| Library / Tipiṭaka / तिपिटक • Tipiṭaka / संयुत्तनिकाय (टीका) • Saṃyuttanikāya (ṭīkā) |
११. निरामिससुत्तवण्णना
11. Nirāmisasuttavaṇṇanā
२७९. आरम्मणतो सम्पयोगतो च किलेसामिसेन सामिसा। निरामिसायाति निस्सक्कवचनं। निरामिसतरावाति एकंसवचनं तस्सा तथा निस्समेतब्बताय। सा हि पीति सब्बसो सन्तकिलेसामिसे सन्ताने पवत्तिया अच्चन्तसभावधम्मारम्मणविसयताय सयम्पि सातिसयं सन्तसभावाकारेन पवत्तिया निरामिसायपि निरामिसतरा वुत्ता। तेनाह ‘‘ननु चा’’तिआदि। इदानि तमत्थं उपमाय साधेतुं ‘‘यथा ही’’तिआदिमाह। अप्पटिहारिकन्ति पटिहरणरहितं अप्पटिहारं, केनचि अनावटन्ति अत्थो। सेसवारेसूति सुखवारउपेक्खावारेसु।
279. Ārammaṇato sampayogato ca kilesāmisena sāmisā. Nirāmisāyāti nissakkavacanaṃ. Nirāmisatarāvāti ekaṃsavacanaṃ tassā tathā nissametabbatāya. Sā hi pīti sabbaso santakilesāmise santāne pavattiyā accantasabhāvadhammārammaṇavisayatāya sayampi sātisayaṃ santasabhāvākārena pavattiyā nirāmisāyapi nirāmisatarā vuttā. Tenāha ‘‘nanu cā’’tiādi. Idāni tamatthaṃ upamāya sādhetuṃ ‘‘yathā hī’’tiādimāha. Appaṭihārikanti paṭiharaṇarahitaṃ appaṭihāraṃ, kenaci anāvaṭanti attho. Sesavāresūti sukhavāraupekkhāvāresu.
विमोक्खवारो पन न अतिदिट्ठो इतरेहि विसदिसत्ता। तेनाह ‘‘विमोक्खवारे पना’’तिआदि। रूपपटिसंयुत्तोति भावितरूपपटिसंयुत्तो। सामिसो नाम यस्मा सामिसरूपपटिबद्धवुत्ति चेव सामिसरूपपटिभागञ्च , तस्मा ‘‘रूपामिस’’न्ति वुच्चति, तेन रूपामिसेन सामिसो नाम। अरूपामिसस्स अभावतो अरूपपटिसंयुत्तो विमोक्खो निरामिसो नाम।
Vimokkhavāro pana na atidiṭṭho itarehi visadisattā. Tenāha ‘‘vimokkhavāre panā’’tiādi. Rūpapaṭisaṃyuttoti bhāvitarūpapaṭisaṃyutto. Sāmiso nāma yasmā sāmisarūpapaṭibaddhavutti ceva sāmisarūpapaṭibhāgañca , tasmā ‘‘rūpāmisa’’nti vuccati, tena rūpāmisena sāmiso nāma. Arūpāmisassa abhāvato arūpapaṭisaṃyutto vimokkho nirāmiso nāma.
निरामिससुत्तवण्णना निट्ठिता।
Nirāmisasuttavaṇṇanā niṭṭhitā.
अट्ठसतपरियायवग्गवण्णना निट्ठिता।
Aṭṭhasatapariyāyavaggavaṇṇanā niṭṭhitā.
वेदनासंयुत्तवण्णना निट्ठिता।
Vedanāsaṃyuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / ११. निरामिससुत्तं • 11. Nirāmisasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ११. निरामिससुत्तवण्णना • 11. Nirāmisasuttavaṇṇanā
