| Library / Tipiṭaka / തിപിടക • Tipiṭaka / സംയുത്തനികായ (അട്ഠകഥാ) • Saṃyuttanikāya (aṭṭhakathā) |
൧൧. നിരാമിസസുത്തവണ്ണനാ
11. Nirāmisasuttavaṇṇanā
൨൭൯. ഏകാദസമേ സാമിസാതി കിലേസാമിസേന സാമിസാ. നിരാമിസതരാതി നിരാമിസായപി ഝാനപീതിയാ നിരാമിസതരാവ. നനു ച ദ്വീസു ഝാനേസു പീതി മഹഗ്ഗതാപി ഹോതി ലോകുത്തരാപി, പച്ചവേക്ഖണപീതി ലോകിയാവ, സാ കസ്മാ നിരാമിസതരാ ജാതാതി? സന്തപണീതധമ്മപച്ചവേക്ഖണവസേന ഉപ്പന്നത്താ. യഥാ ഹി രാജവല്ലഭോ ചൂളുപട്ഠാകോ അപ്പടിഹാരികം യഥാസുഖം രാജകുലം പവിസന്തോ സേട്ഠിസേനാപതിആദയോ പാദേന പഹരന്തോപി ന ഗണേതി. കസ്മാ? രഞ്ഞോ ആസന്നപരിചാരകത്താ. ഇതി സോ തേഹി ഉത്തരിതരോ ഹോതി, ഏവമയമ്പി സന്തപണീതധമ്മപച്ചവേക്ഖണവസേന ഉപ്പന്നത്താ ലോകുത്തരപീതിതോപി ഉത്തരിതരാതി വേദിതബ്ബാ. സേസവാരേസുപി ഏസേവ നയോ.
279. Ekādasame sāmisāti kilesāmisena sāmisā. Nirāmisatarāti nirāmisāyapi jhānapītiyā nirāmisatarāva. Nanu ca dvīsu jhānesu pīti mahaggatāpi hoti lokuttarāpi, paccavekkhaṇapīti lokiyāva, sā kasmā nirāmisatarā jātāti? Santapaṇītadhammapaccavekkhaṇavasena uppannattā. Yathā hi rājavallabho cūḷupaṭṭhāko appaṭihārikaṃ yathāsukhaṃ rājakulaṃ pavisanto seṭṭhisenāpatiādayo pādena paharantopi na gaṇeti. Kasmā? Rañño āsannaparicārakattā. Iti so tehi uttaritaro hoti, evamayampi santapaṇītadhammapaccavekkhaṇavasena uppannattā lokuttarapītitopi uttaritarāti veditabbā. Sesavāresupi eseva nayo.
വിമോക്ഖവാരേ പന രൂപപടിസംയുത്തോ വിമോക്ഖോ അത്തനോ ആരമ്മണഭൂതേന രൂപാമിസവസേനേവ സാമിസോ നാമ, അരൂപപടിസംയുത്തോ രൂപാമിസാഭാവേന നിരാമിസോ നാമാതി.
Vimokkhavāre pana rūpapaṭisaṃyutto vimokkho attano ārammaṇabhūtena rūpāmisavaseneva sāmiso nāma, arūpapaṭisaṃyutto rūpāmisābhāvena nirāmiso nāmāti.
വേദനാസംയുത്തവണ്ണനാ നിട്ഠിതാ.
Vedanāsaṃyuttavaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / സംയുത്തനികായ • Saṃyuttanikāya / ൧൧. നിരാമിസസുത്തം • 11. Nirāmisasuttaṃ
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൧൧. നിരാമിസസുത്തവണ്ണനാ • 11. Nirāmisasuttavaṇṇanā
