃ katvā puriso viya dhaññuddhāro.
‘‘ཡཐཱ ཝཱ པན, མཧཱརཱཛ, པུརིསོ མཧཏིམཧནྟེ ཨམྦརུཀྑམཏྠཀེ ཕལཔིཎྜི བྷཝེཡྻ, ཨཐ ཏཏྠ ཡོ ཀོཙི ཨིདྡྷིམཱ ཨཱགནྟྭཱ ཏསྶ ཕལཾ ཧརེཡྻ, ཡོ པན ཏཏྠ ཨནིདྡྷིམཱ, སོ ཀཊྛཉྩ ཝལླིཉྩ ཚིནྡིཏྭཱ ནིསྶེཎིཾ བནྡྷིཏྭཱ ཏཱཡ ཏཾ རུཀྑཾ ཨབྷིརུཧིཏྭཱ ཕལཾ ཧརེཡྻ། ཡཱ ཏཏྠ ཏསྶ ནིསྶེཎིཔརིཡེསནཱ, སཱ ཕལཏྠཱཡ། ཨེཝམེཝ ཁོ, མཧཱརཱཛ, ཡེ ཏེ སབྷཱཝཔརིསུདྡྷཱ པུབྦེ ཝཱསིཏཝཱསནཱ, ཏེ ཨེཀཙིཏྟཀྑཎེན ནིཔྤཔཉྩཱ ཧོནྟི, ཨིདྡྷིམཱ ཝིཡ རུཀྑཕལཾ ཧརནྟོ། ཡེ པན ཏེ བྷིཀྑཱུ མཧཱརཛཀྑཱ, ཏེ ཨིམིནཱ པཡོགེན སཙྩཱནི ཨབྷིསམེནྟི, ནིསྶེཎིཡཱ ཝིཡ པུརིསོ རུཀྑཕལཾ ཧརནྟོ །
‘‘Yathā vā pana, mahārāja, puriso mahatimahante ambarukkhamatthake phalapiṇḍi bhaveyya, atha tattha yo koci iddhimā āgantvā tassa phalaṃ hareyya, yo pana tattha aniddhimā, so kaṭṭhañca valliñca chinditvā nisseṇiṃ bandhitvā tāya taṃ rukkhaṃ abhiruhitvā phalaṃ hareyya. Yā tattha tassa nisseṇipariyesanā, sā phalatthāya. Evameva kho, mahārāja, ye te sabhāvaparisuddhā pubbe vāsitavāsanā, te ekacittakkhaṇena nippapañcā honti, iddhimā viya rukkhaphalaṃ haranto. Ye pana te bhikkhū mahārajakkhā, te iminā payogena saccāni abhisamenti, nisseṇiyā viya puriso rukkhaphalaṃ haranto .
‘‘ཡཐཱ ཝཱ པན, མཧཱརཱཛ, ཨེཀོ པུརིསོ ཨཏྠཀརཎིཀོ ཨེཀཀོ ཡེཝ སཱམིཀཾ ཨུཔགནྟྭཱ ཨཏྠཾ སཱདྷེཏི། ཨེཀོ དྷནཝཱ དྷནཝསེན པརིསཾ ཝཌྜྷེཏྭཱ པརིསཱཡ ཨཏྠཾ སཱདྷེཏི། ཡཱ ཏཏྠ ཏསྶ པརིསཔརིཡེསནཱ, སཱ ཨཏྠཏྠཱཡ། ཨེཝམེཝ ཁོ, མཧཱརཱཛ, ཡེ ཏེ སབྷཱཝཔརིསུདྡྷཱ པུབྦེ ཝཱསིཏཝཱསནཱ, ཏེ ཨེཀཙིཏྟཀྑཎེན ཚསུ ཨབྷིཉྙཱསུ ཝསིབྷཱཝཾ པཱཔུཎནྟི, པུརིསོ ཝིཡ ཨེཀཀོ ཨཏྠསིདྡྷིཾ ཀརོནྟོ། ཡེ པན ཏེ བྷིཀྑཱུ མཧཱརཛཀྑཱ, ཏེ ཨིམེཧི པཡོགེཧི སཱམཉྙཏྠམབྷིསཱདྷེནྟི, པརིསཱཡ ཝིཡ པུརིསོ ཨཏྠསིདྡྷིཾ ཀརོནྟོ།
‘‘Yathā vā pana, mahārāja, eko puriso atthakaraṇiko ekako yeva sāmikaṃ upagantvā atthaṃ sādheti. Eko dhanavā dhanavasena parisaṃ vaḍḍhetvā parisāya atthaṃ sādheti. Yā tattha tassa parisapariyesanā, sā atthatthāya. Evameva kho, mahārāja, ye te sabhāvaparisuddhā pubbe vāsitavāsanā, te ekacittakkhaṇena chasu abhiññāsu vasibhāvaṃ pāpuṇanti, puriso viya ekako atthasiddhiṃ karonto. Ye pana te bhikkhū mahārajakkhā, te imehi payogehi sāmaññatthamabhisādhenti, parisāya viya puriso atthasiddhiṃ karonto.
