| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১১. নিরামিসসুত্তৰণ্ণনা
11. Nirāmisasuttavaṇṇanā
২৭৯. আরম্মণতো সম্পযোগতো চ কিলেসামিসেন সামিসা। নিরামিসাযাতি নিস্সক্কৰচনং। নিরামিসতরাৰাতি একংসৰচনং তস্সা তথা নিস্সমেতব্বতায। সা হি পীতি সব্বসো সন্তকিলেসামিসে সন্তানে পৰত্তিযা অচ্চন্তসভাৰধম্মারম্মণৰিসযতায সযম্পি সাতিসযং সন্তসভাৰাকারেন পৰত্তিযা নিরামিসাযপি নিরামিসতরা ৰুত্তা। তেনাহ ‘‘ননু চা’’তিআদি। ইদানি তমত্থং উপমায সাধেতুং ‘‘যথা হী’’তিআদিমাহ। অপ্পটিহারিকন্তি পটিহরণরহিতং অপ্পটিহারং, কেনচি অনাৰটন্তি অত্থো। সেসৰারেসূতি সুখৰারউপেক্খাৰারেসু।
279. Ārammaṇato sampayogato ca kilesāmisena sāmisā. Nirāmisāyāti nissakkavacanaṃ. Nirāmisatarāvāti ekaṃsavacanaṃ tassā tathā nissametabbatāya. Sā hi pīti sabbaso santakilesāmise santāne pavattiyā accantasabhāvadhammārammaṇavisayatāya sayampi sātisayaṃ santasabhāvākārena pavattiyā nirāmisāyapi nirāmisatarā vuttā. Tenāha ‘‘nanu cā’’tiādi. Idāni tamatthaṃ upamāya sādhetuṃ ‘‘yathā hī’’tiādimāha. Appaṭihārikanti paṭiharaṇarahitaṃ appaṭihāraṃ, kenaci anāvaṭanti attho. Sesavāresūti sukhavāraupekkhāvāresu.
ৰিমোক্খৰারো পন ন অতিদিট্ঠো ইতরেহি ৰিসদিসত্তা। তেনাহ ‘‘ৰিমোক্খৰারে পনা’’তিআদি। রূপপটিসংযুত্তোতি ভাৰিতরূপপটিসংযুত্তো। সামিসো নাম যস্মা সামিসরূপপটিবদ্ধৰুত্তি চেৰ সামিসরূপপটিভাগঞ্চ , তস্মা ‘‘রূপামিস’’ন্তি ৰুচ্চতি, তেন রূপামিসেন সামিসো নাম। অরূপামিসস্স অভাৰতো অরূপপটিসংযুত্তো ৰিমোক্খো নিরামিসো নাম।
Vimokkhavāro pana na atidiṭṭho itarehi visadisattā. Tenāha ‘‘vimokkhavāre panā’’tiādi. Rūpapaṭisaṃyuttoti bhāvitarūpapaṭisaṃyutto. Sāmiso nāma yasmā sāmisarūpapaṭibaddhavutti ceva sāmisarūpapaṭibhāgañca , tasmā ‘‘rūpāmisa’’nti vuccati, tena rūpāmisena sāmiso nāma. Arūpāmisassa abhāvato arūpapaṭisaṃyutto vimokkho nirāmiso nāma.
নিরামিসসুত্তৰণ্ণনা নিট্ঠিতা।
Nirāmisasuttavaṇṇanā niṭṭhitā.
অট্ঠসতপরিযাযৰগ্গৰণ্ণনা নিট্ঠিতা।
Aṭṭhasatapariyāyavaggavaṇṇanā niṭṭhitā.
ৰেদনাসংযুত্তৰণ্ণনা নিট্ঠিতা।
Vedanāsaṃyuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১১. নিরামিসসুত্তং • 11. Nirāmisasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১১. নিরামিসসুত্তৰণ্ণনা • 11. Nirāmisasuttavaṇṇanā
