| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) |
༡༡. ནིརཱམིསསུཏྟཝཎྞནཱ
11. Nirāmisasuttavaṇṇanā
༢༧༩. ཨེཀཱདསམེ སཱམིསཱཏི ཀིལེསཱམིསེན སཱམིསཱ། ནིརཱམིསཏརཱཏི ནིརཱམིསཱཡཔི ཛྷཱནཔཱིཏིཡཱ ནིརཱམིསཏརཱཝ། ནནུ ཙ དྭཱིསུ ཛྷཱནེསུ པཱིཏི མཧགྒཏཱཔི ཧོཏི ལོཀུཏྟརཱཔི, པཙྩཝེཀྑཎཔཱིཏི ལོཀིཡཱཝ, སཱ ཀསྨཱ ནིརཱམིསཏརཱ ཛཱཏཱཏི? སནྟཔཎཱིཏདྷམྨཔཙྩཝེཀྑཎཝསེན ཨུཔྤནྣཏྟཱ། ཡཐཱ ཧི རཱཛཝལླབྷོ ཙཱུལུ༹པཊྛཱཀོ ཨཔྤཊིཧཱརིཀཾ ཡཐཱསུཁཾ རཱཛཀུལཾ པཝིསནྟོ སེཊྛིསེནཱཔཏིཨཱདཡོ པཱདེན པཧརནྟོཔི ན གཎེཏི། ཀསྨཱ? རཉྙོ ཨཱསནྣཔརིཙཱརཀཏྟཱ། ཨིཏི སོ ཏེཧི ཨུཏྟརིཏརོ ཧོཏི, ཨེཝམཡམྤི སནྟཔཎཱིཏདྷམྨཔཙྩཝེཀྑཎཝསེན ཨུཔྤནྣཏྟཱ ལོཀུཏྟརཔཱིཏིཏོཔི ཨུཏྟརིཏརཱཏི ཝེདིཏབྦཱ། སེསཝཱརེསུཔི ཨེསེཝ ནཡོ།
279. Ekādasame sāmisāti kilesāmisena sāmisā. Nirāmisatarāti nirāmisāyapi jhānapītiyā nirāmisatarāva. Nanu ca dvīsu jhānesu pīti mahaggatāpi hoti lokuttarāpi, paccavekkhaṇapīti lokiyāva, sā kasmā nirāmisatarā jātāti? Santapaṇītadhammapaccavekkhaṇavasena uppannattā. Yathā hi rājavallabho cūḷupaṭṭhāko appaṭihārikaṃ yathāsukhaṃ rājakulaṃ pavisanto seṭṭhisenāpatiādayo pādena paharantopi na gaṇeti. Kasmā? Rañño āsannaparicārakattā. Iti so tehi uttaritaro hoti, evamayampi santapaṇītadhammapaccavekkhaṇavasena uppannattā lokuttarapītitopi uttaritarāti veditabbā. Sesavāresupi eseva nayo.
ཝིམོཀྑཝཱརེ པན རཱུཔཔཊིསཾཡུཏྟོ ཝིམོཀྑོ ཨཏྟནོ ཨཱརམྨཎབྷཱུཏེན རཱུཔཱམིསཝསེནེཝ སཱམིསོ ནཱམ, ཨརཱུཔཔཊིསཾཡུཏྟོ རཱུཔཱམིསཱབྷཱཝེན ནིརཱམིསོ ནཱམཱཏི།
Vimokkhavāre pana rūpapaṭisaṃyutto vimokkho attano ārammaṇabhūtena rūpāmisavaseneva sāmiso nāma, arūpapaṭisaṃyutto rūpāmisābhāvena nirāmiso nāmāti.
ཝེདནཱསཾཡུཏྟཝཎྞནཱ ནིཊྛིཏཱ།
Vedanāsaṃyuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༡༡. ནིརཱམིསསུཏྟཾ • 11. Nirāmisasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡༡. ནིརཱམིསསུཏྟཝཎྞནཱ • 11. Nirāmisasuttavaṇṇanā