‘‘ཨུདྡེསོཔི, མཧཱརཱཛ, བཧུཀཱརོ, པརིཔུཙྪཱཔི བཧུཀཱརཱ, ནཝཀམྨམྤི བཧུཀཱརཾ, དཱནམྤི བཧུཀཱརཾ, པཱུཛཱཔི བཧུཀཱརཱ ཏེསུ ཏེསུ ཀརཎཱིཡེསུ། ཡཐཱ, མཧཱརཱཛ, པུརིསོ རཱཛཱུཔསེཝཱི ཀཏཱཝཱི ཨམཙྩབྷཊབལདོཝཱརིཀཨནཱིཀཊྛཔཱརིསཛྫཛནེཧི, ཏེ ཏསྶ ཀརཎཱིཡེ ཨནུཔྤཏྟེ སབྦེཔི ཨུཔཀཱརཱ ཧོནྟི། ཨེཝམེཝ ཁོ, མཧཱརཱཛ, ཨུདྡེསོཔི བཧུཀཱརོ, པརིཔུཙྪཱཔི བཧུཀཱརཱ, ནཝཀམྨམྤི བཧུཀཱརཾ, དཱནམྤི བཧུཀཱརཾ, པཱུཛཱཔི བཧུཀཱརཱ ཏེསུ ཏེསུ ཀརཎཱིཡེསུ། ཡདི, མཧཱརཱཛ, སབྦེཔི ཨབྷིཛཱཏིཔརིསུདྡྷཱ བྷཝེཡྻུཾ, ཨནུསཱསནེན 1 ཀརཎཱིཡཾ ན བྷཝེཡྻ། ཡསྨཱ ཙ ཁོ, མཧཱརཱཛ, སཝནེན ཀརཎཱིཡཾ ཧོཏི, ཐེརོ, མཧཱརཱཛ, སཱརིཔུཏྟོ ཨཔརིམིཏམསངྑེཡྻཀཔྤཾ ཨུཔཱདཱཡ ཨུཔཙིཏཀུསལམཱུལོ པཉྙཱཡ ཀོཊིཾ གཏོ, སོཔི ཝིནཱ སཝནེན ནཱསཀྑི ཨཱསཝཀྑཡཾ པཱཔུཎིཏུཾ། ཏསྨཱ, མཧཱརཱཛ, བཧུཀཱརཾ སཝནཾ, ཏཐཱ ཨུདྡེསོཔི པརིཔུཙྪཱཔི། ཏསྨཱ ཨུདྡེསཔརིཔུཙྪཱཔི ནིཔྤཔཉྩཱ སངྑཏཱ’’ཏི། ‘‘སུནིཛ྄ཛྷཱཔིཏོ, བྷནྟེ ནཱགསེན, པཉྷོ, ཨེཝམེཏཾ ཏཐཱ སམྤཊིཙྪཱམཱི’’ཏི།
‘‘Uddesopi, mahārāja, bahukāro, paripucchāpi bahukārā, navakammampi bahukāraṃ, dānampi bahukāraṃ, pūjāpi bahukārā tesu tesu karaṇīyesu. Yathā, mahārāja, puriso rājūpasevī katāvī amaccabhaṭabaladovārikaanīkaṭṭhapārisajjajanehi, te tassa karaṇīye anuppatte sabbepi upakārā honti. Evameva kho, mahārāja, uddesopi bahukāro, paripucchāpi bahukārā, navakammampi bahukāraṃ, dānampi bahukāraṃ, pūjāpi bahukārā tesu tesu karaṇīyesu. Yadi, mahārāja, sabbepi abhijātiparisuddhā bhaveyyuṃ, anusāsanena 2 karaṇīyaṃ na bhaveyya. Yasmā ca kho, mahārāja, savanena karaṇīyaṃ hoti, thero, mahārāja, sāriputto aparimitamasaṅkheyyakappaṃ upādāya upacitakusalamūlo paññāya koṭiṃ gato, sopi vinā savanena nāsakkhi āsavakkhayaṃ pāpuṇituṃ. Tasmā, mahārāja, bahukāraṃ savanaṃ, tathā uddesopi paripucchāpi. Tasmā uddesaparipucchāpi nippapañcā saṅkhatā’’ti. ‘‘Sunijjhāpito, bhante nāgasena, pañho, evametaṃ tathā sampaṭicchāmī’’ti.
ནིཔྤཔཉྩཔཉྷོ པཋམོ།
Nippapañcapañho paṭhamo.
Footnotes:
